ಚೆಲುವ ಕನ್ನಡ ನಾಡು

ಆಧ್ಯಾತ್ಮಿಕ ಮತ್ತು ತಕ್ಕಡಿ

2009-07-02T20:47:00.001+05:30

ಜೀವಿಯ ಆಧ್ಯಾತ್ಮಿಕ ಜೀವನ ಒಂದು ತಕ್ಕಡಿಯಂತೆ. ಯಾವ ರೀತಿ ತಕ್ಕಡಿಯು ಭಾರವಾದ ಕಡೆಗೆ ತೂಗುತ್ತದೆಯೋ, ಅದೇ ರೀತಿ ಯಾವ ಮನುಷ್ಯನು ಪ್ರಾಪಂಚಿಕ ಸುಖ ಮತ್ತು ಭೋಗಗಳನ್ನು ಬಯಸಿತ್ತಾನೋ ಅವನು ಭೂಮಿಯ ಕಡೆಗೆ ತೂಗುತ್ತಾನೆ. ಅವನು ಮತ್ತೆ ಇದೇ "ಪುನರಪಿ ಜನನಮ್ ಪುನರಪಿ ಮರಣಂ" ಎಂಬ ಕಾಲಚಕ್ರದಲ್ಲಿ ಸಿಕ್ಕಿ ಬೀಳುತ್ತಾನೆ.

ಯಾವ ಜೀವಿಯು ಪ್ರಪಂಚದ ಸುಖ ಮತ್ತು ಭೋಗಗಳಿಗೆ ಮಾರು ಹೋಗದೆ ಇರುತ್ತಾನೋ, ಅವನು ಭೂಮಿಯ ಕಡೆಗೆ ತೂಗದೆ, ಪರಮಾತ್ಮನ ಸನ್ನಿಧಿಯನ್ನು ಸೇರುತ್ತಾನೆ. ಅವನಿಗೆ ಈ ಕಾಲಚಕ್ರದ ಭಯವಿರುವುದಿಲ್ಲ. ಅವನು ಮುಕ್ತಿಯನ್ನು ಹೊಂದುತ್ತಾನೆ. ಅವನು ಮುಕ್ತ ಜೀವಿ!!!.

- ರಾಮಕೃಷ್ಣ ಪರಮಹಂಸರು

ಡಂಭಾಚರ ಮತ್ತು ಸದ್ಭಕ್ತಿ

2009-01-03T16:49:00.000+05:30

ಮಾಡಿ ಮಾಡಿ ಕೆಟ್ಟರು ಮನವಿಲ್ಲದೆ,
ನೀಡಿ ನೀಡಿ ಕೆಟ್ಟರು ನಿಜವಲ್ಲದೆ
ಮಾಡುವ ನೀಡುವ ಗುಣವುಳ್ಳವರ್‍ಏ ಕೂಡಿಕೊಂಬ ನಮ್ಮ ಕೂಡಲ ಸಂಗಮದೇವ ||

-ಬಸವಣ್ಣ

ತಾತ್ಪರ್ಯ: ಈ ಪ್ರಪಂಚದಲ್ಲಿ ಡಾಂಭಿಕ ತನದಿಂದ ಪರಿಶುದ್ಧ ಮನಸಿಲ್ಲದೆ, ಯಾವುದೋ ಆಮಿಷಕ್ಕೆ ಒಳಗಾಗಿ, ದಾನ ಶೂರ ನೆನಿಸಿಕೊಳ್ಳುವುದಕ್ಕೋಸ್ಕರ ದಾನ, ಧರ್ಮ ಮಾಡಿ, ಬರಿ ತೊರುವಿಕೆಗಾಗಿ ಭಕ್ತಿ, ವಿಶ್ವಾಸ, ನಂಬಿಕೆಗಳ ನಟನೆ ಮಾಡಿ ಹಣ ಮತ್ತು ಸಮಯ ವ್ಯರ್ಥ ಮಾಡುತ್ತಾ ಕೆಟ್ಟು ಹೋದರೇ ವಿನಹ ಅವರಿಗೆ ಎಂದಿಗೂ ನಿಜವಾದ ಭಗವಂತನ ಕೃಪೆ ದೊರೆಯುವುದಿಲ್ಲ. ಯಾವ ಜೀವಿಯು ಯಾವುದೇ ಫಲದ ನಿರೀಕ್ಷೆಗಳಿಲ್ಲದೆ ಮನಃ ಪೂರ್ವಕವಾಗಿ ದಾನ, ಧರ್ಮ, ಭಕ್ತಿ, ಕರ್ಮಗಳನ್ನು ಶ್ರದ್ಧೆ ವಹಿಸಿ ಮಾಡುತ್ತಾನೊ, ಅಂತವರಿಗೆ ನಮ್ಮ ಕೂಡಲ ಸಂಗಮದೇವ ಒಲಿಯುತ್ತಾನೆ ಮತ್ತು ಅಂತಹ ಸತ್-ಭಕ್ತರನ್ನು ಸದಾ ಕೈ ಹಿಡಿದು ಕಾಪಾಡುತ್ತಾನೆ.

ಯಾವುದು ಹೊಸತು ?

2009-01-03T16:48:00.000+05:30

ಹಳೆ ಸೂರ್ಯ ಹಳೆ ಚಂದ್ರ ಹಳೆ ಭೂಮಿ ಹಳೆ ನೀರು |
ಹಳೆ ಹಿಮಾಚಲ ಗಂಗೆ ಹಳೆ ವಂಶ ಚರಿತೆ||
ಹಳೆಯವಿವು ನೀನಿದರೊಳಾವುದನು ಕಳೆದೀಯೋ ? |
ಹಳದು ಹೊಸತರೊಳಿರದೆ ? - ಮಂಕುತಿಮ್ಮ
-ಡಿ.ವಿ.ಜಿ

ತಾತ್ಪರ್ಯ: ನಮಗೆ ಹೊಸದಾಗಿರುವುದು ಯಾವುದು, ಅಂಥ ಹಳೆಯದಾದದ್ದು ಯಾವುದನ್ನು ನಾವು ತೆಗೆದು ಹಾಕಲಾಗುತ್ತದೆ ? ನಾವು ನೋಡಿತ್ತಿರುವ ಸೂರ್ಯ, ಚಂದ್ರ, ಭೂಮಿ, ನೀರು, ಹಿಮಾಚಲ ಗಂಗೆ, ಎಲ್ಲವೂ ಹಳೆಯವೆ. ನಮ್ಮ ಮಾನವ ವಂಶವು ಹಳೆಯದೆ. ನಾವು ಬರುವ ಮೊದಲೂ ಇವು ಇತ್ತು, ನಾವು ಹೋದಮೇಲು ಇವು ಇರುತ್ತವೆ. ಹೀಗಾಗಿ ಇವೆಲ್ಲವು ನಾವು ಈಗ ಹೊಸದೆಂದು ಯಾವುದನ್ನು ಕರೆಯುತ್ತೇವೆಯೊ ಅದರಲ್ಲಿ ಇಲ್ಲವೇನು ?

ಬೀchi

2009-01-03T16:41:00.001+05:30

ಪೂರ್ಣ ನಾಮಧೇಯ: ರಾಯಸಂ ಭೀಮಸೇನ್ ರಾವ್

ಕಾವ್ಯನಾಮ: ಬೀchi(ಇಂಗ್ಲೀಷ್ ಮತ್ತು ಕನ್ನಡ ಬೆರೆತ ಕಾವ್ಯನಾಮ)

ಜನನ: ೨೩ - ೦೪ - ೧೯೧೩

ಜನನ ಸ್ಥಳ: ಬಳ್ಳಾರಿ ಜಿಲ್ಲೆಯ ಹರಪ್ಪನಹಳ್ಳಿ

ತಂದೆ, ತಾಯಿ: ತಂದೆ ರಾಯಸದ ಶ್ರೀನಿವಾಸರಾವ್, ತಾಯಿ ಭಾರತಮ್ಮ.

ವ್ಯಾಸಂಗ: ೧೯೩೦ರಲ್ಲಿ ಹೈಸ್ಕೂಲ್ ವಿದ್ಯಾಭ್ಯಾಸ ಹರಪ್ಪನಹಳ್ಳಿಯಲ್ಲಿ.

ಸೇವೆ ಸಲ್ಲಿಸಿದ ಕ್ಷೇತ್ರಗಳು: ಹೈಸ್ಕೂಲ್ ವಿದ್ಯಾಭಾಸದ ನಂತರ ಹುಬ್ಬಳ್ಳಿಯ ವಿಮಾ ಕಚೇರಿಯಲ್ಲಿ ಕೆಲಸ ಮಾಡಿದರು.

- ೧೯೩೬ ರಲ್ಲಿ ಪೋಲೀಸ್ ಇಲಾಖೆಯಲ್ಲಿ ಕೆಲಸಕ್ಕೆ ಸೇರಿದರು. ೧೯೬೮ ರಲ್ಲಿ ನಿವೃತ್ತರಾಗಿ ಪಡೆದ ಪಿಂಚಣಿ ಹಣ ೧೩೩ ರೂಗಳು.

ಸಾಹಿತ್ಯ ಕ್ಷೇತ್ರದ ಕೊಡುಗೆ:

- ಹರೆಟೆಗಳು, ಹಾಸ್ಯ ಲೇಖನಗಳು, ಕಾದಂಬರಿಕಾರ, ನಾಟಕಕಾರ

ಹಾಸ್ಯ ಲೇಖನ: ಗೆಳೆಯ ಕೋ.ಚೆನ್ನಬಸಪ್ಪನವರು ನಡೆಸುತ್ತಿದ್ದ "ರೈತವಾಣಿ" ಪತ್ರಿಕೆಗೆ "ಬೇವಿನ ಕಟ್ಟೆ ತಿಂಮ" ಎಂಬ ಸ್ಥಿರ ಶೀರ್ಷಿಕೆಯಡಿ ಹಾಸ್ಯ ಲೇಖನಗಳನ್ನು ಬರೆದರು.

ಹರಟೆಗಳು: ಪಾಟೀಲ ಪುಟ್ಟಪ್ಪ ಅವರ ವಿಶಾಲ ಕರ್ನಾಟಕಕ್ಕೆ "ಕೆನೆಮೊಸರು" ಸ್ಥಿರ ಶೀರ್ಷಿಕೆಯಡಿ ನಿತ್ಯವೂ ಹರಟೆಗಳನ್ನು ಬರೆದರು.

ನಾಟಕಗಳು: "ದೇವರ ಅತ್ಮಹತ್ಯೆ" ನಾಟಕ ರಚಿಸಿ ತಾವೆ ದೇವರ ಪಾತ್ರ ಕೂಡವಹಿಸಿದರು. ೧೯೪೬ ರಿಂದ ಪ್ರಾರಂಭವಾದ "ರೇಡಿಯೊ ನಾಟಕ" ಗಳಿಂದ ಹಿಡಿದು ತಾವು ಜೀವಿಸಿದ್ದಷ್ಟು ಕಾಲ ಇವರ ಲೇಖನಿಗಳಿಗೆ ವಿಶ್ರಾಂತಿಯೆ ಇರಲಿಲ್ಲ. "ಹನ್ನೊಂದನೆಯ ಅವತಾರ", "ಏಕೀಕರಣ", ಏಕೋದರರು" ಎಂಬ ರೇಡಿಯೊ ನಾಟಕಗಳು ಇವರಿಗೆ ಬಹಳ ಕೀರ್ತಿಗಳನ್ನು ತಂದು ಕೊಟ್ಟಿತು.

ನಗೆ ಬರಹಗಳು: ಇವರು ತಮ್ಮ ಲೇಖನಗಳಿಗೆ "ತಿಂಮ" ಪಾತ್ರ ಸೃಷ್ಠಿಸಿದರು. "ತಿಂಮನ ತಲೆ, ತಿಂಮನ ರಸಾಯನ, ಬೆಳ್ಳಿ ತಿಂಮ ನೂರೆಂಟು ಹೇಳಿದ" ಹೀಗೆ ತಿಂಮನ ಹೆಸರನಿಲ್ಲಿ ನೂರಾರು ನಗೆಬರಹಗಳನ್ನು ಬರೆದರು. ಇವರ ಪ್ರಕಾರ
"ತಿಂಮನ ನಗು ದೇಹವಾದರೆ, ನಗುವಿನ ಹಿಂದೆ ಇರುವ ನೋವು ಅದರ ಜೀವ. ಇದನ್ನು ಗುರುತಿಸದಿದ್ದರೆ ದೊರೆಯುವುದು ತಿಂಮನ ಹೆಣ ಮಾತ್ರ"

ಕಾದಂಬರಿ: "ದಾಸ ಕೂಟ" ಮೊದಲ ಕಾದಂಬರಿ. ಹಾಸ್ಯ ಪ್ರಧಾನವಾದ ಕನ್ನಡದ ಮೊದಲ ಕಾದಂಬರಿ ಎಂದೂ ಹೇಳಬಹುದು. ೩೦ ಕಾದಂಬರಿ ಮತ್ತು ೬೦ ಕ್ಕಿಂತ ಹೆಚ್ಚು ಕೃತಿಗಳನ್ನು ರಚಿಸಿದ್ದಾರೆ. "ಸತ್ತವನು ಎದ್ದು ಬಂದಾಗ" ಎನ್ನುವ ಪತ್ತೆದಾರಿ ಕಾದಂಬರಿಯನ್ನು ರಚಿಸಿದ್ದಾರೆ.

ಕವನ ಸಂಕಲನ: "ಅಂದನಾ ತಿಂಮ" ಇವರ ಏಕೈಕ ಕವನ ಸಂಕಲನ. ನಗು ಲೇಪನದಿಂದ ಕೂಡಿದ ಈ ಕವನ ಸಂಕಲನದಲ್ಲಿ ಇವರು ಜೀವನದ ಅನುಭವಗಳನ್ನು ಹೇಳುವ ನಾಲ್ಕು ಪದಗಳುವುಳ್ಳದ್ದಾಗಿದೆ.

ವಿದೇಶಿ ಪ್ರವಾಸ: ಇವರು ರಷ್ಯಾ ದೇಶದಲ್ಲಿ ಪ್ರವಾಸ ಮಾಡಿ, ಪ್ರವಾಸದ ಅನುಭವಗಳನ್ನು "ದೇವರಿಲ್ಲದ ಗುಡಿ" ಎನ್ನುವ ಕೃತಿಯಲ್ಲಿ ರಚಿಸಿದ್ದಾರೆ.

ಸುಧಾ ವಾರಪತ್ರಿಕೆಯಲ್ಲಿ ಇವರು ಓದುಗರು ಕೇಳುವ ಪ್ರಶ್ನೆಗಳಿಗೆ ಉತ್ತರ ನೀಡಿತ್ತಿದ್ದರಲ್ಲದೆ ಅದನ್ನು "ಉತ್ತರ ಭೂಪ" ಎಂಬ ಕವನ ಸಂಕಲನದಲ್ಲಿ ರಚಿಸಿದ್ದಾರೆ.

ಆತ್ಮ ಚರಿತೆ: "ನನ್ನ ಭಯಾಗ್ರಫಿ" ಎಂಬ ಎಲ್ಲರನ್ನು ಬೆಚ್ಚಿ ಬೀಳಿಸುವ ಆತ್ಮ ಚರಿತೆಯನ್ನು ಬರೆದಿದ್ದಾರೆ.

ಪ್ರಶಸ್ತಿಗಳು ಮತ್ತು ಪುರಸ್ಕಾರಗಳು:

೧. "ತಿಂಮನ ತಲೆ" - ಮದ್ರ್‍ಆಸ್ ಸರ್ಕಾರದಿಂದ ರಾಜ್ಯ ಮಟ್ಟದ ಬಹುಮಾನ.
೨. "ಚಿನ್ನದ ಕಸ" ಕೃತಿಗೆ - ರಾಜ್ಯ ಸಾಹಿತ್ಯ ಅಕಾಡೆಮಿ ಬಹುಮಾನ

ಜೀವನ ವಿಶೇಷ: ಕನ್ನಡ ಎಂದರೆ ಮೊದಲು ಇವರಿಗೆ ಕೊಂಚವೂ ಅಭಿಮಾನ ಇರಲಿಲ್ಲ. ಒಂದು ಬಗೆಯ ಅಸಡ್ಡೆ ತೊರುತ್ತಿದ್ದರು. ಇವರ ಶ್ರೀಮತಿಯವರಿಗೆ ಒದಲು ಕನ್ನಡ ಪುಸ್ತಕಗಳನ್ನು ತಂದುಕೊಡುವ ಪ್ರಸಂಗ ಬಂದಾಗ ಇವರಿಗೆ ದೊರೆತದ್ದು "ಸಂಧ್ಯಾರಾಗ" ಕಾದಂಬರಿ. ಈ ಕಾದಂಬರಿಯನ್ನು ಓದಿ ಸ್ವತಃ ತಾವೇ ಕನ್ನಡ ಪ್ರೇಮಿಯಾದರು.

ದೈವಾಧೀನ: ಇವರು ೦೭ - ೧೨ - ೧೯೮೦ ರಂದು ದೈವಾಧೀನರಾದರು.

ರೋಗ ಬರುವುದೆಂದು...!

2009-01-03T16:40:00.001+05:30

ಬಂದೀತು ರೋಗವೆಂದೆಂದು | ನರಳಲು ಬೇಡ
ಬಂದುದನುಂಡು ಸುಖಿಯಾಗು - ರೋಗ ಬಂ
ದಂದಿಗೇ ನರಳು ಸರ್ವಙ
- ಸರ್ವಙ

ತಾತ್ಪರ್ಯ: ರೋಗಬಾರದೆಯೇ, ಬಂದೀತೆಂಬ ನಿರೀಕ್ಷೆಯಿಂದಲೇ ನರಳುವುದು ಬೇಡ. ಇದ್ದುದನುಂಡು ನೆಮ್ಮದಿಯಿಂದ ಇರುವುದು ಲೇಸು. ರೋಗ ಬಂದಾಗ ನರಳುವುದು ಇದ್ದೇ ಇದೆ.

ಹುಟ್ಟು.. ಸಾವು..!

2008-12-28T14:35:00.001+05:30

ಪುನರಪಿ ಜನನಂ ಪುನರಪಿ ಮರಣಂ
ಪುನರಪಿ ಜನನೀ ಜಠರೇ ಶಯನಮ್
ಇಹಸಂಸಾರೇ ಬಹುದುಸ್ತಾರೇ
ಕೃಪಯಾಪರೇ ಪಾಹಿ ಮುರಾರೇ ||

- ಆನಂದಗಿರಿ (ಶಂಕರ ಭಗವತ್ಪಾದರ ಶಿಷ್ಯರು)

ತಾತ್ಪರ್ಯ: ಹುಟ್ಟು, ಸಾವು ಇವು ಒಂದರ ಹಿಂದೊಂದು ಬರುತ್ತಲೇ ಇರುತ್ತದೆ. ಹುಟ್ಟಿದವನು ಸಾಯಲೇಬೇಕು. ಸತ್ತವನು ಮತ್ತೊಮ್ಮೆ ಹುಟ್ಟುತ್ತಾನೆ. ಹೀಗೆ ತಾಯ ಗರ್ಭದಲ್ಲಿ ನಾವು ಮತ್ತೆ ಮತ್ತೆ ಹುಟ್ಟಿ ಆಶ್ರಯಿಸಿ, ಆನೇಕ ದುಃಖಗಳನ್ನು ಅನುಭವಿಸಬೇಕಾಗುತ್ತದೆ. ಈ ದುಸ್ತಾರವಾದ ಸಂಸಾರ ದುಃಖವನ್ನು ಬಗೆಹರಿಸಬೇಕಾದರೆ ಇರುವ ಒಂದೇ ಮಾರ್ಗ ಎಂದರೆ ಭಗವಂತನ ಕೃಪೆ. ಆದುದರಿಂದ "ಹೇ ಮುರಾರಿ! " ನನ್ನನ್ನು ಸಲಹು ಎಂದು ಆನಂದಗಿರಿಯವರು ಇಲ್ಲಿ ಬೇಡುತ್ತಾರೆ.

ದುರ್ಜನರ ಸಹವಾಸ ...!

2008-12-28T14:26:00.000+05:30

ಸಾರ ಸಜ್ಜನ ಸಂಗವ ಮಾಡುವುದು, ದೂರ ದುರ್ಜನರ ಸಂಗ ಬೇಡವಯ್ಯ.
ಆವ ಹಾವಾದರೇನು ? ವಿಶವೊಂದೇ, ಅಂತವರ ಸಂಗ ಬೇಡವಯ್ಯ,
ಅಂತರಂಗ ಶುದ್ದವಲ್ಲದವರ ಸಂಗ ಸಿಂಗಿ, ಕಾಳಕೂಟ ವಿಷವೋ, ಕೂಡಲ ಸಂಗಮದೇವಾ ||

- ಬಸವಣ್ಣ

ತಾತ್ಪರ್ಯ: ಒಳ್ಳೆಯ ಜನರ ಸಂಪರ್ಕವನ್ನು ಮಾಡುವುದು ಸತ್ವ ಪೂರ್ಣವಾಗಿದೆ. ದುಷ್ಟ ಜನರ ಸಂಪರ್ಕವನ್ನು ಮಾಡಬಾರದು. ಅವರಿಂದ ದೂರವಿರಬೇಕು. ಯಾವ ಪ್ರಕಾರದ ಸರ್ಪವಾದರೇನು ? ಕಚ್ಚಿದರೆ ವಿಷವು ಒಂದೇ ಆಗಿರುತ್ತದೆ. ಅಂತಹ ವಿಷಯುಕ್ತ ಜನರ ಸಂಪರ್ಕವೇ ಬೇಡ. ಕೂಡಲ ಸಂಗಮದೇವರ ಅಂತರಂಗವಿಲ್ಲದವರ ಗೆಳೆತನವು "ಸಿಂಗಿ" ಎಂಬ ಒಂದು ಬಗೆಯ ಘೋರ ವಿಷವಾಗಿದೆ.

ಅಂಜುವುದು ...!

2008-12-28T14:16:00.000+05:30

ಆನೆ ನೀರಾಟದಲಿ | ಮೀನ ಕಂಡಂಜುವುದೇ
ಹೀನ ಮಾನವರ ಬಿರು ನುಡಿಗೆ - ತತ್ವದ
ಙಾನಿ ಅಂಜುವನೆ ಸರ್ವಙ ||

- ಸರ್ವಙ

ತಾತ್ಪರ್ಯ: ಆನೆಯು ಜಲಕ್ರೀಡೆಯಾಡುವಾಗ ನೀರಿನಲ್ಲಿರುವ ಮೀನಿಗೆ ಅಂಜುವುದೇ ? ಎಂದಿಗೂ ಇಲ್ಲ. ನೀಚರಾದ ಮಾನವರ ಬಿರುಸಾದ ( ಕಠಿಣವಾದ ) ನುಡಿಗಳಿಗೆ ತತ್ವವ ಅರಿತ ಙಾನಿಯು ಅಂಜುವನೇ ? ಎಂದಿಗೂ ಇಲ್ಲ.

ಸಂಸ್ಕೃತಿ ಮತ್ತು ನಾಗರೀಕತೆ

2008-12-28T14:09:00.001+05:30

ಸಂಸ್ಕೃತಿ ಮತ್ತು ನಾಗರೀಕತೆಗಳು ಒಂದು ಜನ ಸಮುದಾಯ, ರಾಷ್ಟ್ರ ಅಥವಾ ದೇಶದ ಜೀವನ ಸಂವಿಧಾನದ ಅವಿಭಾಜ್ಯ ಅಂಗಗಳು. ಚೆನ್ನಾಗಿ ಉಡುಪು ಧರಿಸಿದ ವ್ಯಕ್ತಿ ಸುಸಂಸ್ಕೃತನೆಂದು ಪರಿಗಣಿಸಲ್ಪಡುತ್ತಾನೆ. ಬೇರೆಯವರ ಜೊತೆಯಲ್ಲಿ ಚೆನ್ನಾಗಿ ಬೆರೆಯಬಲ್ಲ. ಆದರೆ ಇದಿಷ್ಟೇ ಆತನನ್ನು ಸುಸಂಸ್ಕೃತ ವ್ಯಕ್ತಿಯನ್ನಾಗಿ ಮಾಡಲಾರದು. ಒಂದು ದೇಶದ ಆಲೋಚನೆಗಳ ಹಾಗೂ ಭಾವನೆಗಳ ರೀತಿಯನ್ನು ನಾಗರಿಕತೆ ಸೂಚಿಸುತ್ತದೆ. ಆಹಿಂಸೆ, ಮಾನವೀಯತೆ, ನಿಷ್ಠೆ ಹಾಗೂ ವಿಧೇಯತೆ - ಇಂಥ ವಿಚಾರಗಳ ಬೆಳವಣಿಗೆ ಇತ್ಯಾದಿಗಳಲ್ಲಿ ಸಂಸ್ಕೃತಿಯು ಬದುಕಿನ ಬಾಹ್ಯ ವಿಧಾನ.

"ಸುಸಂಸ್ಕೃತಿಯು ಒಂದು ಪುಷ್ಪವಾದರೆ ನಾಗರೀಕತೆಯು ಅದರ ಪರಿಮಳ"

ಒಬ್ಬ ವ್ಯಕ್ತಿ ಬಡವನಿರಬಹುದು ಆದರೆ ಆತ ಸಭ್ಯ ವ್ಯಕ್ತಿಯಾಗಿರಬಹುದು. ಆದರೆ ಸಭ್ಯನಲ್ಲದ ಸುಸಂಸ್ಕೃತ ವ್ಯಕ್ತಿ ಲೌಕಿಕದಲ್ಲಿ ಯಶಃಪ್ರದನಾಗಿದನಾಗ್ಯು ಸಮಾಜಕ್ಕೆ ಆತನಿಂದ ಉಪಯೋಗವಿಲ್ಲ. ಯಾಕೆಂದರೆ ಅವನಲ್ಲಿ ರಾಷ್ಟ್ರದ ಹಾಗೂ ವ್ಯಕ್ತಿಗತವಾದ ಬೆಳವಣಿಗೆಯನ್ನು ಸಮೃದ್ಧಗೊಳಿಸಬಲ್ಲ ಆಂತರಿಕ ರೀತಿನೀತಿ ಮತ್ತು ಗುಣಗಳ ಅಭಾವ ಇರುತ್ತದೆ.

"ಸುಸಂಸ್ಕೃತಿಯು ಬಾಹ್ಯವಾದದ್ದು ನಾಗರೀಕತೆಯು ಆಂತರಿಕವಾದದ್ದು"

ಆಧುನಿಕ ಜಗತ್ತಿನಲ್ಲಿ ಇವರೆಡರ ಸಮೀಕರಣ ಅತ್ಯಗತ್ಯ.

ಭಾರತೀಯರ ನಾಗರೀಕತೆ ಅತಿ ಸಮೃದ್ಧವಾದದ್ದು, ಅದರ ಸಂಸ್ಕೃತಿಯು ತೋರಿಕೆಯ ಆಂಗ್ಲ ಸಂಸ್ಕೃತಿಯಾಗಿದೆ. ಇದರಿಂದ ನಾವು ಹೊರಬಂದರೆ "ಸಂಸ್ಕೃತಿ ಮತ್ತು ನಾಗರೀಕತೆಗೆ ಒಂದು ಮಾದರಿ ದೇಶ ಮತ್ತು ಜನ" ಎಂದು ಪ್ರಪಂಚದಲ್ಲಿ ಅನ್ನಿಸಿಕೊಳ್ಳಬಹುದು.

ಅಂತರಂಗದ ಅನುಭವಗಳು

2008-12-28T13:50:00.001+05:30

ಆಗುಂಬೆಯಸ್ತಮಯ ದ್ರೋಣಪರ್ವತದುದಯ |
ತ್ಯಾಗರಾಜನ ಗಾನ ವಾಲ್ಮೀಕಿ ಕವನ ||
ಆಗಿಸವೆ ತಾವಿವೆಮ್ಮಂತರಂಗದಿ ಸತ್ಯ |
ಯೋಗಪುಲಕಾಂಕುರವ ? - ಮಂಕುತಿಮ್ಮ ||

- ಡಿ. ವಿ. ಜಿ

ತಾತ್ಪರ್ಯ: ಮೈಮರೆಸುವಂತ ಅನುಭವವನ್ನು ಉಂಟುಮಾಡಿ ಅಂತರಂಗದಲ್ಲಿ ಸತ್ಯದರ್ಶನ ಮಾಡಿಸುವ, ರೋಮಾಂಚವನ್ನುಂಟುಮಾಡುವ ಅನುಭವಗಳೂ ಇದೆ. ಆಗುಂಬೆಯಿಂದ ಕಾಣುವ ಸೂರ್ಯಾಸ್ತ, ಚಂದ್ರ ದ್ರೋಣ ಪರ್ವತದಿಂದ (ಇಗಿನ ಬಾಬ ಬುಡನ್ ಗಿರಿ) ಕಾಣಬರುವ ಸೂರ್ಯೋದಯ, ಹಾಗೆಯೇ ಮನಸನ್ನು ಕರಗಿಸುವ ತ್ಯಾಗರಾಜರ ಕೀರ್ತನೆಯ ಗಾನ ಮತ್ತು ವಾಲ್ಮೀಕಿ ಮಹರ್ಷಿಗಳ ರಾಮಾಯಣದ ಗಾನ ಮತ್ತು ಅವುಗಳು ವರ್ಣಿಸುವ ಘಟನೆ, ಪಾತ್ರ ಸಂಪತ್ತು.

ಮಾಸ್ತಿ ವೆಂಕಟೇಶ ಅಯ್ಯಂಗಾರ್

2008-12-28T13:43:00.004+05:30

ಪೂರ್ಣ ನಾಮಧೇಯ: ಮಾಸ್ತಿ ವೆಂಕಟೇಶ ಅಯ್ಯಂಗಾರ್ ( " ಮಾಸ್ತಿ ಕನ್ನಡದ ಆಸ್ತಿ" )

ಜನನ: ೦೬ - ೦೬ - ೧೮೯೧

ಜನನ ಸ್ಥಳ: ಕೋಲಾರ ಜಿಲ್ಲೆಯ ಮಾಸ್ತಿ

ತಂದೆ, ತಾಯಿ: ತಂದೆ ರಾಮಸ್ವಾಮಿ ಅಯ್ಯಂಗಾರ್, ತಾಯಿ ತಿರುಮಲಮ್ಮ. ಇವರ ಕುಟುಂಬವನ್ನು ದೊಡ್ಡ ಮನೆಯವರು ಎಂದು ಕರೆಯುತ್ತಾರೆ.

ವ್ಯಾಸಂಗ: ಪದವಿ ಪಡೆದ ನಂತರ ಮೈಸೂರು ಸಿವಿಲ್ ಸರ್ವೀಸ್ ಪರೀಕ್ಷೆ ( ಎಂ. ಸಿ. ಎಸ್ ) ಗೆ ಕುಳಿತು ಪ್ರಥಮ ಶ್ರೇಣಿಯಲ್ಲಿ ಉತ್ತೀರ್ಣರಾದರು.

ಸೇವೆ ಸಲ್ಲಿಸಿದ ಕ್ಷೇತ್ರಗಳು: ಉಪನ್ಯಾಸಕರಾಗಿ ಕೆಲಸ ಮಾಡಿ, ಮೈಸೂರು ಸರ್ಕಾರದಲ್ಲಿ ಕೆಲಸಕ್ಕೆ ಸೇರಿದರು. ಇವರು ಅಸಿಸ್ಟೆಂಟ್ ಕಮೀಷನರ್, ಅಸಿಸ್ಟೆಂಟ್ ಸೆಕ್ರೆಟರಿ, ಸಬ್ ಡಿವಿಜನ್ ಆಫೀಸರ್, ಡೆಪ್ಯುಟಿ ಕಮೀಷನರ್ ಆಗಿ ಕೊನೆಯಲ್ಲಿ ಎಕ್ಸೈಜ್ ಕಮೀಷನರ್ ಹುದ್ದೆಯಲ್ಲಿ ಕೆಲಸ ನಿರ್ವಹಿಸಿದ್ದಾರೆ. ಸ್ವ-ಇಚ್ಚೆಯಿಂದ ಸರ್ಕಾರಿ ಕೆಲಸಕ್ಕೆ ರಾಜೀನಾಮೆ ಕೊಟ್ಟು ಕನ್ನಡ ಸೇವೆಯನ್ನು ಕೈಗೊಂಡರು.

ಇವರು ತಾವೆ ಆರಂಭಿಸಿದ "ಜೀವನ" ಮಾಸ ಪತ್ರಿಕೆಯಲ್ಲಿ ಇವರು ಬರೆದ ಸಂಪಾದಕೀಯಗಳ ಸಂಗ್ರಹ, ಪ್ರಚಲಿತ ಸಂಗತಿಗಳನ್ನು ಕುರಿತು ಇವರು "ಜೀವನ" ದಲ್ಲಿ ಬರೆದ ಲೇಖನಗಳ ಸಂಗ್ರಹವನ್ನು ಪ್ರಕಟಿಸಿದ್ದಾರೆ.

ಕನ್ನಡ ಸಾಹಿತ್ಯ ಪರಿಷತ್ತಿನ ಉಪಾಧ್ಯಕ್ಷರಾಗಿ ಸುಮಾರು ಐದು ವರ್ಷಗಳ ಕಾಲ ಸೇವೆ ಸಲ್ಲಿಸಿದರು. ಪಿ.ಇ.ಎನ್. ಸಂಸ್ಥೆಯ ಭಾರತೀಯ ವಿಭಾಗದ ಅಧ್ಯಕ್ಷರಾಗಿ ಕೆಲಸ ಮಾಡಿದ್ದಾರೆ.

ಸಾಹಿತ್ಯ ಕ್ಷೇತ್ರದ ಕೊಡುಗೆ:

ಕಥೆಗಳು: ಸಾಹಿತ್ಯ ರಂಗ ಪ್ರವೇಶಿಸಿದ್ದು "ರಂಗಣ್ಣನ ಮದುವೆ" ಎಂಬ ಸಣ್ಣಕಥೆಯ ಮೂಲಕ. ಇತರೆ ಸಣ್ಣ ಕಥೆಗಳಾದ "ಮಾಸ್ತಿ ಕನ್ನಡದ ಆಸ್ತಿ", "ಸಣ್ಣ ಕಥೆಗಳ ಜನಕ" ಎಂಬ ಸರಳ ಭಾಷೆಗಳಲ್ಲಿ ಸಣ್ಣ ಕಥೆಗಳನ್ನು ರಚಿಸಿದ್ದಾರೆ.

ಕೃತಿಗಳು: ಪ್ರಕಟಿತ ಕೃತಿಗಳ ಸಂಖ್ಯೆ ೧೨೦ ಮೀರಿದೆ. ಅದರಲ್ಲಿ ಕನ್ನಡ ಕೃತಿಗಳು ೧೦೮ ಮತ್ತು ಇಂಗ್ಲೀಷಿನಲ್ಲಿ ೧೬.

ಕಥನ ಕವನ: ಇವರ "ನವರಾತ್ರಿ" ಕಥಾ ಕವನದಲ್ಲಿ ಒಬ್ಬೊಬ್ಬ ಸಹೋದರ ಒಂದೊಂದು ಕಥೆಯನ್ನು ಹೇಳಿದಂತೆ ಬರೆದಿದ್ದಾರೆ. ನವರಾತ್ರಿಯಲ್ಲಿ ಒಟ್ಟು ೨೦ ಕಥೆಗಳಿವೆ. ಇದರಲ್ಲಿ ಬಿ.ಎಂ. ಶ್ರೀ ಕಂಠಯ್ಯ, ಟಿ. ಎಸ್. ವೆಂಕಣ್ಣಯ್ಯ ಏ. ಆರ್. ಕೃ., ಎಂ. ಆರ್. ಶ್ರೀ., ಮುಂತಾದ ಹಿರಿಯರ ವಿಶೇಷ ಗುಣಗಳನ್ನು ಚಿತ್ರಿಸಿದ್ದಾರೆ.

ಆತ್ಮ ಚರಿತೆ: "ಭಾವ" (ಮೂರು ಭಾಗಗಳಲ್ಲಿ) ಆತ್ಮ ಚರಿತೆಯನ್ನು ಬರೆದಿದ್ದಾರೆ.

ಪ್ರಶಸ್ತಿಗಳು ಮತ್ತು ಪುರಸ್ಕಾರಗಳು:

೧. ೧೫ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರು - ಬೆಳಗಾವಿ - ೧೯೨೯
೨. "ರಾಜ ಸೇವಾ ಪ್ರಸಕ್ತ" ಬಿರುದನ್ನು ಮೈಸೂರಿನ ಅರಸರಾದ ಶ್ರೀ ಜಯಚಾಮರಾಜೇಂದ್ರ ಒಡೆಯರ್ ನೀಡಿ ಗೌರವಿಸಿದರು.
೩. ಮೈಸೂರು ಮತ್ತು ಕರ್ನಾಟಕ ವಿಶ್ವವಿದ್ಯಾನಿಲಯಗಳು "ಗೌರವ ಡಿ.ಲಿಟ್" ಪದವಿ ಕೊಟ್ಟು ಗೌರವಿಸಿದೆ.
೪. ಕನ್ನಡ ಸಾಹಿತ್ಯ ಪರಿಷತ್ತು "ಗೌರವ ಸದಸ್ಯತ್ವ" ನೀಡಿದೆ.
೫. "ಸಣ್ಣ ಕಥೆಗಳ ಸಂಗ್ರಹ" ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ - ೧೯೬೯
೬. "ಚಿಕ್ಕವೀರ ರಾಜೇಂದ್ರ" ಎಂಬ ಕಾದಂಬರಿಗೆ ಭಾರತದ ಅತ್ಯುನ್ನತ ಪ್ರಶಸ್ತಿ "ಙಾನ ಪೀಠ" ಲಭಿಸಿದೆ.

ಜೀವನ ವಿಶೇಷ: ಇವರು ಲೇಖಕರಾಗಿದ್ದರಲ್ಲದೆ ತಮ್ಮ ಪುಸ್ತಕಗಳನ್ನು ತಾವೇ ಪ್ರಕಟಿಸುತ್ತಿದ್ದರು. ಪುಸ್ತಕಗಳ ಬೆಲೆಯನ್ನು ಅತಿ ಕಡಿಮೆ ಇಡುತ್ತಿದ್ದರು. ಓದುಗರಿಗೆ ತಲುಪುವಂತೆ ಸಹಕರಿಸುತ್ತಿದ್ದರು. ತಮ್ಮ ಜೀವಿತಾನಂತರವು ಕನ್ನಡ ಪುಸ್ತಕಗಳು ಪ್ರಕಟವಾಗಲು ತಾವು ಗಳಿಸಿದ ಹಣದಲ್ಲಿ ಸ್ವಲ್ಪ ಭಾಗವನ್ನು ತೆಗೆದಿರಿಸಿದರು. ಹೀಗೆ ತಮ್ಮ ಜೊತೆಯ ಸಾಹಿತಿಗಳಿಗೆ ನೆರೆವಾಗುವುದು ಬಹಳ ಅಪರೂಪದ ನಡುವಳಿಕೆ.

ದೈವಾಧೀನ: ೯೫ ವರ್ಷಗಳ ಸಾರ್ಥಕ ಜೀವನವನ್ನು ನಡೆಸಿದ ಮಾಸ್ತಿಯವರು ತಾವು ಹುಟ್ಟಿದ ದಿನವೇ ಎಂದರೆ ೦೬ - ೦೬ - ೧೯೮೬ ರಂದು ದೈವಾಧೀನರಾದರು.

ದಾನ ಧರ್ಮವ ಮಾಡಿ ಸುಖಿಯಾಗು ಮನವೆ

2008-12-20T17:18:00.002+05:30

ರಾಗ: ಕೇದಾರಗೌಳ
ತಾಳ: ಅಟ

ದಾನ ಧರ್ಮವ ಮಾಡಿ ಸುಖಿಯಾಗು ಮನವೆ
ಹೀನ ವೃತ್ತಿಯಲಿ ನೇ ಕೆಡಬೇಡ ಮನವೆ

ಎಕ್ಕನಾತಿ ಎಲ್ಲಮ್ಮ ಮಾರಿ ದುರ್ಗಿ ಚೌಡಿಯರ
ಅಕ್ಕರಿಂದಲಿ ಪೂಜೆ ಮಾಡಲೇಕೆ
ಕಿಕ್ಕಿರಿದು ಯಮನ ದೂತರೆಳೆದೊಯ್ವಾಗ
ಶಕೇರು ಬಿಡಿಸಿಕೊಂಡಾರೇನು ಮರುಳೆ |೧|

ಸಂಭ್ರಮದಲೊಂಧ್ಹೊತ್ತು ನೇಮದಲಿದ್ದು
ತುಂಬಿಟ್ಟಿನಾ ದೀಪ ಹೊರಲೇತಕೆ
ಕೊಂಬು ಹೋತ ಕುರಿ ಕೋಣನಾ ಬಲಿಗೊಂಬ
ದೊಂಬಿ ದೈವಗಳ ಭಜಿಸದಿರು ಮನವೆ |೨|

ಚಿಗುರೆಲೆ ಬೇವಿನಸೊಪ್ಪು ನಾರಸೀರೆ
ಬಗೆಬಗೆಯಿಂದ ಶೃಂಗಾರ ಮಾಡಿ
ನೆಗೆನೆಗೆದು ಆಡಲು ಕುಣಿಯಲು ನಿನಗಿನ್ನು
ಮಿಗಿಲಾದ ಮುಕುತಿಯುಂಟೇ ಹುಚ್ಚು ಮನವೆ |೩|

ದಾನ-ಧರ್ಮ ಪರೋಪಕಾರವ ಮಾಡು
ದೀನನಾಗಿ ನೀ ಕೆಡಬೇಡವೋ
ಙಾನವಿಲ್ಲದೆ ಹೀನ ದೈವವ ಭಜಿಸಲು
ಏನುಂಟು ನಿನಗಿನ್ನು ಎಲೆ ಹುಚ್ಚು ಮನವೆ ? |೪|

ನರಲೋಕದಿ ಯಮನ ಬಾಧೆಯ ಕಳೆಯಲು
ವರ ಪುಣ್ಯಕಥೆಗಳ ಕೇಳುತಲಿ
ಸಿರಿಯಾದಿಕೇಶವರಾಯನ ನೆರೆ ನಂಬಿ
ಸ್ಥಿರವಾದ ಪದವಿಯ ಪಡೆ ಹುಚ್ಚು ಮನವೆ |೫|

- ಕನಕದಾಸರು

ವಿ.ಕೃ. ಗೋಕಾಕ

2008-12-20T16:57:00.001+05:30

ಪೂರ್ಣ ನಾಮಧೇಯ: ವಿನಾಯಕ ಕೃಷ್ಣ ಗೋಕಾಕ
ಜನನ: ೦೯ - ೦೮ - ೧೯೦೯

ಜನನ ಸ್ಥಳ: ಧಾರವಾಡ ಜಿಲ್ಲೆಯ ಸವಣೂರು.

ತಂದೆ, ತಾಯಿ: ತಂದೆ ಕೃಷ್ಣರಾಯರು, ತಾಯಿ ಸುಂದರಮ್ಮ. ತಂದೆ ಜ್ಯೋತಿಷ್ಯಾಸ್ತ್ರದ ಪಂಡಿತರು ಮತ್ತು ವೃತ್ತಿಯಲ್ಲಿ ವಕೀಲರು. ಗೋಕಾಕರವರ ತಾತ ಇಂಗ್ಲೀಷ್ನಲ್ಲಿ ಕವಿತೆಗಳನ್ನು ರಚಿಸುತ್ತಿದ್ದರು. ಸಾಹಿತ್ಯರಚನೆ ವಂಶ ಪಾರಂಪರೆಯಾಗಿ ಬಂದದ್ದು ಅಂತ ಹೇಳಬಹುದು.

ವ್ಯಾಸಂಗ: ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣವನ್ನು ಹುಟ್ಟೂರಿನಲ್ಲಿ. ವಿದ್ಯಾರ್ಥಿದೆಸೆಯಿಂದಲೆ ಕೃತಿರಚನೆ ಪ್ರಾರಂಭ. ೧೯೨೯ ರಲ್ಲಿ ಬಿ.ಎ ಪದವಿಯನ್ನು ಮತ್ತು ಮುಂಬಯಿ ವಿಶ್ವವಿದ್ಯಾನಿಲಯದಿಂದ ೧೯೩೧ ರಲ್ಲಿ ಇಂಗ್ಲೀಷಿನಲ್ಲಿ ಎಂ.ಎ ಪದವಿಯನ್ನು ಪಡೆದರು. ಇಂಗ್ಲೇಂಡಿನ ಆಕ್ಸಫರ್ಡ್ ವಿಶ್ವವಿದ್ಯಾನಿಲಯದಿಂದ ಮೊದಲನೆ ದರ್ಜೆಯಲ್ಲಿ ಪದವಿಯನ್ನು ಪಡೆದರು.

ವೃತ್ತಿ ಜೀವನ: ಇಂಗ್ಲೀಷ್ ಅಧ್ಯಾಪಕರಾಗಿ ಆರಂಭಿಸಿದರು. ತದನಂತರ ಉಪಪ್ರಾಧ್ಯಾಪಕರಾಗಿ, ಪ್ರಾಧ್ಯಾಪಕರಾಗಿ, ಪ್ರಿನ್ಸಿಪಾಲರಾಗಿ, ವಿವಿಧ ಹುದ್ದೆಗಳಲ್ಲಿ ಪುಣೆ, ಸಾಂಗ್ಲಿ, ಹೈದರಬಾದ್, ಉತ್ತರ ಗುಜುರಾತಿನ ವೀಸಾನಗರ, ಕೊಲ್ಲಾಪುರ ಮುಂತಾದ ಕಡೆಗಳಲ್ಲಿ ಸೇವೆ ಸಲ್ಲಿಸಿದ್ದಾರೆ. ಸುಮಾರು ೧೯೩೧ ರಿಂದ ೧೯೭೦ ರವರೆಗೆ ನಾಲ್ಕು ದಶಕಗಳ ಕಾಲ ಶಿಕ್ಷಣ ಕ್ಷೇತ್ರದಲ್ಲಿ ಇವರ ಸೇವೆ ಶ್ಲಾಘನೀಯ.

- ಹೈದರಬಾದ್ ಸೆಂಟ್ರಲ್ ಇನ್ಸಿಟ್ಯೂಟ್ ಆಫ್ ಇಂಗ್ಲೀಷ್ ನಿರ್ದೇಶಕರಾಗಿ
- ಬೆಂಗಳೂರು ವಿಶ್ವವಿದ್ಯಾನಿಲಯದ ಉಪಕುಲಪತಿಗಳಾಗಿ
- ಸಿಮ್ಲಾದ ಇನ್ಸಿಟ್ಯೂಟ್ ಆಫ್ ಆಡ್ವಾನ್ಸ್ಡ್ ಸ್ಟಡೀಸ್ ನಿರ್ದೇಶಕರಾಗಿ

ಸಾಹಿತ್ಯ ಕ್ಷೇತ್ರದ ಕೊಡುಗೆ:

ಕೃತಿಗಳು: ೪೦ಕ್ಕೂ ಅಧಿಕ ಕನ್ನಡ (ಮತ್ತು ಇಂಗ್ಲೀಷ್ ಕೂಡ) ಕೃತಿಗಳ ರಚನೆ ಮತ್ತು ಪ್ರಕಟಣೆ. ಇಂಗ್ಲೀಷಿನಲ್ಲಿ "ಡಿ.ಆರ್.ಬೇಂದ್ರೆ ದಿ ಪೊಯಟ್ ಅಂಡ್ ದಿ ಸೀಯರ್" ಹಾಗೆಯೇ ಮಹರ್ಶಿ ಅರವಿಂದರ ಆರಾಧಕರಾಗಿದ್ದ ಗೋಕಾಕರು "ಶ್ರೀ ಅರವಿಂದೋ ಸೀಯರ್ ಅಂಡ್ ಪೊಯೆಟ್" ಎಂಬ ಕೃತಿಗಳನ್ನು ರಚಿಸಿದ್ದಾರೆ.

ಕಾದಂಬರಿ:"ಸಮರಸವೇ ಜೀವನ" ಉತ್ತಮವಾದ ಬೃಹತ್ ಕಾದಂಬರಿ. "ಇಜ್ಜೋಡು" ಎಂದು ಆರಂಭಿಸಿದ ಈ ಕಾದಂಬರಿ ಬೆಳೆದು ದೊಡ್ದದಾಗಿ ಬೃಹತ್ ಕಾದಂಬರಿಯಾಯಿತು.

ಕವನಸಂಕಲನ : ಇವರ ೩೦ ಕವನ ಸಂಕಲನಗಳು ಪ್ರಕಟವಾಗಿವೆ. ಇದರಲ್ಲಿ "ದ್ಯಾವಾಪೃಥಿವೀ", "ಬಾಳ ದೇಗುಲದಲ್ಲಿ" ಬಹು ಪ್ರಖ್ಯಾತವಾಯಿತು.

ಮಹಾಕಾವ್ಯ: ಇವರು ಎರಡು ಭಾಗಗಳಲ್ಲಿ "ಭಾರತ ಸಿಂಧು ರಶ್ಮಿ" ಎಂಬ ಮಹಾಕಾವ್ಯವನ್ನು ರಚಿಸಿದ್ದಾರೆ.

ನಾಟಕಗಳು: ಇವರು "ಜನನಾಯಕ, ಯುಗಾಂತರ, ವಿಮರ್ಶಕ ವೈದ್ಯ, ಮುನಿದ ಮಾರಿ" ಮುಂತಾದ ನಾಟಕಗಳನ್ನು ರಚಿಸಿದ್ದಾರೆ.

ವಿಮರ್ಶೆ: ಇವರು "ಇಂದಿನ ಕಾವ್ಯದ ಗೊತ್ತು ಗುರಿಗಳು, ನವ್ಯತೆ ಹಾಗೂ ಕಾವ್ಯಜೀವನ, ಆಂಗ್ಲ ಸಾಹಿತ್ಯ ನೀಡಿದ ಸ್ಪೂರ್ತಿ, ಸೌಂದರ್ಯ ಸಮೀಕ್ಷೆ" ಮುಂತಾದ ವಿಮರ್ಶೆಗಳನ್ನು ರಚಿಸಿದ್ದಾರೆ.

ವಿದೇಶ ಪ್ರವಾಸಗಳು: ಇವರು ವಿದ್ಯಾಭ್ಯಾಸಕ್ಕಾಗಿ ಇಂಗ್ಲೆಂಡಿಗೆ ಪ್ರವಾಸ ಹೋಗಿದ್ದರು. ನಂತರ ಇವರು ನಾನಾ ಕಾರಣಗಳಿಂದ ಜಪಾನ್, ಅಮೆರಿಕಾ, ಬೆಲ್ಜಿಯಂ, ಇಟಲಿ, ಗ್ರೀಸ್ ದೇಶಗಳಿಗೆ ಪ್ರವಾಸ ಕೈಗೊಂಡಿದ್ದರು.

ಜೀವನ ಚರಿತ್ರೆ: ಅವರ ಅದರ್ಶ ವ್ಯಕ್ತಿ ಗೋಪಾಲಕೃಷ್ಣ ಗೋಖಲೆ ಮತ್ತು ಮೈಸೂರು ಸಂಸ್ಥಾನದ ದೀವಾನರಾಗಿದ್ದ ದಿವಾನ್ ರಂಗಾಚಾರ್ಲು, ಅವರ ಜೀವನದಲ್ಲಿ ಬಂದ ಉದಾತ್ತ ವ್ಯಕ್ತಿಗಳ, ಸಾಹಿತಿಗಳ, ಕಲಾವಿದರ, ಸಮಾಜ ಸೇವಕರ ವ್ಯಕ್ತಿ ಪರಿಚಯಗಳನ್ನು ಒಳಗೊಂಡ ಙ್ನಾಪಕ ಚಿತ್ರಶಾಲೆ ಎಂಬ ಎಂಟು (೮) ಸಂಪುಟಗಳನ್ನು ಪ್ರಕಟಿಸಿದ್ದಾರೆ.

ಪ್ರಶಸ್ತಿಗಳು ಮತ್ತು ಪುರಸ್ಕಾರಗಳು:

೧. ಮಹಾಕಾವ್ಯ "ಭಾರತ ಸಿಂಧು ರಶ್ಮಿ" ಙಾನಪೀಠ ಪ್ರಶಸ್ತಿ.
೨. ಭಾರತ ಸರ್ಕಾರದ "ಪದ್ಮಶ್ರೀ" - ೧೯೬೦
೩. "ದ್ಯಾವಾಪೃಥಿವಿ" - ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ.
೨. ಕರ್ನಾಟಕ ವಿಶ್ವವಿದ್ಯಾನಿಲಯ ಗೌರವ ಡಾಕ್ಟರೇಟ್ - ೧೯೬೭
೩. ಕ್ಯಾಲಿಫೊರ್ನಿಯಾದ ಫೆಸಿಫಿಕ್ ವಿಶ್ವವಿದ್ಯಾನಿಲಯಳು ಗೌರವ ಡಾಕ್ಟರೇಟ್ - ೧೯೬೯
೪. "ಗೌರವ ಸದಸ್ಯತ್ವ" ಕನ್ನಡ ಸಾಹಿತ್ಯ ಪರಿಷತ್ತು.
೫. "ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರು" - ಬಳ್ಳಾರಿ - ೧೯೫೮

ದೈವಾಧೀನ: ಇವರು ೨೮ -೪ - ೧೯೯೨ ರಲ್ಲಿ ದೈವಾಧೀನರಾದರು.

ನೀನೊಲಿದರೆ...!

2008-12-20T15:57:00.000+05:30

ನೀನೊಲಿದರೆ ಕೊರಡು ಕೊನರುವುದಯ್ಯ, ನೀನೊಲಿದರೆ ಬರಡ ಹಯನಹುದಯ್ಯ,
ನೀನೊಲಿದರೆ ವಿಷವೇ ಅಮೃತವಹುದಯ್ಯ,
ನೀನೊಲಿದರೆ ಸಕಲ ಪಡಿಪದಾರ್ಥ ಇದಿರಲಿರ್ಪುವು ಕೂಡಲ ಸಂಗಮದೇವ ||

- ಬಸವಣ್ಣ

ತಾತ್ಪರ್ಯ: ಕೂಡಲ ಸಂಗಮದೇವಾ, ನೀನು ಮೆಚ್ಚಿಕೊಂಡರೆ ಒಣದಾದ ಕಟ್ಟಿಗೆಯ ಕೊರಡು ಚಿಗಿತುಕೊಳ್ಳುವುದಯ್ಯ. ನೀನು ಮೆಚ್ಚಿದರೆ ಬಂಜೆಯಾದ ಗೊಡ್ಡು ಪಶುವು ಕೂಡಾ ಹಾಲು, ಮೊಸರು, ಬೆಣ್ಣೆಗಳನ್ನು ಕೊಡುವ ಹಯನವಾಗುವುದಯ್ಯ. ನೀನು ಮೆಚ್ಚಿದರೆ ವಿಷವೇ ಅಮೃತವಾಗುವುದಯ್ಯ. ನೀನು ಮೆಚ್ಚಿದರೆ ಎಲ್ಲ ಪಡಿ ಪದಾರ್ಥವು ನಮ್ಮ ಎದುರಿನಲ್ಲಿಯೇ ಇರುವವು.

ಙಾನ ಮತ್ತು ಙಾನಿ

2008-12-20T15:55:00.000+05:30

ಙಾನ ಉಳ್ಳವನೊಡಲು | ಭಾನುವಿನಂತಿಹುದು
ಙಾನವಿಲ್ಲದವನ ಬರಿಯೊಡಲು - ಹಾಳೂರ
ಶ್ವಾನನಂತಿಹುದು ಸರ್ವಙ್ ||

- ಸರ್ವಙ್

ತಾತ್ಪರ್ಯ: ಙಾನಿಯಾದವನ ಕಾಂತಿಯು ಸೂರ್ಯನ ಕಾಂತಿಯಂತಿರುತ್ತದೆ. ಙಾನವಿಲ್ಲದವನ ದೇಹ ಹಾಳೂರ ನಾಯಿಯಂತೆ ಲಕ್ಷಣ ರಹಿತವಾಗಿರುತ್ತದೆ. ಙಾನವು ಸರ್ವತ್ರಮಾನ್ಯ. ಙಾನಿಯಾದವನಿಗೆ ಎಲ್ಲೆಡೆ ಗೌರವ ದೊರೆಯುತ್ತದೆ.

ಗುಣಕೆ ಕಾರಣವೊಂದೆ?

2008-12-20T15:37:00.001+05:30

ತೃಣಕೆ ಹಸಿರೆಲ್ಲಿಯದು ? ಬೇರಿನದೆ ? ಮಣ್ಣಿನದೆ ? |
ದಿನಪನದೆ ? ಚಂದ್ರನದೆ ? ನೀರಿನದೆ ? ನಿನದೆ ? ||
ತಣಿತಣಿವ ನಿನ್ನ ಕಣ್ಣಿನ ಪುಣ್ಯವೋ ? ನೋಡು |
ಗುಣಕೆ ಕಾರಣವೊಂದೆ ? - ಮಂಕುತಿಮ್ಮ ||

-ಡಿ.ವಿ.ಜಿ

ತಾತ್ಪರ್ಯ: ಹಸಿರಾಗಿರುವ ಹುಲ್ಲು ನೋಡಲು ಚೆನ್ನ. ಆ ಹಸಿರು ಎಲ್ಲಿಂದ ಬಂತು ? ಅದರ ಸೌಂದರ್ಯ ಎಲ್ಲಿಂದ ಬಂತು ? ಬೇರಿನಿಂದಲೆ ? ಅಥವಾ ಅದಕ್ಕೆ ಸತ್ವವನ್ನು ಒದಗಿಸುವ ಮಣ್ಣಿನಿಂದಲೆ ? ನೀರಿನಿಂದಲೇ ? ಅಥವಾ ಮಣ್ಣಿನಿಂದ ಬಂದ ಸತ್ವ ಮತ್ತು ನೀರನ್ನು ರಸಾಯನಿಕವಾಗಿ ಸಂಯೋಗಗೊಳಿಸುವ ಸೂರ್ಯನಿಂದ ಆಯಿತೋ ? ಅಥವ ಓಷಧಿಗಳಿಗೆ ಒಡೆಯನಾದ ಚಂದ್ರನಿಂದ ಆದದ್ದೆ ? ಅಥವಾ ನಿನ್ನ ಕಣ್ಣೆ ಇದಕ್ಕೆ ಕಾರಣವೊ ? ಹಾಗೂ ಅಲ್ಲ, ನಿನ್ನ ಪುಣ್ಯವಿಶೇಷದಿಂದ ಆ ಹಸಿರು ನಿನಗೆ ಸಂತೋಷವನ್ನು ಕೊಡುತ್ತಿದೆಯೋ ? ಹೀಗೆ ಹಸಿರು ಬಣ್ಣ ಸಂತೋಷಜನಕವಾದ ಗುಣವನ್ನು ಹೊಂದಿದೆಯೆಂದರೆ ಅದಕ್ಕೆ ಒಂದೇ ಕಾರಣವೇ ? ಹೀಗೆ ನಮಗೆ ಸಂತೋಷ ಒದಗಿಸುವ ಗುಣ ವಿಶ್ಲೇಷಣಗೆ ಸಿಕ್ಕದೆ ಹೋಗುತ್ತದೆ.

ಕುಲ ಕುಲ ಕುಲವೆಂದು..ಹೊಡೆದಾಡದಿರಿ!!!

2008-12-14T17:09:00.001+05:30

ತಾಳ: ಆಟ
ರಾಗ: ಪಂತುವರಾಳಿ
ಕುಲ ಕುಲ ಕುಲವೆಂದು ಹೊಡೆದಾಡದಿರಿ ನಿಮ್ಮ
ಕುಲದ ನೆಲೆಯೆನೇದಾರು ಬಲ್ಲಿರಾ

ಹುಟ್ಟದ ಯೋನಿಗಳಿಲ್ಲ, ಮೆಟ್ಟದ ಭೂಮಿಗಳಿಲ್ಲ
ಅಟ್ಟು ಉಣ್ಣದ ವಸ್ತುಗಳಿಲ್ಲ
ಗುಟ್ಟುಕಾಣಿಸೆ ಬಂತು ಹಿರಿದೇನು ಕಿರಿದೇನು
ನೆಟ್ಟನೆ ಸರ್ವಙ್ನನ ನೆನೆ ಕಂಡ್ಯ ಮನುಜ ||೧||

ಜಲವೆ ಸಕಲ ಕುಲಕ್ಕೆ ತಾಯಿಯಲ್ಲವೆ ಆ
ಜಲದ ಕುಲವೇನಾದರು ಬಲ್ಲಿರಾ
ಜಲದ ಬೊಬ್ಬುಳಿಯಂತೆ ಸ್ಥಿರವಲ್ಲ ಈ ದೇಹ
ನೆಲೆಯನರಿತು ನೀ ಹರಿಯ ನೆನೆ ಮನುಜ ||೨||

ಹರಿಯೆ ಸರ್ವೋತ್ತಮ, ಹರಿಯೆ ಸರ್ವೇಶ್ವರ
ಹರಿಮಯವೆಲ್ಲವೆನುತ ತಿಳಿದು
ಸಿರಿಕಾಗಿನೆಲೆಯಾದಿಕೇಶವರಾಯನ
ಚರಣಕಮಲವನು ಕೀರ್ತಿಸುವನೆ ಕುಲಜ ||೩||

- ಕನಕದಾಸರು

ದೇವರು ಇದ್ದಾನೆಯೇ ? ಕಾಣುವುದು ಹೇಗೆ?

2008-12-14T16:59:00.000+05:30

ಹೌದು ಖಂಡಿತವಾಗಿಯೂ ದೇವರು ಇದ್ದಾನೆ. ಅದರಲ್ಲಿ ಸಂಶಯವೇ ಎಲ್ಲ. ಹಗಲು ನಮಗೆ ನಕ್ಷತ್ರಗಳು ಕಾಣುವುದಿಲ್ಲ, ಆದರೆ ನಕ್ಷತ್ರಗಳು ಇಲ್ಲವೇ? ಹಾಲಿನಲ್ಲಿ ಬೆಣ್ಣೆಯಿದೆ ಹಾಗಾದರೆ ಹಾಲನ್ನು ನೋಡಿದರೆ ಬೆಣ್ಣೆ ಕಾಣುವುದೇ? ಬೆಣ್ಣೆ ಕಾಣಬೇಕೆಂದರೆ ಹಾಲನ್ನು ಚೆನ್ನಾಗಿ ಕಡೆಯಬೇಕು. ಕೊಳದಲ್ಲಿ ಮೀನುಗಳಿವೆ, ಮೀನನ್ನು ಹಿಡಿಯಬೇಕೆಂದರೆ ನೀರಿಗೆ ಗಾಳ ಹಾಕಬೇಕು. ತಿಳಿದವರಿಂದ ಮೀನು ಹೀಡಿಯುವ ಪರಿಯನ್ನು ಅರಿತುಕೊಳ್ಳಬೇಕು. ಅನಂತರ ತಾಳ್ಮೆಯಿಂದ ದಡದ ಮೇಲೆ ಕೂಡಬೇಕು. ಗಾಳ ಮುಳುಗುವವರಗೆ ಕಾಯಬೇಕು. ಒಮ್ಮೆ ಅದು ನೀರೊಳಗೆ ಮುಳುಗಿತೆಂದರೆ, ಮೀನು ಹಿಡಿಯಿತೆಂದೇ ಅರ್ಥ. ಆಗ ಅದನ್ನು ಮೇಲೆ ಎಳೆದುಕೊಳ್ಳಬೇಕು.

ದೇವರನ್ನು ಕಾಣುವುದು ಹೀಗೆಯೆ, ಮೊದಲು ನಾವು ಗುರುವನ್ನು ಹುಡುಕಬೇಕು, ಅವರಿಂದ ದೇವರ ರೂಪ, ಗುಣ, ಜಪ, ತಪಗಳನ್ನು ಮತ್ತು ದೇವರನ್ನು ಕಾಣುವ ರೀತಿ ನೀತಿಗಳನ್ನು ಅರಿಯಬೇಕು. ನಮ್ಮ ಮನಸ್ಸೇ ಗಾಳ, ಪ್ರಾಣವೆಂಬುದೇ ಕೊಕ್ಕೆ, ನಾವು ಮಾಡುವ ಧ್ಯಾನ, ಜಪ, ತಪ ಎಲ್ಲವೂ ಕೊಕ್ಕೆಗೆ ಸಿಕ್ಕಿಸಿರುವ ತಿನಿಸು. ಅವಸರ ಪಡದೆ ಶ್ರದ್ಧೆಯಿಂದ ಕಾದರೆ ಮೀನು ಗಾಳವನ್ನು ಕಚ್ಚಿದಂತೆ ದೇವರು ನಮ್ಮನು ಹಿಡಿಯುತ್ತಾನೆ ಅರ್ಥಾತ್ ನಮಗೆ ತನ್ನ ದರುಶನ ನೀಡುತ್ತಾನೆ.

ಡಿ.ವಿ.ಜಿ

2008-12-14T16:33:00.002+05:30

ಪೂರ್ಣ ನಾಮಧೇಯ: ದೇವನಹಳ್ಳಿ ವೆಂಕಟರಮಣಯ್ಯ ಗುಂಡಪ್ಪ

ಜನನ: ೧೭ - ೩ - ೧೮೮೭

ಜನನ ಸ್ಥಳ: ಕೋಲಾರ ಜಿಲ್ಲೆ.

ತಂದೆ, ತಾಯಿ: ತಂದೆ ವೆಂಕಟರಮಣಯ್ಯ, ತಾಯಿ ಅಲಮೇಲು. ತಂದೆ ಶಾಲಾ ಉಪಾಧ್ಯಾಯರಾಗಿದ್ದರು. ಬಡತನದ ಜೀವನ.
ವ್ಯಾಸಂಗ: ಶಾಲೆಯಲ್ಲಿ ಕಲಿತಿದ್ದು ಕಡಿಮೆ. ಜೀವನ ಶಾಲೆಯಲ್ಲಿ ಕಲಿತಿದ್ದು ಅಪಾರ. ಸ್ವಂತ ಪರಿಶ್ರಮದಿಂದ ವಿದ್ವಾಂಸರಾದರು.

ಆಸಕ್ತಿಗಳು: ಇವರಿಗೆ ಸಂಗೀತ ಕ್ಷೇತ್ರದಲ್ಲಿ ಅಪಾರ ಆಸಕ್ತಿ. ಇವರ ಕೃತಿಗಳಲ್ಲಿ ಅನೇಕ ಕವಿತೆಗಳಿಗೆ ರಾಗ, ತಾಳಗಳನ್ನು ಸೂಚಿಸಲಾಗಿದೆ.

ಸೇವೆ ಸಲ್ಲಿಸಿದ ಕ್ಷೇತ್ರಗಳು: ಪತ್ರಿಕಾರಂಗದಲ್ಲಿ ಇವರ ಸೇವೆ ಬಹು ಜನರಿಗೆ ಗೊತ್ತಿಲ್ಲವಿರಬಹುದು. ಇವರು ಕೆಲಸ ಮಾಡಿದ ಕೆಲುವು ಪತ್ರಿಕೆಗಳ ಹೆಸರು ಹೀಗಿವೆ:

೧. ಭಾರತಿ - ದಿನಪತ್ರಿಕೆ
೨. ಕರ್ನಾಟಕ ಜೀವನ
೩. ಅರ್ಥಸಾಧಕ
೪. ಕರ್ನಾಟಕ ರೆವ್ಯು - ಅರೆ ವಾರಪತ್ರಿಕೆ
೫. ಸಾರ್ವಜನಿಕ - ತ್ರೈಮಾಸಿಕ

ಇವರ ಸೇವೆ ಗುರುತಿಸಿ ಕರ್ನಾಟಕ ಪತ್ರಕರ್ತರ ಸಮ್ಮೇಳನದ ಅಧ್ಯಕ್ಷರಾಗಿ (೧೯೨೮ - ಬಾಗಲಕೋಟೆ, ೧೯೪೦-ಮೈಸೂರು) ಆಯ್ಕೆ ಮಾಡಿ ಗೌರವಿಸಿದರು.

ಕನ್ನಡ ಸಾಹಿತ್ಯ ಕ್ಷೇತ್ರದ ಕೊಡುಗೆ:

ಕವಿತೆ ಕಾವ್ಯ: ನಿವೇದನ, ವಸಂತ ಕುಸುಮಾಂಜಲಿ, ಅಂತ:ಪುರ ಗೀತೆಗಳು, ಮಂಕುತಿಮ್ಮನ ಕಗ್ಗ, ಮರಳು ಮುನಿಯನ ಕಗ್ಗ, ಶ್ರೀರಾಮ ಪರೀಕ್ಷಣಂ, ಶ್ರೀಕೃಷ್ಣ ಪರೀಕ್ಷಣಂ, ಶೃಂಗಾರ ಮಂಗಳ, ಸ್ವತಂತ್ರ ಭಾರತ, ಅಭಿನಂದನಸ್ತವ ಇತ್ಯಾದಿ.

ವಿಮರ್ಶೆ: ಜೀವನ ಸೌಂದರ್ಯ ಮತ್ತು ಸಾಹಿತ್ಯ, ಸಾಹಿತ್ಯ ಶಕ್ತಿ, ಸಂಸ್ಕೃತಿ, ಬಾಳಿಗೊಂದು ನಂಬಿಕೆ, ಗೀತಾತಾತ್ಪರ್ಯ ಅಥವಾ ಜೀವನ ಧರ್ಮಯೋಗ, ರಾಜ್ಯಶಾಸ್ತ್ರ.

ಜೀವನ ಚರಿತ್ರೆ: ಅವರ ಅದರ್ಶ ವ್ಯಕ್ತಿ ಗೋಪಾಲಕೃಷ್ಣ ಗೋಖಲೆ ಮತ್ತು ಮೈಸೂರು ಸಂಸ್ಥಾನದ ದೀವಾನರಾಗಿದ್ದ ದಿವಾನ್ ರಂಗಾಚಾರ್ಲು, ಅವರ ಜೀವನದಲ್ಲಿ ಬಂದ ಉದಾತ್ತ ವ್ಯಕ್ತಿಗಳ, ಸಾಹಿತಿಗಳ, ಕಲಾವಿದರ, ಸಮಾಜ ಸೇವಕರ ವ್ಯಕ್ತಿ ಪರಿಚಯಗಳನ್ನು ಒಳಗೊಂಡ ಙ್ನಾಪಕ ಚಿತ್ರಶಾಲೆ ಎಂಬ ಎಂಟು (೮) ಸಂಪುಟಗಳನ್ನು ಪ್ರಕಟಿಸಿದ್ದಾರೆ.

ನಾಟಕ: ವಿದ್ಯಾರಣ್ಯ ವಿಜಯ, ಪರಶುರಾಮ

ಅನುವಾದ: ಉಮರನ ಒಸಗೆ - ಉಮ್ಮರ್ ಖಯ್ಯಾಮ್ ಕವಿಯ ಕೃತಿಯ ಸೊಗಸಾದ ಕನ್ನಡ ಅನುವಾದ.

ಪ್ರಶಸ್ತಿಗಳು ಮತ್ತು ಪುರಸ್ಕಾರಗಳು:

೧. ಗೌರವ ಡಾಕ್ಟರ್‍ಏಟ್ ಮೈಸೂರು ವಿ.ವಿ ೧೯೬೧
೨. ೧೮ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷ ಪದವಿ (ಮಡಿಕೇರಿ)
೩. ಕೇಂದ್ರ ಸಾಹಿತ್ಯ ಅಕಾಡೆಮಿ ಬಹುಮಾನ - ಧರ್ಮಯೋಗ ಕೃತಿ
೪. ಪದ್ಮಭೂಷಣ ೧೯೭೪

ಜೀವನ ವಿಶೇಷ: ಜೀವನದಲ್ಲಿ ಸ್ವಂತಕ್ಕಾಗಿ ಹೆಚ್ಚೇನು ಅಪೇಕ್ಷೆಸದ, ಪ್ರಚಾರಕ್ಕೆ ಇಷ್ಟಪಡದ "ವನಕುಸುಮದಂತೆ", ಋಜುಬಾಳ್ವೆಯನ್ನು ನಡೆಸಿದವರು. ಮುಳುಬಾಗಿಲಿನಲ್ಲಿ ತಮ್ಮ ಹಿರಿಯರು ಸಂಪಾದಿಸಿದ್ದ ಮನೆಯನ್ನು ಸರ್ಕಾರಿ ಶಾಲೆಗೆ ದಾನವಾಗಿ ನೀಡಿದರು. ಇವರ ಸಲಹೆಗಳನ್ನು ಸ್ವೀಕರಿಸುತ್ತಿದ್ದ ದಿವಾನ್ ಸರ್. ಎಂ. ವಿಶ್ವೇಶ್ವರಯ್ಯನವರು ಇವರಿಗೆ ಕಳುಹಿಸಿದ ಚೆಕ್ಕುಗಳು ಬ್ಯಾಂಕಿಗೆ ಹೋಗದೆ ಇವರಲ್ಲಿಯೇ ಉಳಿದಿದ್ದವು. ಕನ್ನಡ ಸಾಹಿತ್ಯ ಪರಿಷತ್ ಕಟ್ಟಿ ಬೆಳೆಸಿದವರು ಡಿ.ವಿ.ಜಿಯವರು. ಪರಷತ್ತಿನ ಉಪಾಧ್ಯಕ್ಷರಾಗಿ ಸೇವೆ ಸಲ್ಲಿಸಿದರು.

ಬೆಂಗಳೂರಿನ ತ್ಯಾಗರಾಜ ಕಾಲೋನಿ (ನ. ರ. ಕಾಲೋನಿ) ಯಲ್ಲಿ ಇರುವು "ಗೋಖಲೆ ಸಾರ್ವಜನಿಕ ಸಂಸ್ಥೆಯನ್ನು ಅರಂಭಿಸಿ ಹಲವು ವರ್ಷಗಳವರೆಗೆ ನಡೆಸಿಕೊಂಡು ಬಂದವರು ಡಿ.ವಿ.ಜಿ.

ಈಗಲು ಬೆಂಗಳೂರಿನ ಬಸವನಗುಡಿ ಕ್ಷೇತ್ರದಲ್ಲಿ ಇವರ ಹೆಸರಿನಲ್ಲಿರುವ "ಡಿ.ವಿ.ಜಿ ರಸ್ತೆ" ಬಹು ಪ್ರಖ್ಯಾತ. ಇದನ್ನು ದಕ್ಷಿಣ ಬೆಂಗಳೂರಿನ ಎಂ.ಜಿ ರಸ್ತೆಯೆಂದೇ ಕರೆಯಲಾಗುತ್ತದೆ. ಇವರ ಪ್ರತಿಮೆಯನ್ನು ಈ ರಸ್ತೆಯಿಂದ ಸ್ವಲ್ಪ ದೂರದಲ್ಲಿ ಇರುವ "ಕಹಳೆ ಬಂಡೆ (ಬ್ಯುಗಲ್ ರ್‍ಯಾಕ್)" ಉದ್ಯಾನವನದಲ್ಲಿ ಕಾಣಬಹುದಾಗಿದೆ.

ದೈವಾಧೀನ: ಇವರು ೮೮ ವರ್ಷಗಳ ಕಾಲ ತುಂಬು ಜೀವನ ನಡೆಸಿ ೭-೧೦-೧೯೭೫ ರಲ್ಲಿ ದೈವಾಧೀನರಾದರು.

ದಯೆ, ಧರ್ಮ

2008-12-14T15:49:00.001+05:30

ದಯೆವಿಲ್ಲದ ಧರ್ಮವದಾವುದಯ್ಯ ?
ದಯವೇ ಬೇಕು ಸಕಲ ಪ್ರಾಣಿಗಳಲ್ಲಿಯೂ, ದಯವೇ ಧರ್ಮದ ಮೂಲವಯ್ಯ.
ಕೂಡಲ ಸಂಗಯ್ಯನಂತಲ್ಲದೊಲ್ಲನಯ್ಯ
- ಬಸವಣ್ಣ

ತಾತ್ಪರ್ಯ: ಅಂತಃಕರಣವಿಲ್ಲದ ಧರ್ಮವು ಯಾವುದಿರುವುದು ? ಎಲ್ಲ ಪ್ರಾಣಿಗಳಲ್ಲಿ ಅಂತಃಕರಣವೇ ಅವಶ್ಯವಿದ್ದುದರಿಂದ ಅದು ಬೇಕೇ ಬೇಕು. ದಯವೆಂಬುದೇ ಧರ್ಮದ ಮೂಲ, ತಳಹದಿಯಾಗಿದೆ. ಹಾಗೆ ದಯೆವಿಲ್ಲದಂತಿದ್ದರೆ ಕೂಡಲ ಸಂಗಮದೇವನು ನಿರಾಕರಿಸುವನು. (ಮೆಚ್ಚಲಾರನು).

ವಿದ್ಯೆ ಮತ್ತು ವಿದ್ಯಾರ್ಥಿ

2008-12-14T15:41:00.000+05:30

ಭಕ್ತಿಯಿಲ್ಲದ ಶಿಷ್ಯ | ಗೊತ್ತಿಕೊಟ್ಟುಪದೇಶ
ಬತ್ತಿದ ಕೆರೆಯ ಬಯಲಲ್ಲಿ - ರಾಜನವ
ಬಿತ್ತಿ ಬೆಳೆದಂತೆ ಸರ್ವಙ್ನ ||
- ಸರ್ವಙ್ನ

ತಾತ್ಪರ್ಯ: "ವಿದ್ಯಾ ದದಾತಿ ವಿನಯಂ" ವಿದ್ಯೆಯನ್ನು ಕಲಿಯುವ ವಿದ್ಯಾರ್ಥಿಯಲ್ಲಿ ನಯ-ವಿನಯ, ಗುರುವಿನಲ್ಲಿ ಭಕ್ತಿ ಮತ್ತು ಕಲಿಯುವುದರಲ್ಲಿ ಶ್ರದ್ಧೆ ಇರಬೇಕು. ಹಾಗಿಲ್ಲದೆ, ಅಹಂಕಾರಿಯಾಗಿದ್ದು, ಗುರುವಿನಲ್ಲಿ ಭಕ್ತಿಯನ್ನು ಹೊಂದಿರದ ಶಿಷ್ಯನಿಗೆ ಬಲವಂತ ಮಾಡಿ ನೀಡಿದ ವಿದ್ಯೆಯು ಬತ್ತಿದ ಕೆರೆಯ ಬಯಲಿನಲ್ಲಿ ರಾಜನ (ಒಂದು ವಿಧವಾದ ಧಾನ್ಯ)ವನ್ನು ಬಿತ್ತಿ ಬೆಳೆದಂತೆ. ಒಣಗಿದ ಕ್ಷೇತ್ರದಲ್ಲಿ ಧಾನ್ಯವು ಹೇಗೆ ಮೊಳೆಯಲಾರದೋ ಹಾಗೆ, ಭಕ್ತಿಯಿಲ್ಲದ ಶಿಷ್ಯನಿಗೆ ನೀಡಿದ ವಿದ್ಯೆ ವ್ಯರ್ಥ.

ಹಬ್ಬಗಳು

2008-12-14T15:29:00.001+05:30

ನಮ್ಮ ಹಬ್ಬ ನಮ್ಮ ಸಂಸ್ಕೃತಿಯನ್ನು ಬಿಂಬುಸುತ್ತವೆ. ಇತ್ತೀಚಿನ ಜಾಗತೀಕರಣದ ಹೆಸರಿನಲ್ಲಿ ನಾವು ನಮ್ಮ ಹಬ್ಬಗಳ ಆಚರಣೆಯನ್ನೇ ಮರೆತಿದ್ದೇವೆ ಅಂತ ಹೇಳುವುದಕ್ಕೆ ನನಗೆ ತುಂಬಾ ಬೇಸರವಾಗುತ್ತದೆ. ನಮ್ಮ ಆಚರಣೆಗಳನ್ನು ನಾವು ಬಿಡುತ್ತಾ ಹೋದರೆ ನಮಗೂ ಮತ್ತು ಪಾಶ್ಚ್ಯಾತ್ಯ ದೇಶದವರಿಗೂ ವ್ಯತ್ಯಾಸವೇ ಇರುವುದಿಲ್ಲ. ವಿದೇಶಿಯರು ನಮ್ಮನ್ನು ಮತ್ತು ನಮ್ಮ ದೇಶವನ್ನು ಹೆಚ್ಚಾಗಿ ಪ್ರೀತಿಸಲು ಮತ್ತು ಗೌರವಿಸಲು ನಮ್ಮ ದೇಶದ ಈ ವೈವಿಧ್ಯತೆಗಳಿಂದ ಕೂಡಿರುವ ನಮ್ಮ ಸಂಸ್ಕೃತಿ ಮತ್ತು ಅದನ್ನು ಬಿಂಬಿಸುವ ಹಬ್ಬಗಳಿಗೋಸ್ಕರ ಮಾತ್ರ ಅನ್ನುವುದು ನೆನಪಿರಲಿ.

ಹಬ್ಬದ ಆಚರಣೆಗಳು ಮೂಢನಂಬಿಕೆಗಳಲ್ಲ ಈ ಹಬ್ಬಗಳು ನಮ್ಮಲ್ಲಿ ಹೊಸ ಶಕ್ತಿ, ಚೈತನ್ಯ, ಸಂಘಟನೆಯ ಮನೋಭಾವ ಮತ್ತು ಹುರುಪು ತುಂಬುವುದರಲ್ಲಿ ಸಂದೇಹವಿಲ್ಲ. ಹಬ್ಬದ ಹಿಂದುರುವ ಕಾರಣ ಮತ್ತು ವಿಧಾನವನ್ನು ತಿಳಿದು ಆಚರಿಸೋಣ. ಇದರಿಂದ ಹಬ್ಬಕ್ಕೆ ಇನ್ನುಷ್ಟು ಮೆರುಗು ತಂದು ಕೊಡುತ್ತದೆ.

ಆದ್ದರಿಂದಲೇ ನಾನು "ಹಬ್ಬಗಳು" ಎಂಬ ಹೊಸ ಅಂಕಣವನ್ನು ಪ್ರಾರಂಭಿಸಿದ್ದೇನೆ, ನಿಮಗೆಲ್ಲಾ ಇದು ಇಷ್ಟ ಮತ್ತು ಉಪಯೋಗವಾಗುತ್ತದೆ ಅಂತ ಭಾವಿಸುರುತ್ತೇನೆ.

- ರವಿದತ್ತ

ಮಕರ ಸಂಕ್ರಾಂತಿ

2008-12-14T15:27:00.000+05:30

ನಮ್ಮ ಭೂಮಿಯಲ್ಲಿ ನಡೆಯುವ ಪ್ರತಿಯೊಂದು ಚಟುವಟಿಕೆಗಳಿಗೆ ಸೂರ್ಯನೇ ಆಧಾರ.ಇಂತಹ ಸೂರ್ಯ ಒಂದು ರಾಶಿಯಿಂದ ಮತ್ತೊಂದು ರಾಶಿಗೆ ಪ್ರವೇಶಿಸುವ ಸಂಧಿ ಕಾಲಕ್ಕೆ "ಸಂಕ್ರ್‍ಆಂತಿ" ಅಥವ "ಸಂಕ್ರಮಣ" ಅಂತ ಕರೆಯುತ್ತಾರೆ. ಮಕರ ಸಂಕ್ರಾಂತಿಯಂದು ಸೂರ್ಯನು ಮಕರ ರಾಶಿಗೆ ಪ್ರವೇಶಿಸುತ್ತಾನೆ. ಇದೇ ಸಮಯ ಉತ್ತರಾಯಣ ಮತ್ತು ದಕ್ಷಿಣಾಯಣ ಪ್ರಾರಂಭದ ದಿನಗಳಾದ್ದರಿಂದ ಇನ್ನು ವಿಶೇಷ ಮಹತ್ವ ಹೊಂದಿದೆ. ಸಂಕ್ರಾಂತಿ ಒಂದು ತರಹದ ಸೂರ್ಯಾರಾಧನೆ.

ಈ ಸಮಯದ ನಂತರ ಇಷ್ಟು ದಿನ ದಕ್ಷಿಣದತ್ತ ಚಲಿಸುತ್ತಿದ್ದ ಸೂರ್ಯ ಇನ್ನು ಮುಂದೆ ಉತ್ತರ ದಿಕ್ಕಿಗೆ ತಿರುಗಿ ಚಲಿಸುತ್ತಾನೆ. ಹೀಗೆ ಸೂರ್ಯ ಪಥ (ದಾರಿ) ಬದಲಾವಣೆಯಿಂದ ನಮ್ಮ ದೇಶದಲ್ಲಿ ಕೊರೆಯುವ ಚಳಿ ಕಡಿಮೆಯಾಗಿ ಬಿಸಿಲಿನ ತಾಪಮನ ಮತ್ತು ಹಗಲು ಹೆಚ್ಚಾಗಲು ಪ್ರಾರಂಭಿಸುತ್ತದೆ.

ಈ ಹಬ್ಬವನ್ನು ಭೋಗಿ ಹಬ್ಬ, ಸಂಕ್ರಮಣ ಮತ್ತು ಕನುಹಬ್ಬ ಎಂದು ನಾನಾ ರೀತಿಯಿಂದ ಕರೆಯುತ್ತಾರೆ. ಇದನ್ನು ಹೆಚ್ಚಾಗಿ ದಕ್ಷಿಣ ಭಾರತದಲ್ಲಿ (ಕರ್ನಾಟಕ, ಆಂಧ್ರ, ತಮಿಳುನಾಡು, ಕೇರಳಗಳಲ್ಲಿ) ವಿವಿಧ ರೀತಿಯಲ್ಲಿ ಆಚರಿಸುತ್ತಾರೆ. ಇದು ಸುಗ್ಗಿಯನ್ನು ಸಾರುವ ಹಬ್ಬ. ದ್ರಾವಿಡ ಸಂಪ್ರದಾಯಸ್ಥರಿಗೆ ಸಂಭ್ರಮದ ಹಬ್ಬ.

ಈದಿನ ವಿವಾಹಿತ ಮತ್ತು ಅವಿವಾಹಿತ ಹೆಣ್ಣು ಮಕ್ಕಳು ಎಳ್ಳು, ಬೆಲ್ಲ, ಸಕ್ಕರೆ ಅಚ್ಚುಗಳು, ಕೊಬ್ಬರಿ, ನೆಲಗಡಲೆ, ಕಬ್ಬು, ಬಾಳೆಹಣ್ಣು, ಇತ್ತ್ಯಾದಿಗಳನ್ನು ಆಪ್ತೇಷ್ಟರಿಗೆ ಕೊಟ್ಟು ಹಬ್ಬದ ಸಂತಸ ಹಂಚಿ ಕೊಳ್ಳುತ್ತಾರೆ.

ಗ್ರಾಮೀಣ ಭಾಗದಲ್ಲಿ ರೈತರು ತಾವು ಬೆಳೆದ ವರ್ಷದ ಮೊದಲ ಬೆಳೆಯನ್ನು ದೇವರಿಗೆ ಅರ್ಪಿಸಿ ತದನಂತರ ಮುಂದಿನ ದಿನಗಳಲ್ಲಿ ತಮಗೆ ಒಳ್ಳೆ ಬೆಳೆ ಬರಲಿ ಅಂತ ದೇವರಲ್ಲಿ ಪ್ರಾರ್ಥಿಸುತ್ತಾರೆ. ತಮ್ಮ ಜಾನುವರುಗಳಿಗೆ (ಹಸು, ಎತ್ತು, ಇತ್ತ್ಯಾದಿ) ಮೈತೊಳೆದು ಸಿಂಗರಿಸಿ ಮೆರೆವಣಿಗೆ ಮಾಡುತ್ತಾರೆ. ಸಂಜೆ ಬೆಂಕಿಯ ಹೊಂಡ (ಹಳ್ಳ) ಮಾಡಿ (ಕಿಚ್ಚು) ತಮ್ಮ ಜಾನುವಾರುಗಳನ್ನು ಹಾಯಿಸುತ್ತಾರೆ.

ಶಾಸ್ತ್ರದ ದೃಷ್ಠಿಯ ಪ್ರಕಾರ ಸಂಕ್ರಾಂತಿಯಂದು ಕಪ್ಪು ಎಳ್ಳಿನೊಂದಿಗೆ ಸ್ನಾನ ಮಾಡಿ, ಬ್ರಾಹ್ಮಣರಿಗೆ ಅಥವ ದೇವಸ್ಥಾನದ ಅರ್ಚಕರಿಗೆ ದಾನ ಕೊಡಬೆಕು. ಸಂಜೆಯ ಹೊತ್ತು ದೇವಸ್ಥಾನಕ್ಕೆ ತೆರೆಳಿ ಎಳ್ಳಿನ ದೀಪ ಹಚ್ಚಬೇಕು. ಎಳ್ಳಿನ ಹಬ್ಬ ಎಂದೆ ಪ್ರಸಿದ್ದವಾಗಿರುವ ಈ ಹಬ್ಬದ ದಿನದಂದು ಎಳ್ಳನ್ನು ನಾನಾ ರೂಪಗಳಲ್ಲಿ ಬಳಸುತ್ತಾರೆ.

ತಂದೆ, ತಾಯಿಗೆ, ಗುರು ಹಿರಿಯರಿಗೆ "ಎಳ್ಳು-ಬೆಲ್ಲವ ಕೊಟ್ಟು ಒಳ್ಳೆ ಮಾತು ಆಡು" ಎಂಬ ವಾಕ್ಯವನ್ನು ಹೇಳುತ್ತಾ ಕೊಟ್ಟು ಆಶಿರ್ವಚನ ಪಡೆಯಬೇಕು. ಮಕರ ಸಂಕ್ರಾತಿಯನ್ನು ಉತ್ತರಾಯಣ ಪುಣ್ಯ ಕಾಲ ಅಂತಲು ಕರೆಯುವುದುಂಟು. ಈ ದಿನದಿಂದ ದಕ್ಷಿಣಾಯಣ ಬರುವವರೆಗೆ ದೇವರ ಕಾರ್ಯಗಳಿಗೆ ಪ್ರಶಸ್ತವಾದದ್ದು.

ಮಕರ ಸಂಕ್ರಾಂತಿಯ ದಿನದಿಂದ ದೇವತೆಗಳಿಗೆ ಹಗಲು ಮತ್ತು ರಾಕ್ಷಸರಿಗೆ ರಾತ್ರಿ ಆಗುವುದೆಂದು ನಮ್ಮ ಪುರ್‍ಆಣಗಳು ಹೇಳುತ್ತವೆ. ಆದ್ದರಿಂದಲೇ ಹಿರಿಯರು "ಎಳ್ಳು ಬೆಲ್ಲ ತಿಂದು ಒಳ್ಳೆ ಮಾತಾಡು" ಏಕೆಂದರೆ ದೇವತೆಗಳು ಸದಾ ಜಾಗೃತರಿರುತ್ತಾರೆ ಅಂತ ಹೇಳುತ್ತಾರೆ.

ಉತ್ತರ ಭಾರತದಲ್ಲಿ ಸಂಕ್ರಾತಿಯನ್ನು ಆಚರಿಸುತ್ತಾರೆ. ಅಲಹಬಾದ್ ನಲ್ಲಿ ಈ ವೇಳೆಗೆ ಸುಪ್ರಸಿದ್ಧವಾದ ಕುಂಭಮೇಳ ನಡೆಯುತ್ತದೆ.

ಕೊನೆಯ ಮಾತು, ನಮ್ಮ ಹಬ್ಬ ನಮ್ಮ ಸಂಸ್ಕೃತಿಯನ್ನು ಬಿಂಬುಸುತ್ತವೆ. ಇತ್ತೀಚಿನ ಜಾಗತೀಕರಣದ ಹೆಸರಿನಲ್ಲಿ ನಾವು ನಮ್ಮ ಹಬ್ಬಗಳ ಆಚರಣೆಯನ್ನೇ ಮರೆತಿದ್ದೇವೆ ಅಂತ ಹೇಳುವುದಕ್ಕೆ ನನಗೆ ತುಂಬಾ ಬೇಸರವಾಗುತ್ತದೆ. ನಮ್ಮ ಆಚರಣೆಗಳನ್ನು ನಾವು ಬಿಡುತ್ತಾ ಹೋದರೆ ನಮಗೂ ಮತ್ತು ಪಾಶ್ಚ್ಯಾತ್ಯ ದೇಶದವರಿಗೂ ವ್ಯತ್ಯಾಸವೇ ಇರುವುದಿಲ್ಲ. ವಿದೇಶಿಯರು ನಮ್ಮನ್ನು ಮತ್ತು ನಮ್ಮ ದೇಶವನ್ನು ಹೆಚ್ಚಾಗಿ ಪ್ರೀತಿಸಲು ಮತ್ತು ಗೌರವಿಸಲು ನಮ್ಮ ದೇಶದ ಈ ವೈವಿಧ್ಯತೆಗಳಿಂದ ಕೂಡಿರುವ ನಮ್ಮ ಸಂಸ್ಕೃತಿ ಮತ್ತು ಅದನ್ನು ಬಿಂಬಿಸುವ ಹಬ್ಬಗಳಿಗೋಸ್ಕರ ಮಾತ್ರ ಅನ್ನುವುದು ನೆನಪಿರಲಿ.

ಹಬ್ಬದ ಆಚರಣೆಗಳು ಮೂಢನಂಬಿಕೆಗಳಲ್ಲ ಈ ಹಬ್ಬಗಳು ನಮ್ಮಲ್ಲಿ ಹೊಸ ಶಕ್ತಿ, ಚೈತನ್ಯ, ಸಂಘಟನೆಯ ಮನೋಭಾವ ಮತ್ತು ಹುರುಪು ತುಂಬುವುದರಲ್ಲಿ ಸಂದೇಹವಿಲ್ಲ. ಹಬ್ಬದ ಹಿಂದುರುವ ಕಾರಣ ಮತ್ತು ವಿಧಾನವನ್ನು ತಿಳಿದು ಆಚರಿಸೋಣ. ಇದರಿಂದ ಹಬ್ಬಕ್ಕೆ ಇನ್ನುಷ್ಟು ಮೆರುಗು ತಂದು ಕೊಡುತ್ತದೆ.

- ರವಿದತ್ತ

ಅಪಾತ್ರ ದಾನ

2008-12-13T18:48:00.000+05:30

ಶ್ವಾನ ತೆಂಗಿನಕಾಯ | ತಾನು ಮೆಲ್ಲ ಬಲ್ಲುದೇ
ಙ್ನಾನವಿಲ್ಲದಗೆ ಉಪದೇಶ - ವಿತ್ತಡೆ
ಹಾನಿ ಕಂಡಯ್ಯ ಸರ್ವಙ್ ||
- ಸರ್ವಙ್

ತಾತ್ಪರ್ಯ: ನಾಯಿಗೆ ತೆಂಗಿನಕಾಯಿ ಬುರುಡೆ ಸಿಕ್ಕಿದರೂ ಅದರ ರುಚಿಯನ್ನು ಪಡೆಯಲು ಅದು ಹೇಗೆ ಅಸಮರ್ಥವಾಗುತ್ತದೆಯೋ ಹಾಗೆಯೇ ಅಙ್ನಾನಿಗೆ ಉಪದೇಶ ನೀಡಿದರೆ, ಅದು ವ್ಯರ್ಥ ಮತ್ತು ನಿರರ್ಥಕ. ಇದನ್ನೆ ಭಗವಾನ್ ಶ್ರ್‍ಈ ಕೃಷ್ಣ ಭಗವತ್ಗೀತೆಯಲ್ಲು ಕೂಡ "ಅಪಾತ್ರರಿಗೆ ದಾನ ಮಾಡಬಾರದು" ಅಂತ ಹೇಳಿದ್ದಾನೆ.

ಅರ್ಥ ವ್ಯರ್ಥ!

2008-12-13T18:44:00.001+05:30

ಪಾಪಿಯಧನ ಪ್ರಾಯಶ್ಚಿತ್ತಕ್ಕಲ್ಲದೆ ಸತ್ಪಾತ್ರಕ್ಕೆ ಸಲ್ಲದಯ್ಯ,
ನಾಯ ಹಾಲು ನಾಯಿಗಲ್ಲದೆ ಪಂಚಾಮೃತಕ್ಕೆ ಸಲ್ಲದಯ್ಯ,
ನಮ್ಮ ಕೂಡಲ ಸಂಗಮನ ಶರಣರಿಗಲ್ಲದೆ ಮಾಡುವ ಅರ್ಥ, ವ್ಯರ್ಥ ಕಂಡಯ್ಯ!!

-ಬಸವಣ್ಣ

ತಾತ್ಪರ್ಯ: ಪಾಪಿಷ್ಠನು ಸಂಗ್ರಹಿಸಿದ ಹಣವು ಪ್ರಾಯಶ್ಚಿತ್ತಕ್ಕಾಗಿಯಲ್ಲದೆ (ಅಪರಾಧ ಮಾಡಿದ ಕರ್ಮಕ್ಕಾಗಿಯಲ್ಲದೆ) ಸತ್ಪಾತ್ರಕ್ಕಾಗಿ ಸಲ್ಲುವುದಿಲ್ಲ, ನಾಯಿಯ ಹಾಲು ನಾಯಿಯ ಮರಿಗಲ್ಲದೆ ಪಂಚಾಮೃತಕ್ಕೆ ಸಲ್ಲುವುದಿಲ್ಲ. ಇದರಂತೆ ಕೂಡಲ ಸಂಗಮದೇವನ ಶರಣರಿಗೆ ಸಲ್ಲಲಾರದ ಹಣವು ನಿಷ್ಪ್ರಯೋಜಕವಾದುದು.

ಹೊನ್ನು, ಹೆಣ್ಣು ಮತ್ತು ಕೀರ್ತಿ

2008-12-13T17:41:00.002+05:30

ಮನುಷ್ಯನ ಜೀವನದಲ್ಲಿ ಈ ಮೂರು ವಸ್ತುಗಳು ಬಹಳ ಅತ್ಯಮೂಲ್ಯ ಪಾತ್ರವಹಿಸುತ್ತದೆ. ಇವುಗಳನ್ನು ಪಡೆಯಲು ಜೀವನದ ಪ್ರತಿಯೊಂದು ಕ್ಷಣವು ಪರಸಾಹಸವನ್ನೆ ಮಾಡುತ್ತೇವೆ. ಆದರೆ ಯಾವ ಮನುಷ್ಯನು ಈ ಮೂರು ವಸ್ತುಗಳನ್ನು ಪಡೆಯಲು ತನ್ನ ಇಡೀ ಜೀವಮಾನವನ್ನು ಪಣಯಿಟ್ಟು ಅದರ ಬೆನ್ನಟ್ಟಿ ಹೋಗುತ್ತಾನೊ, ಕೊನೆಗೆ ಅವನಲ್ಲಿ ಮನುಷ್ಯನಲ್ಲಿ ಇರಬೇಕಾದ ಗುಣಗಳೇ ಇರದೆ ಬದಲಾಗಿ ನಾನು (ಅಹಂ ಎಂಬ ಭಾವ), ನನ್ನ ಹಣ, ನನ್ನ ಕೀರ್ತಿ ಎಂಬ ತತ್ವಗಳು ಮನೆ ಮಾಡಿರುತ್ತವೆ. ಇಷ್ಟೆ ಅಲ್ಲದೆ ಇವನ ಅಂತ್ಯವಾದೊಡನೆ ಇವನ ಹಣ, ವಸ್ತು, ಭೋಗಗಳನ್ನು ಲಪಟಾಯಿಸಲು ಹಿತೈಷಿಗಳ, ಬಂಧುಗಳ, ಕುಟುಂಬದ ರೂಪದಲ್ಲಿರುವ ಶತ್ರುಗಳು. ಇವರ ನಿಜವಾದ ರೂಪ ಬಯಲಾದ ಮೇಲೆ ಇತನಿಗೆ ತಾನು ಮಾಡಿದ ತಪ್ಪಿನ ಅರಿವಾಗಿ ಅಸಹಾಯಕನಾಗಿ ನೊಂದು, ಬೆಂದು ಸಾಯುತ್ತಾನೆ.

ಬಾಲ್ಯದಲ್ಲಿ ಮಾಡಿದ ತಪ್ಪು ಯೌವನದಲ್ಲಿ,
ಯೌವನದಲ್ಲಿ ಮಾಡಿದ ತಪ್ಪು ಮಧ್ಯವಯಸ್ಸಿನಲ್ಲಿ,
ಮಧ್ಯ ವಯಸ್ಸಿನಲ್ಲಿ ಮಾಡಿದ ತಪ್ಪು ಮುಪ್ಪಿನಲ್ಲಿ,
ಮುಪ್ಪಿನಲ್ಲಿ ಮಾಡಿದ ತಪ್ಪು ಸಾಯುವಾಗ ಅರಿವಿಗೆ ಬರುತ್ತದೆ.

ಆದರೆ "ಮೂರ್ಖರಿಗೆ ತಪ್ಪಿನ ಅರಿವೆ ಆಗುವುದಿಲ್ಲ"

ಈ ಮೂರು ವಸ್ತುಗಳ ಬಲೆಗೆ ಬಿದ್ದು ಕೊನೆಗೆ ಪಶ್ಚಾತಾಪ ಪಟ್ಟ ಒಬ್ಬ ಸನ್ಯಾಸಿಯ (ವ್ಯೆರಾಗಿ) ಕಥೆ ನಿಮಗೆ ಹೇಳುತ್ತೇನೆ:

ಒಮ್ಮೆ ಒಬ್ಬ ಸನ್ಯಾಸಿಯು ನದಿ ದಾಟುತ್ತಿರುವಾಗ ಆಕಡೆ ದಂಡೆ ಕೊಚ್ಚಿ ಹೋಗಿರುವುದನ್ನು ಗಮನಿಸಿದ ನಂತರ ಸ್ವಲ್ಪ ದೂರದಲ್ಲಿ ಚಿನ್ನದ ನಾಣ್ಯಗಳಿಂದ ತುಂಬಿದ ಮಡಿಕೆಗಳನ್ನು ನೋಡಿದ. "ಪ್ರಪಂಚವನ್ನು ತಾನು ತ್ಯಜಿಸಿರುವುದರಿಂದ ಇದು ನನಗೆ ಬೇಕಿಲ್ಲ, ಆದರೆ ಇದನ್ನು ಉಪಯೋಗಿಸಿಕೊಂಡು ಒಂದು ದೇವಸ್ಥಾನವನ್ನು ಕಟ್ಟಿದರೆ ಚೆನ್ನಾಗಿ ಇರುತ್ತದೆ" ಯೆಂದು ಯೋಚಿಸಿದ. ಕಟ್ಟಡ ನಿರ್ಮಾಣ ಮಾಡುವವರ ಬಳಿಗೆ ಹೋಗಿ ತಾನು ಕಂಡ ನಿಧಿಯನ್ನು ತೋರಿಸಿ ಅದರಿಂದ ಒಂದು ದೇವಸ್ಥಾನವನ್ನು ಕಟ್ಟಿ ಕೋಡುವಂತೆ ಹೇಳಿದ. ಅವರು ತಮ್ಮಲ್ಲಿಯೇ ಮಾತಾಡಿಕೊಂಡು ಒಬ್ಬ ಸ್ವಾಮೀಜಿಗೆ ಇಷ್ಟೊಂದು ಐಶ್ವರ್ಯ ಯಾಕೆ ಕೊಡಬೇಕು ಅಂತ ಅವನ್ನನು ನೀರಿಗೆ ತಳ್ಳಿ ತಾವೇ ಆ ಚಿನ್ನದ ನಾಣ್ಯಗಳು ತುಂಬಿರುವ ಮಡಿಕೆಗಳನ್ನು ಅಪಹರಿಸಿದರು.

ಮುಳುಗೇ ಹೋಗಿದ್ದ ಆ ಸನ್ಯಾಸಿ ದೇವರ ದಯೆಯಿಂದ ಬದುಕಿ ಉಳಿದು ಒಂದು ಅತಿಂಮ ನಿರ್ಧಾರ ಮಾಡಿಬಿಟ್ಟ "ಏನಾದರು ಸರಿ ಇನ್ನ ಮುಂದೆ ಹಣದ ಸಹವಾಸ ಮತ್ತು ವ್ಯಾಮೋಹ ಬೇಡ". ಹೀಗೆ ನಿರ್ಧರಿಸಿ ಕಾಡಿನಲ್ಲಿ ಅಲೆಯುತ್ತ ಮತ್ತು ಧ್ಯಾನ ಮಾಡುತ್ತಾ ಕಾಲ ಕಳೆಯುತ್ತಿದ್ದನು. ಇವನನ್ನು ನೋಡಲು ಯಾರೆ ಬಂದರೂ "ಅಲ್ಲೆ ನಿಲ್ಲಿ ನಿಮ್ಮಲ್ಲಿ ಹಣ ಇದ್ದರೆ ಹತ್ತಿರಕ್ಕೆ ಬರುವುದಕ್ಕೆ ಮುಂಚೆ ಅದನ್ನು ಅಲ್ಲೆ ಇಟ್ಟು ಬನ್ನಿ" ಅಂತ ಹೇಳಿ ಅಮೇಲೆ ತನ್ನ ಭೇಟಿ ಮಾಡಲು ಅವಕಾಶ ಕೊಡುತಿದ್ದ.

ದಿನಗಳು ಕಳೆದಂತೆ ಒಂದು ಹೆಣ್ಣು ಈ ಸ್ವಾಮೀಜಿಯ ದರ್ಶನಕ್ಕೆ ಬಂದಳು. ಇವಳನ್ನು ನೋಡಿದ ಸ್ವಾಮೀಜಿ ಅಲ್ಲೇ ನಿಲ್ಲು "ಹತ್ತಿರ ಬರಬೇಡ" ಎಂದು ಆದೇಶ ನೀಡಿದನು. ಆಗ ಆಕೆ "ಸ್ವಾಮೀಜಿ ದಿನಾಲು ಬಂದು ಊಟವನ್ನು ಇಲ್ಲಿಟ್ಟು ಹೋರಟು ಹೋಗುತ್ತೀನಿ ಅಷ್ಟೆ" ಎಂದಳು. ಸಮ್ಮತಿ ಸಿಕ್ಕಿತು. ಆದರೆ ದಿನ ದಿನವೂ ಆಕೆ ಸ್ವಲ್ಪ ಸ್ವಲ್ಪ ಹತ್ತಿರವಾಗ ತೊಡಗಿದಳು. ಆಕೆ ಒಳ್ಳೆ ವ್ಯಕ್ತಿ ಎಂಬ ವಿಶ್ವಾಸ ಇತ್ತು ಈ ಸ್ವಾಮಿಗೆ "ಆಕೆ ನಿಜವಾಗಲು ತನ್ನ ಯೋಗ ಕ್ಷೇಮ ನೋಡಿಕೊಳ್ಳೋ ಮನಸ್ಸಿನವಳು ಹಾಗು ನನ್ನಿಂದ ಙ್ನಾನೋದಯ ದೊರಕಿಸಿ ಕೊಳ್ಳಬೇಕು ಅನ್ನೊ ಅಕಾಂಕ್ಷೆ ಆಕೆಯದು" ಎಂದು ಆತ ಆಲೋಚಿಸಿದ.

ಒಂದು ದಿನ ಸ್ವಾಮೀಜಿಯ ಜೊತೆಗಿರಲಿ ಎಂದು ಒಂದು ಬೆಕ್ಕನ್ನು ತಂದಳು. ಆದರೆ ಸ್ವಾಮೀಜಿಗೆ ತರುತ್ತಿದ್ದ ಆಹಾರವನ್ನು ಬೆಕ್ಕು ತಿನ್ನುತ್ತಿಲ್ಲವಾದ್ದರಿಂದ ಆತ ವಿನಂತಿ ಮಾಡಿದ, "ಈ ಬೆಕ್ಕಿಗೆ ದಿನಾ ಸ್ವಲ್ಪ ಹಾಲು ಬೇಕು". ಆಕೆ ಒಂದು ಹಾಲು ಕರೆಯುವ ಹಸುವನ್ನೆ ತಂದಳು. ಆತ ಕೇಳಿದ "ಈ ಹಸುವನ್ನು ನೋಡಿಕೊಳ್ಳುವವರು ಯಾರು?" "ನಾನು ನೋಡಿಕೊಳ್ಳಲೇನು " ಎಂದು ಕೇಳಿದಳು. ಸಮ್ಮತಿಸಿದ.

ಅವಳು ಸ್ವಾಮಿಯನ್ನು ತುಂಬಾ ಚೆನ್ನಾಗಿ ನೋಡಿಕೊಂಡಳು, ಪ್ರಸಂಗವಶಾತ್ ಅವರಿಬ್ಬರು ಜೊತೆಯಿರತೊಡಗಿದರು. ಆ ಹೆಣ್ಣು ಆತನ ಮಗುವಿಗೆ ತಾಯಿಯಾದಳು. ಹೀಗೆ ದಿನಗಳು ಉರುಳಿತು ಒಂದು ದಿನ ಈ ಸ್ವಾಮೀಜಿಗೆ ದೀಕ್ಷೆ ಕೊಟ್ಟ ಮತ್ತೊಬ್ಬ ಸ್ವಾಮಿ ಬಂದು ನೋಡಿ "ಏನಾಯಿತು ನಿನಗೆ ?" ಅಂತ ವಿಚಾರಿಸಿದಾಗ ಸ್ವಾಮೀಜಿ ನಡೆದ ವಿಚಾರಗಳನ್ನು ತಿಳಿಸಿದ. ತದನಂತರ ಮತ್ತೆ ಸ್ವಾಮೀಜಿಗೆ ಮನವರಿಕೆಯಾಗಿ ಈ ಪ್ರಾಪಂಚಿಕ ಬಂಧನಗಳನ್ನು ಬಿಟ್ಟು ಕಾಡಿಗೆ ಹೊರಟು ಹೋದ. ಶ್ರದ್ಧೆಯಿಂದ ಸಾಧನೆಗಳನ್ನು ಮಾಡಿ ಕೆಲವು ಸಿದ್ಧಿಗಳನ್ನು ಪಡೆದ.

ಒಮ್ಮೆ ಹತ್ತಿರದ ಹಳ್ಳಿಯವನು ತಾನು ಕಡು ಬಡವ, ತನ್ನ ಮಕ್ಕಳು ಊಟವಿಲ್ಲದೆ ಬಳಲುತ್ತಿದ್ದಾರೆ ದಯಮಾಡಿ ನನ್ನ ಬಡತನ ನಿವಾರಿಸಿ ಸಹಾಯ ಮಾಡಿ ಎಂದು ಅಂಗಲಾಚಿದ. ಅದಕ್ಕೆ ಈ ಸ್ವಾಮೀಜಿ "ತನಗೆ ಸಿದ್ಧಿಸಿರುವ ಒಂದು ಮಂತ್ರದ ಶಕ್ತಿಯಿಂದ ತನ್ನ ಗಡ್ಡದ ಒಂದು ಕೂದಲನ್ನು ತಗೋ ಇದನ್ನು ನಿನ್ನ ಮನೆಯಲ್ಲಿ ಇಡು, ಬೆಳಿಗ್ಗೆ ಇದನ್ನು ಇಟ್ಟ ಜಾಗದ ತುಂಬ ಹಣ ಇರುತ್ತದೆ, ಇದರಿಂದ ನಿನ್ನ ಕಷ್ಟಗಳನ್ನು ನಿವಾರಿಸಿಕೊಂದು ಆನಂದದಿಂದ ಜೀವನ ಸಾಗಿಸು". ಈ ವಿಷಯವನ್ನು ಯಾರಿಗೂ ಹೇಳಬೇಡ ಅಂತ ಹೇಳಿ ಕಳುಹಿಸಿದ.

ಆ ಹಳ್ಳಿಯವನು ಮನೆಗೆ ಬಂದು ಸಹಜವಾಗಿ ತನ್ನ ಹೆಂಡತಿಗೆ ಮಾತ್ರ ಈ ಗುಟ್ಟನ್ನು ಬಿಟ್ಟುಕೊಟ್ಟ. ಆಕೆ ಬೇರೆ ಅನೇಕರಿಗೆ ತಿಳಿಸಿದಳು. ಸುದ್ದಿ ವಿಸ್ತಾರವಾಗಿ ಹಬ್ಬಿ ಜನ ಸ್ವಾಮೀಜಿಯ ಗಡ್ಡದ ಒಂದು ಕೂದಲಿಗಾಗಿ ಕಿಕ್ಕಿರಿದರು. ಸ್ವಾಮೀಜಿಯ ಮೂಖ ಊದಿಕೊಂಡು ರಕ್ತ ಸೊರಲು ಹತ್ತಿತು. ತದನಂತರ ಹೇಗೊ ಆ ಜಾಗವನ್ನೆ ಬಿಟ್ಟು, ಜನಗಳಿಂದ ತಪ್ಪಿಸಿಕೊಂಡು ತುಂಬ ದೂರ ಹೊರಟು ಹೋದ.

ಇದರಿಂದ ನಾವು ಕಲಿತ ಪಾಠವೆಂದರೆ "ಹೊನ್ನು-ಹೆಣ್ಣು-ಕೀರ್ತಿ ಇವುಗಳ ಬೆನ್ನಟ್ಟುವುದರಿಂದ ಯಾವಾಗಲು ಒಳ್ಳೆಯದಕ್ಕಿಂತ ಕೆಟ್ಟ ಪರಿಣಾಮಗಳೇ ಜಾಸ್ತಿ."

ಆದ್ದರಿಂದ ನಾವಾದರು ಈ ಸ್ವಾಮೀಜಿಯಂತೆ ಅಂತ್ಯದಲ್ಲಿ ಪಾಠ ಕಲಿಯದೆ, ಇನ್ನಾದರು ಪ್ರೀತಿ, ವಿಶ್ವಾಸ, ನಂಬಿಕೆ, ಮನುಷ್ಯತ್ವ, ಸತ್ಯ, ಧರ್ಮ ಎಂಬ ಒಳ್ಳೆಯ ಗುಣಗಳನ್ನು ಅಳವಡಿಸಿ ಜೀವನ ಮಾಡಲು ಪ್ರಯತ್ನ ಪಡೋಣ!!

ಕೊನೆಯ ಮಾತು, ಈ ಮೂರು ವಸ್ತುಗಳು ನಮ್ಮ ಜೀವನಕ್ಕೆ ಅಮೂಲ್ಯ, ಇದಿಲ್ಲದೆ ನಮ್ಮ ಪ್ರಾಪಂಚಿಕ ಜೀವನ ಅಸಾಧ್ಯ, ಇದನ್ನು ಬಿಟ್ಟು ಬದುಕಿ ಅಂತ ಹೇಳುತ್ತಿಲ್ಲ ಆದರೆ ಇವು ನಮ್ಮ ಜೀವನದ ಅತ್ಯುನ್ನತ ವಸ್ತುಗಳಾಗಲು ಬಿಡಬಾರದು. ಇವಗಳು ನಮ್ಮನು ಸವಾರಿ ಮಾಡಬಾರದು.
"ನಮ್ಮಿಂದ ಇವುಗಳೇ ಹೊರತು ಇವುಗಳಿಂದ ನಾವಲ್ಲ" ಅನ್ನುವ ತತ್ವ ನೆನಪಿರಬೇಕು.

"ಅವುಗಳು ನಮ್ಮ ಜೀವನ ನಿರ್ವಹಣೆಗೆ ಬೇಕದ ಸಾಮಗ್ರಿಗಳೆ ಹೊರತು ಅದೇ ನಮ್ಮ ಜೀವನದ ಸಾರ್ಥಕತೆ ಮತ್ತು ಅದನ್ನು ಪಡೆಯಲೆಂದೆ ನಮ್ಮ ಈ ಜನ್ಮ ಅನ್ನುವ ಭಾವ ಬೇಡ."

ಸ್ವರ್ಗ ನರಕ..!

2008-11-30T17:10:00.001+05:30

ದೇವಲೋಕ, ಮರ್ತ್ಯಲೋಕವೆಂಬುದು ಬೇರಿಲ್ಲ, ಕಾಣಿಭೋ
ಸತ್ಯವ ನುಡಿವುದೇ ದೇವಲೋಕ, ಮಿಥ್ಯವ ನುಡಿವುದೇ ಮರ್ತ್ಯಲೋಕ
ಆಚಾರವೇ ಸ್ವರ್ಗ, ಆನಾಚಾರವೆ ನರಕ ಕೂಡಲ ಸಂಗಮದೇವಾ, ನೀವೇ ಪ್ರಮಾಣ
- ಬಸವಣ್ಣ

ತಾತ್ಪರ್ಯ: ದೇವಲೋಕ, ಭೂಲೋಕ ಎಂಬುವುಗಳು ಮತ್ತೆ ಬೇರೆ ಇಲ್ಲ. ಸತ್ಯವ ಮಾತನಾಡುವುದೇ ದೇವಲೋಕ, ಸುಳ್ಳು ಮಾತನಾಡುವುದೇ ಭೂಲೋಕ. ಒಳ್ಳೆ ಆಚಾರವೇ ಸ್ವರ್ಗ (ಸುಖ), ದುರಾಚಾರವೇ ನರಕ (ಕಷ್ಟ) ಕೂಡಲ ಸಂಗಮದೇವಾ ಇದಕ್ಕೆ ನೀವೇ ಪ್ರಮಾಣ.

ಮೂರ್ಖರಿಗೆ ಬುದ್ಧಿಮಾತು...!

2008-11-30T16:56:00.002+05:30

ಮೂರ್ಖಂಗೆ ಬುದ್ಧಿಯನು | ನೂರ್ಕಾಲ ಹೇಳಿದರೆ
ಗೋರ್ಕಲ್ಲುಗಳನು ನೆನೆಯಿಕ್ಕಿ
ಹಾಲೊಳಗೆ ನೂರ್ಕಿಕೊಂಡಂತೆ ಸರ್ವಙ||
- ಸರ್ವಙ

ತಾತ್ಪರ್ಯ: ಮೂರ್ಖರಿಗೆ ಬುದ್ಧಿಯನ್ನು ಎಷ್ಟು ಕಾಲದವರಗೆ ಹೇಳಿದರೂ ಅದು ಉಪಯೋಗಕ್ಕೆ ಬಾರದು. ಕಠಿಣವಾದ ಕಲ್ಲುಗಳನ್ನು ನೀರಿನಲ್ಲಿ ನೆನೆಹಾಕಿ ನಂತರ ಹಾಲಿನೊಂದಿಗೆ ಅರೆಯುವುದರಿಂದ ಆಗುವ ಪ್ರಯೋಜನವೇನು? ಎಷ್ಟು ಕಾಲ ಕಲ್ಲು ನೀರಿನಲ್ಲಿ ಇದ್ದರೂ ನೆನೆದು ಮೃದುವಾಗಬಲ್ಲದೇ?

ಎಲ್ಲವೂ ನೀನೇ..!

2008-11-28T15:50:00.000+05:30

ತಂದೆ ನೀನು,ತಾಯಿ ನೀನು
ಬಂಧು ನೀನು,ಬಳಗ ನೀನು
ನೀನಲ್ಲದೆ ಮತ್ತಾರೂ ಇಲ್ಲಯ್ಯ ಕೂಡಲ ಸಂಗಮದೇವಾ ಹಾಲಲದ್ದು, ನೀರಲ್ಲದ್ದು ||

-ಬಸವಣ್ಣ

ಜಾತಿ-ವಿಜಾತಿ..!

2008-11-28T15:39:00.003+05:30

ಜಾತಿ ಹೀನನ ಮನೆಯ | ಜ್ಯೋತಿ ತಾ ಹೀನವೇ
ಜಾತಿ-ವಿಜಾತಿಯೆನಬೇಡ
ಶಿವನೊಲಿದಾತನೆ ಜಾತ ಸರ್ವಙ ||
-ಸರ್ವಙ

ತಾತ್ಪರ್ಯ: ಜಾತಿ-ವಿಜಾತಿ ಎಂಬ ಭೇಧವೇಕೆ? ಕಡಿಮೆ ಜಾತಿಯವ ಎನಿಸಿದವನ ಮನೆಯ ಜ್ಯೋತಿ ಏನಾದರು ಹೀನವೇ? ಮೇಲ್ಜಾತಿ ಕೀಳು ಜಾತಿ ಎಂದೆನ್ನುವುದು ಬೇಡ. ದೇವರು ಒಲಿದಾತನೇ ಉತ್ತಮ ಕುಲಜನು.

ಗೋವಿಂದಾ ನಮೋ... ಗೋವಿಂದಾ ನಮೋ...!

2008-11-28T15:15:00.000+05:30

ಗೋವಿಂದಾ ನಮೋ ಗೋವಿಂದಾ ನಮೋ ಗೋವಿಂದ ನಾರಾಯಣ
ಗೋವರ್ಧನ ಗಿರಿಯನೆತ್ತಿದ, ಗೋವಿಂದ ನಮ್ಮ ರಕ್ಷಿಸ್ಯೆ ||ಪ||

ಮಂಚ ಬಾರದು, ಮಡದಿ ಬಾರಳು ಕಂಚು ಕನ್ನಡಿ ಬಾರದು
ಸಂಚಿತಾರ್ಥದ ದ್ರವ್ಯ ಬಾರದು ಮುಂಚೆ ಮಾಡಿರೋ ಧರ್ಮವ ||೧||

ಅರ್ಥವ್ಯಾರಿಗೆ, ಪುತ್ರರ್‍ಯಾರಿಗೆ ಮಿತ್ರ ಬಾಂಧವರ್‍ಯಾರಿಗೆ
ಕರ್ತೃ ಯಮನನು ಸೆಳೆದು ಒಯ್ವಾಗ ಅರ್ಥಪುತ್ರರು ಬರುವರೆನೋ ||೨||

ತಂದು ಬಂದರೆ ತನ್ನ ಪುರುಷನ ಹಸಿದು ಬಳಲಿದರೆಂಬಳು
ಒಂದು ದಿವಸ ತಾರದಿದ್ದರೆ ಹಂದಿ ನಾಯಿಯಂತೆ ಕೆಲೆವಳು ||೩||

ಪ್ರಾಣದೊಲ್ಲಭೆ ತನ್ನ ಪುರುಷನ ಕಾಣದೆ ನಿಲ್ಲಲಾರಳು
ಪ್ರಾಣ ಹೋಗಲು ಮುಟ್ಟಲಂಜ್ವಳು ಜಾಣೆ ಕರೆದರೂ ಬಾರಳು ||೪||

ಉಂಟು ಕಾಲಕೆ ನೆಂಟರಿಷ್ಟರು ಬಂಟರಾಗಿ ಕಾಯ್ವರು
ಕಂಟಕೆ ಮನೊರು ಬಂದು ಎಳೆವಾಗ ನೆಂಟರಿಷ್ಟರು ಬಾರರು ||೫||

ಒಡವೆ ಅರಸಿಗೆ ಒಡಲು ಅಗ್ನಿಗೆ ಮಡದಿ ಮತ್ತೊಬ್ಬ ಚೆಲುವಗೆ
ಬಡೆದು ಎಳೆದು ಯಮನು ಒಯ್ವಾಗ ಎಡವಿ ಬಿದ್ದಿತು ನಾಲಿಗೆ ||೬||

ದಿಟ್ಟತನದಲಿ ಪಟ್ಟನಾಳಿದ ವೃಷ್ಣಿ ನಂದನ ಚರಣವ
ಮುಟ್ಟಿ ಭಜಿಸಿರೊ ಸಿರಿ ಪುರಂದರ ವಿಠಲೇಶನ ಪಾದವ ||೭||

ಗೋವಿಂದಾ ನಮೋ ಗೋವಿಂದಾ ನಮೋ ಗೋವಿಂದ ನಾರಾಯಣ
ಗೋವರ್ಧನ ಗಿರಿಯನೆತ್ತಿದ, ಗೋವಿಂದ ನಮ್ಮ ರಕ್ಷಿಸ್ಯೆ ||ಪ||

-ಪುರಂದರ ದಾಸರು

ಭಾಗ್ಯದ ಲಕ್ಷ್ಮಿ ಬಾರಮ್ಮ...!

2008-11-28T15:08:00.003+05:30

ಭಾಗ್ಯದ ಲಕ್ಷ್ಮಿ ಬಾರಮ್ಮ ನಮ್ಮಮ್ಮ ನೀ ಸೌಭಾಗ್ಯದ ಲಕ್ಷ್ಮಿ ಬಾರಮ್ಮ ||ಪ||

ಗೆಜ್ಜೆ ಕಾಲ್ಗಳ ಧ್ವನಿಯ ತೋರುತ,ಹೆಜ್ಜೆಯ ಮೇಲೆ ಹೆಜ್ಜೆಯ ನಿಕ್ಕುತ
ಸಜ್ಜನ ಸಾಧು ಪೂಜೆಯ ವೇಳೆಗೆ,ಮಜ್ಜಿಗೆಯೊಳಗಿನ ಬೆಣ್ಣೆಯಂತೆ ||೧||

ಕನಕ ವೃಷ್ಟಿಯ ಕರೆಯುತ ಬಾರೆ,ಮನಕ ಮನೆಯ ಸಿದ್ದಿಯ ತೋರೆ
ದಿನಕರ ಕೋಟಿ ತೇಜದಿ ಹೊಳೆವ,ಜನಕರಾಯನ ಕುಮಾರಿ ಬಾಮ್ಮ ||೨||

ಅತ್ತಿತ್ತಗಲದೆ ಭಕ್ತರ ಮನೆಯಲಿ,ನಿತ್ಯ ಮಹೋತ್ಸವ ನಿತ್ಯ ಸುಮಂಗಳ
ಸತ್ಯವ ತೋರುವ ಸಾಧು ಸಜ್ಜನರ,ಚಿತ್ತದಿ ಹೊಳೆವ ಪುತ್ಥಳಿ ಬೊಂಬೆ ||೩||

ಸಂಖ್ಯೆಯಿಲ್ಲದ ಭಾಗ್ಯವ ಕೊಟ್ಟು,ಕಂಕಣ ಕ್ಯೆಯ ತಿರುವುತ ಬಾರೆ
ಕುಂಕುಮಾಂಕಿತ ಪಂಕಜಲೋಚನೆ ,ವೆಂಕಟರಮಣನ ಬಿಂಕದ ರಾಣಿ ||೪||

ಸಕ್ಕರೆ ತುಪ್ಪ ಕಾಲುವೆ ಹರಿಸಿ,ಶುಕ್ರವಾರದ ಪೂಜೆಯ ವೇಳೆಗೆ
ಅಕ್ಕರೆಯುಳ್ಳ ಅಳಗಿರಿ ರಂಗನ,ಚೊಕ್ಕ ಪುರಂದರ ವಿಠಲನ ರಾಣಿ ||೫||

ಭಾಗ್ಯದ ಲಕ್ಷ್ಮಿ ಬಾರಮ್ಮ ನಮ್ಮಮ್ಮ ನೀ ಸೌಭಾಗ್ಯದ ಲಕ್ಷ್ಮಿ ಬಾರಮ್ಮ ||ಪ||

- ಪುರಂದರ ದಾಸರು

ಪಾಜಕ

2008-11-27T17:09:00.002+05:30

ಪಾಜಕ ಕ್ಷೇತ್ರ ಅತ್ಯಂತ ಪವಿತ್ರ ಕ್ಷೇತ್ರ. ಕರ್ಮ ಭೂಮಿ ಭಾರತದಲ್ಲಿ ಇದರಂತೆ ಹಿರಿಮೆ ಮತ್ತೆ ಎಲ್ಲೂ ಕಾಣಬರುವುದಿಲ್ಲ. ಪುರಾಣಗಳಲ್ಲಿ ವರ್ಣಿತವಾದ ಪುರಾತನ ಕ್ಷೇತ್ರವಿದು.

ಙಾನಿಗಳಿಗೆ ಙಾನ ಕ್ಷೇತ್ರ, ಸುಮಂಗಲ ಸ್ತ್ರೀಯರಿಗೆ ಸೌಭಾಗ್ಯದ ಮಂಗಲ ಕ್ಷೇತ್ರ,
ನಲಿದಾಡುವ ವಟುವ್ರುಂದಕ್ಕೆ (ಬ್ರಹ್ಮಚಾರಿಗಳಿಗೆ) ಆಕರ್ಷಿಸುವ ಸುಂದರ ಕ್ಷೇತ್ರ,
ಸೌಂದರ್ಯದ ಸವಿ ಸವಿಯುವವರಿಗೆ ಚಿತ್ರ, ವಿಚಿತ್ರಗಳಿಂದ ಕೂಡಿದ ಕ್ಷೇತ್ರ,
ತಪಸ್ವಿಗಳ ಸಾಧನೆಗೆ ದಿವ್ಯ ಕ್ಷೇತ್ರ,
ಜಪ, ತಪ, ಚಿಂತನೆಗಳಿಗೆ ಪ್ರಣವ ಕ್ಷೇತ್ರ,
ಹೀಗೆ ಸಕಲ ಸಾಧನ ಸುಜೀವಿಗಳ ಸಾಧನೆಗೆ ಮೂಲಗೋತ್ರ ಕಾರಣ - ಇದು ನಮ್ಮ ಕುಲ ಗುರು ಕ್ಷೇತ್ರ.

ಪರಶುರಾಮ ಕ್ಷೇತ್ರ:

ಇಪ್ಪತ್ತೊಂದು ಸಲ ಭೂಮಂಡಲದಲ್ಲಿ ದುಷ್ಟ ಕ್ಷತ್ರಿಯರನ್ನು ಕ್ರೋಧಾಗ್ನಿಯಿಂದ ಭಸ್ಮಗೊಳಿಸಿ, ಸಮಸ್ತ ಪ್ರುಥಿವಿಯನ್ನು ಬ್ರಾಹ್ಮರಣರಿಗೆ ದಾನ ಮಾಡಿದ ನಂತರ ಶ್ರೀ ಪರಶುರಾಮ ದೇವರು ಇಲ್ಲಿ ಇರಲು ಬಯಸಲಿಲ್ಲ. ತಾನು ದಾನ ನೀಡಿದ ಸ್ಥಳದಲ್ಲಿ ತಾನೆ ಇರುವುದು ಹೇಗೆ ಸಮಂಜಸ ? ಎಂದು ಆಲೋಚಿಸಿ ಕೂಡಲೇ, ತನ್ನ ಬಾಣವನ್ನು ಪ್ರಯೋಗಿಸಿ ಸಮುದ್ರವನ್ನು ದೂರಸರಿಸಿ, ತನ್ನ ಕ್ಷೇತ್ರವನ್ನು ಸ್ಥಾಪಿಸಿದನು. ಇದೆಲ್ಲಾ ಭಗವಂತನ ಲೀಲೆ, ವಾಸ್ತವಿಕವಾಗಿ ಸಮುದ್ರದಲ್ಲಿ ಅವಿತಿರುವ ದುಷ್ಟ ದ್ಯೆತ್ಯರನ್ನು ನಾಶ ಮಾಡುವ ಉದ್ದೇಶದಿಂದ ಸಮುದ್ರವನ್ನು ಹಿಂದೆ ಕಳುಹಿಸಿದನು. ಹಾಗೆಯೇ ದ್ಯೆತ್ಯರನ್ನು ಸಂಹರಿಸಿದನು. ಹೀಗೆ ಈ ಕ್ಷೇತ್ರವು ಉಗಮವಾಯಿತು (ಕರ್ನಾಟಕದಲ್ಲಿ ಇರುವ ನಮ್ಮ ದಕ್ಷಿಣಕನ್ನಡ ಭಾಗ). ಇದನ್ನು ಹೊರತು ಪಡಿಸಿ ಎಲ್ಲವೂ ಶ್ರೀರಾಮನ ಕ್ಷೇತ್ರವಾದರೆ, ಇದು ಪರಶುರಾಮ ಕ್ಷೇತ್ರ. ಪರಶುರಾಮರೂಪಿ ಪರಮಾತ್ಮನು ತನಗಾಗಿ ಈ ಕ್ಷೇತ್ರವನ್ನು ನಿರ್ಮಿಸಿದನು ಎನ್ನುವುದಕಿಂತ, ಇದು ತನ್ನವರಿಗಾಗಿ ಭಗವಂತ ಕರುಣಿಸಿದ ಪವಿತ್ರ ಕ್ಷೇತ್ರ.

ಪಾಜಕವು ಪರಶುರಾಮ ಸೃಷ್ಟಿಸಿದ ಕ್ಷೇತ್ರಗಳಲ್ಲಿ ಒಂದು ಕ್ಷೇತ್ರ ಮತ್ತು ಪರಶುರಾಮರಿಗೆ ಅತ್ಯಂತ ಪ್ರಿಯವಾದ ಕ್ಷೇತ್ರ.

ಪಾಜಕ ಅಂದರೇನು ?

ಜನನವಿಲ್ಲದ ಜಗತ್ ಪಾಲಕನಿಂದ ಕಲ್ಲಿನ ಮಧ್ಯದಲ್ಲಿ ಹಿಂಗದ ನೀರನ್ನು ಹೊಂದಿದ ಕ್ಷೇತ್ರಕ್ಕೆ ಈ ಹೆಸರು.
ಪಾಜಕ ಪದವನ್ನು ಬಿಡಿಸಿ ತಿಳಿಸಿದ ಅರ್ಥವಿದು.

ಪಾಜಕ ಎಂಬಲ್ಲಿ ’ಪ + ಆಜ + ಕ’ ಎಂದು ಮೂರು ಪದಗಳಿವೆ.

’ಪ’ = ಜಗತ್ ಪಾಲಕನಾದ
’ಆಜ’ = ಜನನವಿಲ್ಲದವನು (ಅರ್ಥಾತ್ ಭಗವಂತ)
’ಕ’ = ನೀರು ಹೊಂದಿರುವುದೆಂದು

ಪರಶುರಾಮನ ತೀರ್ಥಗಳು:

ಇಲ್ಲಿ ಆ ಭಗವಂತನು ಮಾಡಿದ ನಾಲ್ಕು ತೀರ್ಥಗಳು ಕಾಣಸಿಗುತ್ತವೆ.

ಪರಶು ತೀರ್ಥ: ಭೃಗು ಕುಲದಲ್ಲಿ ಜನಿಸಿದ (ಪರಶುರಾಮ) ಪರಮಾತ್ಮನ ಪ್ರಾಧನ ಅಯುಧ ಪರಶು, ಅದರಿಂದ ಉದ್ಭವಿಸಿದ ತೀರ್ಥ ’ಪರಶು ತೀರ್ಥ’. ನಾಲ್ಕೂ ತೀರ್ಥಗಳಲ್ಲಿ ಮೊದಲು ಉದಯಿಸಿದ ತೀರ್ಥ.

ಧನುಸ್ ತೀರ್ಥ: ದಕ್ಷಿಣ ದಿಕ್ಕಿನಲ್ಲಿ ತನ್ನ ಅದ್ಭುತ ಬಿಲ್ಲನ್ನು ಇಡುತ್ತಿದಂತೆ ಉದಯಿಸಿದ ತೀರ್ಥ ’ಧನುಸ್ ತೀರ್ಥ’

ಗದಾ ತೀರ್ಥ: ಪಶ್ಚಿಮದಲ್ಲಿ ತನ್ನ ಗದಾ ಪ್ರಹಾರದಿಂದ ನಿರ್ಮಿಸಿದ ತೀರ್ಥ ’ಗದಾ ತೀರ್ಥ’

ಬಾಣ ತೀರ್ಥ: ಉತ್ತರದಿಕ್ಕಿನ ಭೂತಲದಲ್ಲಿ ಪರಶುರಾಮ ದೇವರು ಅರ್ಧಚಂದ್ರಾಕಾರದ ತನ್ನ ಬಾಣವನ್ನು ಪ್ರಯೋಗಿಸುತಿದ್ದಂತೆ, ಅದು ಗಂಗಾ ನದಿಯನ್ನು ಹೊಂದಿ ಅದರೊಟ್ಟಿಗೆ ಹಿಂತಿರುಗಿ ಬಂದು ಬಾಣ ತೀರ್ಥವೆಂದೆನಿಸಿತು.

ದಕ್ಷಿಣದ ನಂದಗೋಕುಲ:

ಹೌದು. ಪಾಜಕ ಕ್ಷೇತ್ರ ದಕ್ಷಿಣದ ನಂದಗೋಕುಲ. ಪರಬ್ರಹ್ಮ ವಾಸುದೇವನ ಸಾಕ್ಷಾತ್ ಪ್ರತಿಬಿಂಬರಾದ ಶ್ರೀ ವಾಯುದೇವರು ಇಲ್ಲಿ ’ವಾಸುದೇವ’ ಎಂದೇ ಅವತರಿಸಿದರು. ಶ್ರೀ ವಾಯುದೇವರ ಈ ಬಾಲಲೀಲೆಯನ್ನು ಕಣ್ಣಿನಿಂದಲೂ ಅನುಭವಿಸಲು ಅನುವಾಗುವಂತೆ, ಕೆಲವು ಕುರುಹುಗಳು ಇನ್ನೂ ಜೀವಂತವಾಗಿರುವುದು ನಮ್ಮ ಪರಮಭಾಗ್ಯವು.

ತಿಂತ್ರಿಣೀ (ಹುಣಸೆ) ವೃಕ್ಷ:

ಒಮ್ಮೆ ವಾಸುದೇವರು ಆಟದ ನಂತರ ತಮ್ಮ ತಂದೆಯನ್ನು ಭೋಜನಕ್ಕಾಗಿ ಕರೆದರು. ಆದರೆ ಅವರಿಗೆ ಎತ್ತುಗಳನ್ನು ಮಾರಾಟ ಮಾಡಿದ್ದ ಒಬ್ಬ ಧನಿಕನು ಮನೆಯಲ್ಲಿ ಧರಣಿ ಕುಳಿತಿದ್ದನು. ಮಧ್ಯಗೇಹ ಭಟ್ಟರು ತನಗೆ ನೀಡಬೇಕಾದ ಹಣವನ್ನು ಕೊಡದೆ, ’ನಾನು ತಿನ್ನುವುದಿಲ್ಲ ನಿಮ್ಮಗೂ ತಿನ್ನಲು ಬಿಡುವುದಿಲ್ಲ’ ಎಂದು ಧೃಢವಾಗಿ ನುಡಿದಿದ್ದನು.

ಆಗ ವಾಸುದೇವರೂಪಿಯಾದ ವಾಯುದೇವರು ತಾವು ಆಟವಾಡುವ ಹುಣಸೆ ಬೀಜಗಳನ್ನು ತಂದು, ’ಕೊಡಬೇಕಾದ ಹಣದ ಬದಲಿ ನಾನಿದನ್ನು ನೀಡುವೆ’ ಎಂದು ಕೊಟ್ಟರು. ಆಗ ಆ ಧನಿಕನು ಚೆಂದದ ಮುದ್ದಾದ ಮೊಗದ ವಾಸುದೇವರನ್ನು ಕಂಡು ಆನಂದದಿಂದ ಆ ಬೀಜಗಳನ್ನು ಆದರಿಸಿ ತೆಗೆದುಕೊಂಡು ಹೋದನು. ಮನೆಗೆ ತಲುಪಿ ಆ ಬೀಜಗಳನ್ನು ನೋಡಿದಾಗ ಅದು ಬಂಗಾರವಾಗಿತ್ತು. ಸ್ವಲ್ಪ ಸಮಯದ ನಂತರ ಮಧ್ಯಗೇಹ ಭಟ್ಟರು ಹಣ ಹಿಂದಿರುಗಿಸಲು ಹೋದಾಗ, ಆಗ ಧನಿಕನು ತನಗೆ ಬರಬೇಕಾದ ಹಣ ಬಂದಾಯಿತು ಎಂದು ತಿಳಿಸಿದನು.

ಹೀಗೆ ಅದ್ಭುತವಾದ ಈ ಬೀಜಗಳನ್ನು ನೀಡಿದ ಸ್ಥಳದಲ್ಲಿ, ಈ ಸಂಗತಿಯು ನೆನಪಿಸುವಂತೆ ಇರುವ ವೃಕ್ಷವಿದು.

ಹೀಗೆ, ಮುಂತಾದ ಸ್ಥಳಗಳಾದ: ಅಕ್ಷರಾಭ್ಯಾಸ ಶಿಲೆ, ಹಾಲು ಮೊಸರಿಗೆ ಕಲ್ಲಿನ ಮುಚ್ಚಳ, ವಾಸುದೆವ ತೀರ್ಥ, ವಟ ವೃಕ್ಷ, ಮಣಿಮಂತನ ವಧ ಸ್ಥಳ, ಶ್ರೀ ವಾಯುದೇವರ ಬಾಲ್ಯದ ಕುರುಹುಗಳನ್ನು ನೆನಪಿಸುತ್ತವೆ.

ಇಂತ ಪವಿತ್ರ ಕ್ಷೇತ್ರಕ್ಕೆ ನಮ್ಮೆಲ್ಲರ ಜೀವಮಾನದಲ್ಲಿ ಒಮ್ಮೆ ಭೇಟಿ ಕೊಟ್ಟು, ಶ್ರೀಗಳ ಅನುಗ್ರಹಕ್ಕೆ ಪಾತ್ರರಾಗೋಣ.

ಹೋಗೋಣವೇ ???

ತಂದೆ ಮತ್ತು ಗುರು...!

2008-11-27T14:13:00.001+05:30

ತಂದೆಗೂ ಗುರುವಿಗೂ | ಒಂದು ಅಂತರ ಉಂಟು
ತಂದೆ ತೋರುವನು ಶ್ರೀಗುರುವ - ಗುರುರಾಯ ಬಂಧನವ ಕಳೆವ ಸರ್ವಙ ||

-ಸರ್ವಙ

ತಾತ್ಪರ್ಯ: ಮಾನವನ ಬದುಕಿನಲ್ಲಿ ತಾಯಿ-ತಂದೆ-ಗುರು ಈ ಮೂವರು ಬಹು ಮುಖ್ಯ ಪಾತ್ರಗಳು. ತಾಯಿ ಜನ್ಮಧಾತ್ರಿಯಾದರೆ, ತಂದೆ ಪೋಷಕ ಪಾತ್ರವಹಿಸುತ್ತಾರೆ. ಇನ್ನು ಗುರುವಿನ ಪಾತ್ರ ಅತಿ ಮುಖ್ಯವಾದುದು. ತಂದೆ ಮತ್ತು ಗುರುವಿಗೆ ಇರುವ ವ್ಯತ್ಯಾಸವೆಂದರೆ, ತಂದೆಯು ಮಗುವಿಗೆ ವಿದ್ಯಾಭ್ಯಾಸ ಕೊಡಿಸಲು ಗುರುವನ್ನು ಅರಸಿ ಅವನ ಬಳಿ ಬಿಡುತ್ತಾನೆ. ಗುರುವನ್ನು ತೋರಿಸಿದಾತ ತಂದೆಯಾದರೆ, ಗುರುವು ನಮ್ಮ ಬಂಧವನ್ನೆಲ್ಲಾ ಕಳಚಿ ಹಾಕುತ್ತಾನೆ.

ಹೋಲುವಿಕೆ...!

2008-11-27T13:51:00.001+05:30

ಬೀಜದಿಂದ ಹುಟ್ಟಿದ ವೃಕ್ಷವು ಬೀಜವ ಹೋಲುವಂತೆ,
ತಾಯಿಯಿಂದ ಹುಟ್ಟಿದ ಮಕ್ಕಳು ತಾಯಿಯ ಹೋಲುವಂತೆ,
ಧಾನ್ಯಂಗಳಿಂದ ಬೆಳೆದ ಬೆಳೆಸು ಧಾನ್ಯಂಗಳ ಹೋಲುವಂತೆ,
ಗುರುವಿನಿಂದ ಹುಟ್ಟಿದ ಶಿಷ್ಯನು ಗುರು ರೂಪವಲ್ಲದೆ ಬೇರೊಂದು ರೂಪವಲ್ಲವಯ್ಯ ಅಖಂಡೇಶ್ವರಾ!!

-ಬಸವಣ್ಣ

ಮುಳುಗಿದರು...ಮೇಲೀಜುತಿರು!!

2008-10-17T23:31:00.000+05:30

ಮುಳುಗಿದರು; ಜೀವನದ ತೆರೆಯ ಮೇಲೀಜುತಿರು !
ಒಳಿತಾನಗಿಸು, ಕೊಡುತ ಕೊಳುತ ಸಂತಸವ !!
ಕಳವಲಂ ಬಡದೆ , ನಡೆ ಕಡೆಯ ಕರೆ ಬಂದಂದು !
ಮಿಳಿತನಿರು ವಿಶ್ವದಲಿ - ಮಂಕುತಿಮ್ಮ !!

ನಮ್ಮೂರು.. ನಮ್ಮ ರಾಜ್ಯ ...!

2008-10-14T13:51:00.003+05:30

ಕರ್ನಾಟಕ, ದಕ್ಷಿಣ ಭಾರತದಲ್ಲಿರುವ ಒಂದು ರಾಜ್ಯ. ಇದರ ಹಿಂದಿನ ಹೆಸರು ಮೈಸೂರು ಸಂಸ್ಥಾನ.ಸುಮರು ೨೦೦೦ ವರ್ಷಗಳ ಭವ್ಯ ಇತಿಹಾಸವನ್ನು ಹೊಂದಿದೆ.ಕರ್ನಾಟಕದ ರಾಜಧಾನಿ ಬೆಂಗಳೂರು.ಇದಕ್ಕೆ ಬಹಳ ಅನ್ವರ್ಥ ನಾಮಗಳಿವೆ. ಉದಾ: ಉದ್ಯಾನ ನಗರ,ಭಾರತದ ಸಿಲಿಕಾನ್ ಕಣಿವೆ ಇತ್ಯಾದಿ.

ಕರ್ನಾಟಕದ ರಾಜ್ಯ ಭಾಷೆ ಕನ್ನಡ.ಕರ್ನಾಟಕವು,ಪುರಾತನ ಭಾರತದ ಅನೇಕ ಪ್ರಸಿದ್ಧ ರಾಜ ವಂಶಸ್ಥರ ತವರೂರಾಗಿತ್ತು.ಕರ್ನಾಟಕವನ್ನು ಆಳಿದ ಪ್ರಮುಖ ರಾಜ ವಂಶಸ್ಥರೆಂದರೆ,ಕದಂಬರು,ಗಂಗರು,ಚಾಲುಕ್ಯರು,ರಾಷ್ತ್ರಕೂಟರು,ಹೊಯ್ಸಳರು,ವಿಜಯನಗರದ ಅರಸರು,ಬಹಮನಿ ಸುಲ್ತಾನರು,ಬಿಜಪುರ ಸುಲ್ತಾನರು,ಮೈಸೂರು ಅರಸರು.

ಭಾರತದ ಪ್ರಸಿದ್ಢ ಶಾಸ್ತ್ರೀಯ ಸಂಗೀತ ಪ್ರಕಾರಗಳಾದ ಕರ್ನಾಟಕ ಸಂಗೀತ ಮತ್ತು ಹಿಂದುಸ್ತಾನಿ ಸಂಗೀತಕ್ಕೆ ಕರ್ನಾಟಕದ ಕೊಡುಗೆ ಅಪಾರ.ಕನ್ನಡ ಸಾಹಿತ್ಯಕ್ಕೆ, ಭಾರತದಲ್ಲಿ ಅತೀ ಹೆಚ್ಚು ಜ್ಣಾನಪೀಟ ಪ್ರಶಸ್ತಿಗಳನ್ನು ಪಡೆದ ಗೌರವವಿದೆ.

ಕರ್ನಾಟಕದಲ್ಲಿ ಅನೇಕ ಪ್ರಸಿದ್ಧ ಪ್ರೇಕ್ಶಣೀಯ ಸ್ಥಳಗಳಿವೆ.ಅವುಗಳಲ್ಲಿ ಪ್ರಮುಖವೆಂದರೆ,ಹಂಪೆ,ಜೋಗ ಜಲಪಾತ,ಗೋಕರ್ಣ,ಹಳೇಬೀಡು,ಬೇಲೂರು,ಸೋಮನಾಥ ಪುರ,ಬಾದಾಮಿ,ಐಹೊಳೆ,ಬಿಜಾಪುರದ ಗೋಲ್ ಗುಂಬಸ್,ಶ್ರವಣ ಬೆಳಗೊಳ,ಪಶ್ಚಿಮ ಘಟ್ಟದ ಕಾಡುಗಳು,ಮೈಸೂರು,ಇತ್ಯಾದಿ..ನೋಡಲು ನಯನ ಮನೋಹರವಾಗಿದೆ.ಇವೆಲ್ಲವು ಮಾನವ ಮತ್ತು ನಿಸರ್ಗ ನಿರ್ಮಿತ ಅಮೂಲ್ಯ ಆಸ್ತಿಗಳಾಗಿವೆ.

ಬೆಂಗಳೂರು, ಭಾರತದ ಸಿಲಿಕಾನ್ ಕಣಿವೆ(ಸಾಫ಼್ಟ್ ವೇರ್ ಉದ್ಯಮದ ರಾಜಧಾನಿ) ಎಂದು ಪ್ರಖ್ಯಾತವಾಗಿದೆ. ಭಾರತದ ಐಟಿ ಕ್ರಾಂತಿಗೆ ಕಾರಣರಾದ,ಇನ್ಫ಼ೊಸಿಸ್ ಸಂಸ್ಥೆಯ ನಿರ್ಮಾತ್ರುಗಳಾದ ನಾರಯಣ ಮೂರ್ತಿ ನಮ್ಮಕನ್ನಡಿಗರು ಎನ್ನುವುದು ನಮಗೆಲ್ಲಾ ಹೆಮ್ಮೆಯ ವಿಷಯ.ವಿಶ್ವದ ಅನೇಕ ಪ್ರಸಿದ್ಧ ಕಂಪನಿಗಳು,ಬೆಂಗಳೂರಿನಲ್ಲಿ ತಮ್ಮ ಕಛೇರಿಗಳನ್ನು ಹೊಂದಿವೆ. ಕ್ರೀಡಾಕ್ಶೇತ್ರಕ್ಕೆ ಕರ್ನಾಟಕದ ಕೊಡುಗೆ ಅಪಾರ.

ಭಾರತದ ಕ್ರೀಡಾಕ್ಶೇತ್ರಕ್ಕೆ ಕರ್ನಾಟಕದ ಕೊಡುಗೆಯಲ್ಲಿ ಪ್ರಮುಖರೆಂದರೆ ಪ್ರಕಾಶ್ ಪಡುಕೋಣೆ,ಪಂಕಜ್ ಅಡ್ವಾಣಿ,ಅನಿಲ್ ಕುಂಬ್ಳೆ,ರಾಹುಲ್ ದ್ರಾವಿಡ್,ಅಶ್ವಿನಿ ನಾಚಪ್ಪ,ಮುಂತಾದವರು.. !!

ಇಷ್ಟೆಲ್ಲಾ ಪರಂಪರೆ, ಪ್ರಸಿದ್ಧಿ, ಸಂಸ್ಕೃತಿ ಇರುವ ಕರ್ನಾಟಕದಲ್ಲಿ ಜನಿಸಿರುವ ನಾವು ನಿಜಕ್ಕೂ ಧನ್ಯ.. ಧನ್ಯ !!!

"ಹುಟ್ಟಿದರೆ ಕನ್ನಡ ನಾಡಲ್ಲಿ ಹುಟ್ಟಬೇಕು, ಮೆಟ್ಟಿದರೆ ಕನ್ನಡ ಮಣ್ಣನ್ನು ಮೆಟ್ಟಬೇಕು..!!"

ಅಂತ ನಮ್ಮ ಸಂಗೀತ ಬ್ರಹ್ಮ "ಹಂಸಲೇಖ" ರಚಿಸಿರುವ ಮತ್ತು
ನಮ್ಮ ಕನ್ನಡ ಕಂಠೀರವ, ಪದ್ಮಭೂಷಣ, ಗಾನ ಗಂಧರ್ವ, "ಡಾ ರಾಜಕುಮಾರ್" ಹಾಡಿರುವ ಗೀತೆ ನಿಜಕ್ಕೂ ಸತ್ಯ ಮತ್ತು ನಿತ್ಯ ...!

ಕನ್ನಡವೇ ಸತ್ಯ ...ಕನ್ನಡವೇ ನಿತ್ಯ !!!

ತರಲೆಗೊಂದು ಸವಾಲ್ - ಸಂಚಿಕೆ ೧

2008-10-08T20:01:00.002+05:30

ಹುಡಗಿರು ಇಂಟರ್ನೆಟ್ ಅಲ್ಲಿ ಚಾಟ್ (ಮೆಸೆಂಜರ್) ಮಾಡಬೇಕಾದರೆ ಒಮ್ಮಿಂದ ಒಮ್ಮೆಲೇ ಕಾಣೆ ಯಾದರೆ "ಮಾಯಾ ಜಿಂಕೆ" ಅಂತ ಕರಿಬಹುದು.
ಅದೇ ಹುಡಗರು ಆದರೆ ............ಏನಂತ ಕರಿಬಹುದು ???

"ಮಾಯಾ ಮೃಗ"

ತರಲೆಗೊಂದು ಸವಾಲ್

2008-10-08T19:55:00.004+05:30

ನನ್ನ ಬ್ಲಾಗ್ ನ ಓದುಗರ ಮನಸ್ಸಿಗೆ , ಸ್ವಲ್ಪ ನಗೆ ಚಿಮ್ಮಿಸಲು "ತರಲೆಗೊಂದು ಸವಾಲ್" ಎಂಬ ಹೊಸ ವಿಭಾಗವನ್ನು ಸೇರಿಸಲು ಇಚ್ಚಿಸಿದ್ದೇನೆ. ನಿಮಗೆಲ್ಲ ಅದು ನಿಜವಾಗಲು ನಗೆಯ ರಸದೌತಣವನ್ನು ಉಣಿಸುತ್ತದೆ ಎಂದು ಭಾವಿಸುತ್ತೇನೆ.

ಇ ವಿಭಾಗದ ಸಂಚಿಕೆಗಳಲ್ಲಿ ಪ್ರಸ್ತಾಪಿಸುವ ವಿಷಯಗಳು ತಮಾಷೆಗಾಗಿ, ತಮಾಷೆಗೊಸ್ಕರ ಮಾತ್ರ ...!

ಇದರ ಹಿಂದೆ ಯಾರನ್ನು, ಯಾವುದನ್ನು ಹಿಯಾಳಿಸುವ ಉದ್ದೇಶ ಇರುವಿದಿಲ್ಲ. ಹಾಗೆ ಕಂಡು ಬಂದಲ್ಲಿ, ದಯವಿಟ್ಟು ತಿಳಿಸಿ ಅಂತ ವಿಷಯಗಳನ್ನು ಜಾಲದಿಂದ ತತ್ಕ್ಷಣ ತೆಗೆದು ಹಾಕಲಾಗುವುದು.

ಇ ಸಂಚಿಕೆಯಾ ಮೊದಲ ಮತ್ತು ಕೊನೆಯ ಅದ್ಯತೆ

"ಒಂದು ಸಲ ನಕ್ಕು, ನಗಿಸಿ ಮರೆತು ಬಿಡಿ ...!!"

ಉಳ್ಳವರು...!

2008-09-30T16:38:00.001+05:30

ಉಳ್ಳವರು ಶಿವಾಲಯವ ಮಾಡುವರು
ನಾನು ಏನ ಮಾಡಲಿ ಬಡವನಯ್ಯ
ಎನ್ನ ಕಾಲೇ ಕಂಭ, ದೇಹವೇ ದೇಗುಲ
ಶಿರವೇ ಹೊನ್ನ ಕಲಶವಯ್ಯ
ಕೂಡಲ ಸಂಗಮ ದೇವ ಕೇಳಯ್ಯ,
ಸ್ಥಾವರಕ್ಕಳಿವುಂಟು ಜಂಗಮಕ್ಕಿಲ್ಲ ..!

- ಬಸವಣ್ಣ

ಕನ್ನಡದ ಅಮೂಲ್ಯ ರತ್ನಗಳು....

2008-09-27T00:10:00.007+05:30

ಹೀಗೆ ಬೇರೆ ಕನ್ನಡದ ಅಂತರ್ಜಾಲಗಳನ್ನು ವೀಕ್ಷಿಸುತ್ತಿದಾಗ ಸಿಕ್ಕ ಅಪೂರ್ವ, ಅದ್ವಿತೀಯ ಮತ್ತು ಅಪ್ರತಿಮ ಪ್ರತಿಭಾ ರತ್ನಗಳ ಸಮ್ಮಿಲ್ಲನದ ಒಂದು ಸಂತಸದ ಕ್ಷಣ.

ಇಂಥ ಅದ್ಭುತ ಛಾಯಚಿತ್ರಗಳು ನೋಡಲು ಸಿಗುವುದೇ ಅಪರೂಪ, ಸಿಕ್ಕಿದರೆ ನಮ್ಮ ಪೂರ್ವ ಜನ್ಮದ ಸುಕೃತ ಮತ್ತು ಸೌಭಾಗ್ಯ...!

ಇವರು ಮಾಡಿರುವ ಸಾಧನೆಗಳು ಮತ್ತು ನಮ್ಮ ಸಮಾಜಕ್ಕೆ ವಿವಿಧ ರೀತಿಯಲ್ಲಿ ಕೊಟ್ಟಿರುವ ಕೊಡುಗೆಗಳಲ್ಲಿ ಬಹುಶಃ ಅದರ ಅಲ್ಪ ಭಾಗವನ್ನು ನಮ್ಮಿಂದ ಸಾಧಿಸುವುದು ಅಸಾಧ್ಯದ ಮಾತು, ಎನ್ನುವುದು ನನ್ನ ಅನಿಸಿಕೆ. ಅದಕ್ಕೆ ಕೊನೆ ಪಕ್ಷ ನೋಡಿ ಆನಂದ ಪಡೋಣ.

ಛಾಯಚಿತ್ರದ ಕೃಪೆ: ಟಿ. ಎಸ್. ನಾಗರಾಜನ್
ಇಸವಿ: ೧೯೫೫ (1955)
ಹುಡುಕಿ ಕೊಟ್ಟವರು: ಕೆ. ಎಸ್. ರಮೇಶ್ ಭಾರದ್ವಾಜ್
ದೊರೆತ ಜಾಲ: www.thatskannada.com

ಛಾಯಚಿತ್ರ ತೆಗೆದವರಿಗು, ಹುಡುಕಿ ಕೊಟ್ಟವರಿಗು, ಇದನ್ನು ಅಂತರ್ಜಾಲ ವೀಕ್ಷಣೆಗೆ ಅನುವು ಮಾಡಿ ಕೊಟ್ಟವರಿಗು ಎಲ್ಲಕಿಂತ ಮಿಗಿಲಾಗಿ
"ಒಟ್ಟಿಗೆ ಕುಳಿತು ಚಿತ್ರ ತೆಗಿಸಿಕೊಂಡ ಈ ಎಲ್ಲ ಅಮೋಘ ಪ್ರತಿಭೆಗಳಿಗೆ"

ನನ್ನ ಅನಂತಾನಂತ ಧನ್ಯವಾದಗಳು....!

ಮಾನವನ ತಿಳುವಳಿಕೆ

2008-09-26T02:06:00.006+05:30

ಮಾನವ ಜೀವಿಯಾದವನು ಸಾಕಷ್ಟು ತಿಳಿದಿರುತ್ತಾನೆ. ಎಲ್ಲ ಬುದ್ಧಿ ಜೀವಿಗಳ ಸಮಸ್ಯೆಯೂ ಇದೆ. ತಮ್ಮ ತಿಳುವಳಿಕೆ ಬಗ್ಗೆ ಅತಿಯಾದ ಅಭಿಮಾನ ಪಡುತ್ತಾರೆ. ಆದರೆ ಆ ತಿಳುವಳಿಕೆಯನ್ನು ದೈನಂದಿನ ಜೀವನದಲ್ಲಿ ಅನುಸರಣೆಗೆ ತರುವ ಅಗತ್ಯವಿದೆ.

ಹೀಗಾಗದೇ ಹೋದಲ್ಲಿ, ಙಾನವು ಕೇವಲ ತಿಳಿಯುವಿಕೆಯ ಸೀಮೆಯೊಳಗಡೆಯೇ ಸೀಮಿತವಾಗಿ ಉಳಿದುಬಿಡುತ್ತದೆ. ಯಾವುದನ್ನು ಮಾಡಬೇಕು ಹಾಗು ಏನನ್ನು ಮಾಡಬಾರದು ಎಂಬುದನ್ನು ನಾವೆಲ್ಲಾ ತಿಳಿದಿದ್ದೇವೆ, ಆದರೆ ಹಾಗೆ ಬದುಕುವುದು ತುಂಬಾ ಕಷ್ಟ.

"ನಿಜವಾದ ಙಾನ ಗೋಚರವಾಗುವುದು ತಿಳಿಯುವುದರಲ್ಲಿ ಅಲ್ಲ, ನಿಜಕ್ಕೂ ಆ ರೀತಿ ನಡೆಯುವುದರಲ್ಲಿ."

ಅಹಂಕಾರವೆಂಬ ಅಂಧಕಾರ...!

2008-09-25T01:23:00.006+05:30

ಪ್ರತಿಯೊಬ್ಬ ಮನುಷ್ಯನಿಗು ಅಹಂಕಾರ ಎನ್ನುವುದು ಒಂದಲ್ಲ ಒಂದು ರೀತಿಯಲ್ಲಿ ಇದ್ದೆ ಇರುತ್ತದೆ. ಕೆಲವರು ಅದನ್ನು ಕ್ಷಣದಲ್ಲಿ ಪ್ರದರ್ಶಿಸುತ್ತಾರೆ ಇನ್ನು ಕೆಲವರ ಬಗ್ಗೆ ಸ್ವಲ್ಪ ಸಮಯದ ನಂತರ ತೊರಲ್ಪಡುತ್ತದೆ.

ವಿಪರ್ಯಾಸ ಎಂದರೆ, ಅಹಂಕಾರವೆಂಬುದು ನಮ್ಮ ಸುಗಮವಾದ ಜೀವನಕ್ಕೆ ಒಂದು ದೊಡ್ಡ ಮುಳ್ಳು ಇದ್ದಂತೆ. ಅದನ್ನು ನಾವು ಬುಡದ ಸಮೇತ ಕಿತ್ತು ಬಿಸಾಡುವ ತನಕ ನಮ್ಮ ಏಳಿಗೆ ಅಸಾಧ್ಯ ಮತ್ತು ನಮ್ಮ ಜೀವನ ಅಪೂರ್ಣ.

ನಿಜವಾಗಿಯು ಹೇಳಬೇಕೆಂದರೆ, ಅಹಂಕಾರವು ಙ್ನಾನರ್ಥಿ ಹಾಗೂ ಙ್ನಾನ ಮಾರ್ಗಗಳ ನಡುವೆ ತೆರೆಯೆಳೆಯುತ್ತದೆ. ನಮ್ಮಲ್ಲಿರುವ ಕಲಿಕಾ ಗುಣವನ್ನು ಕಿತ್ತು ಕೊಳ್ಳುತ್ತದೆ. ಒಮ್ಮೆ ನಾವು ಕಲಿಯುವುದನ್ನು ಬಿಟ್ಟರೆ ಙ್ನಾನರ್ಜನೆ ತಾನಗಿಯೆ ನಿಂತುಕೊಳ್ಳುತ್ತದೆ. ಯಾವುದೇ ವ್ಯಕ್ತಿಯು ಅಹಂಕಾರಿಯಾದಗ ಆತ ತನ್ನನು ತಾನೆ ಒಂಟಿಯಾಗಿಸಿಕೊಳ್ಳುತ್ತಾನೆ. ಇದರಿಂದ ತಂದೆ, ತಾಯಿ, ಗುರು, ಹಿರಿಯರು, ಸ್ನೇಹಿತರು, ಬಂಧು ಬಾಂಧವರು ಎಲ್ಲರಿಂದ ದೂರ ತಳ್ಳಲ್ಪಟ್ಟು, ಪರಸ್ಪರ ತಾನೆ ಸಮಾಜದಿಂದ ದೂರವಾಗುತ್ತಾನೆ.

"ನಾವು ನೆಲ ನೋಡದೇ, ಆಕಾಶ ನೋಡಿಕೊಂಡು ನಡೆದರೆ ಎಡವಿ ಬೀಳುತ್ತೇವೆ". ಹಾಗಾಗಿ ನಮ್ಮ ಹಿರಿಯರು ಅಗಾಗ ಹೇಳುತ್ತಲೇ ಇರುತ್ತಾರೆ: "ನೆಲ ನೋಡಿ ನಡಿ ಆಕಾಶದಲ್ಲಿ ಹಾರಡಬೇಡ" ಎಂದು.

ನಾವು ಎಷ್ಟೇ ಉನ್ನತ ಮಟ್ಟಕ್ಕೆ ಬೆಳೆದರು, ನಾವು ಬಂದ ಹಾದಿಯನ್ನು, ಅನುಭವಿಸಿದ ಕಷ್ಟಗಳನ್ನು, ಪಟ್ಟ ಶ್ರಮಗಳನ್ನು ಮನನ ಮಾಡಿಕೊಳ್ಳುತ್ತಿರಬೇಕು ಆಗ ಸ್ವಲ್ಪ ಮಟ್ಟಿಗಾದರು ನಮ್ಮಲ್ಲಿರುವ ಅಹಂಭಾವನೆಯನ್ನು ತಗ್ಗಿಸಬಹುದು.

ಪ್ರಙ್ನಾಸ್ಥಿತಿಯೆಂಬ ಸಾಗರದಲ್ಲಿನ ಅಹಂ ಹುಟ್ಟುಡಗಿ ಹೋಗಿರುವ ಬಗ್ಗೆ ಸ್ಪಷ್ಟಪಡಿಸಿಕೊಳ್ಳಿ.ಹೃದಯದ ಒಳಗಿನ ಕತ್ತಲೆಯ ಕೊಣೆಯಲ್ಲಿ ಅದು ಎಲ್ಲಾದರು ಅಡಗಿ ಕುಳಿತಿಲ್ಲ ಎಂಬುದನ್ನು ಖಾತ್ರಿಪಡಿಸಿಕೊಳ್ಳಿ.

"ಅಹಂವಿನ ದಾರಿಗಳು ಹಲವಾರು, ರೂಪಗಳು ಅಸಂಖ್ಯಾತ" ಆದರೆ
"ವಿನಯ ಮತ್ತು ವಿಧೇಯಕ ಭಾವನೆಗಳಿಂದ ಎಲ್ಲಾ ಅಹಂ ದಾರಿಗಳನ್ನು ಮತ್ತು ರೂಪಗಳನ್ನು ಸಂಪೂರ್ಣವಾಗಿ ನಾಶಪಡಿಸಬಹುದು".

"ಇಂದಿನ ದಿನವೇ ಶುಭ ದಿನ, ಇಂದಿನ ಗಳಿಘೇ ಶುಭ ಗಳಿಘೇ." ಹಾಗಿದ್ದರೆ ನಾವೆಲ್ಲ, ಇಂದಿನಿಂದ ಅಹಂ ಭಾವನೆಯನ್ನು ಬಿಟ್ಟು ಸರಳವಾಗಿ ಬದುಕಲು ಒಂದು ಪ್ರಾಮಾಣಿಕ ಪ್ರಯತ್ನ ಮಾಡೋಣವೇ?

ಬನ್ನಿ ನಾವೆಲ್ಲರೂ, "ಅಹಂ ಎನ್ನುವ ಅಂಧಕಾರದಿಂದ (ಕತ್ತಲಿನಿಂದ) ಹೊರಬಂದು, ಬೆಳಕಿನ ಕಡೆಗೆ ಸಾಗೋಣ...!"

ಗುಣಗಳು, ಮೌಲ್ಯಗಳು ಮತ್ತು ಮಹಾಭಾರತ

2008-09-24T01:27:00.005+05:30

ಮನುಷ್ಯನಿಗೆ ಒಳ್ಳೆಯ ಗುಣಗಳು ಮತ್ತು ಮೌಲ್ಯಗಳಿರಬೇಕು ಎಂದು ನಮ್ಮ ಹಿಂದೂ ಶಾಸ್ತ್ರ ಮತ್ತು ಪುರಾಣಗಳಲ್ಲಿ ಹೇಳಿವೆ ಮತ್ತು ಆ ಗುಣಗಳು ಮತ್ತು ಮೌಲ್ಯಗಳನ್ನು ಮಹಭಾರತದ ಮೂಲಕ ನಮಗೆ ತಿಳಿಯಲು ಒಳ್ಳೆ ಅವಕಾಶವು ಇದೆ.

ಒಬ್ಬ ಮನುಷ್ಯನಿಗೆ ಇರಬೇಕಾದ ೧೬ ಗುಣಗಳು.

೧. ಧರ್ಮ ೨. ಭಕ್ತಿ ೩. ಙ್ನಾನ ೪. ವೈರಾಗ್ಯ ೫. ಪ್ರಙ್ನಾ ೬. ಮೇಧಾ ೭. ಧೃತಿ ೮. ಸ್ಥಿತಿ
೯. ಯೋಗ ೧೦. ಪ್ರಾಣ ೧೧. ಬಲ ೧೨. ಶ್ರವಣ ೧೩. ಮನನ ೧೪. ನಿದಿಧ್ಯಾಸನ ೧೫. ಶೀಲ ೧೬. ವಿನಯ

೧೮ ಮೌಲ್ಯಗಳು:

ಮೇಲೆ ತಿಳಿಸಿರುವ ೧೬ ಗುಣಗಳು ಮತ್ತು

೧೭. ವೇದವಿದ್ಯೆ ಮತ್ತು ಅದರ ಮೂಲಕ
೧೮. ವೇದವೇದ್ಯನಾದ ಭಗವಂತ

ಈ ೧೮ ಮೌಲ್ಯಗಳನ್ನು ಮಹಾಭಾರತದ ೭ ಪಾತ್ರಗಳು ಪ್ರತಿನಿಧಿಸುತ್ತವೆ.

೧. ಧರ್ಮರಾಜ - ಧರ್ಮ
೨. ಭೀಮಸೇನ - ಭಕ್ತಿ, ಙ್ನಾನ, ವೈರಾಗ್ಯ, ಪ್ರಙ್ನಾ, ಮೇಧಾ, ಧೃತಿ, ಸ್ಥಿತಿ, ಯೋಗ, ಪ್ರಾಣ ಮತ್ತು ಬಲ.
೩. ಅರ್ಜುನ - ಶ್ರವಣ, ಮನನ ಮತ್ತು ಧ್ಯಾನ
೪.೫. ನಕುಲ-ಸಹದೇವ - ಶೀಲ ಮತ್ತು ವಿನಯ
೬. ದ್ರೌಪದಿ - ವೇದವಿದ್ಯೆ
೭. ಶ್ರೀಕೃಷ್ಣ - ವೇದವೇದ್ಯ

ಹೀಗೆ ಮಹಾಭಾರತದ ಪ್ರತಿಯೊಂದು ಶ್ಲೋಕ, ಪ್ರತಿಯೊಂದು ಪದ, ಪ್ರತಿಯೊಂದು ಅಕ್ಶರ ಎಲ್ಲಕಿಂತ ಎತ್ತರದಲ್ಲಿರುವ ೧೮ನೆಯವನಾದ ಭಗವಂತನನ್ನು ಅಂದರೆ ಸಾಕ್ಷಾತ್ ಶ್ರೀಕೃಷ್ಣನನ್ನು ಸಾರುತ್ತದೆ.

ವಿಷ್ಣುಸಹಸ್ರನಾಮ ವೈಶಿಷ್ಟ್ಯ

2008-09-24T00:57:00.005+05:30

ಆಚಾರ್ಯಮಧ್ವರು ಈ ಅಪೂರ್ವವಾದ ಸ್ತೋತ್ರದ ವೈಶಿಷ್ಟ್ಯಕ್ಕೆ ನಾಲಕ್ಕು ಕಾರಣಗಳನ್ನು ಬೆಳಕಿಗೆ ತಂದರು

೧. ವಿಷ್ಣುಸಹಸ್ರನಾಮ ಸ್ತೋತ್ರ ಸರ್ವಶಾಸ್ತ್ರಗಳ ಸಾರ
೨. ಒಂದೊಂದು ನಾಮಕ್ಕು ನೂರು ಅರ್ಥಗಳು
೩. ಭಗವಂತನ ಸಾವಿರರೂಪಗಳ ನಾಮ
೪. ಸಾವಿರ ನಾಮಗಳು ಬ್ರುಹತೀಸಹಸ್ರದ ಸಾರ.

ಈ ಸ್ತೋತ್ರವನ್ನು ಭಕ್ತಿಯಿಂದ ಪಠಿಸಿದಾಗ ಈ ನಾಮಗಳ ನಾದತರಂಗದಿಂದ ರೋಗ ಪರಿಹಾರವಾಗುತ್ತದೆ ಎಂಬುದಕ್ಕೆ ಹಲವಾರು ಘಟನೆಗಳುಂಟು.

"ರೋಗಾರ್ತೋ ಮುಚ್ಯತೇ ರೋಗಾತ್...."

ವಿಷ್ಣುವಿನ ಸಹಸ್ರನಾಮಸ್ತೋತ್ರಗಳೆ ಹಲವಾರು ಪುರಾಣಗಳಲ್ಲಿ ಬಂದಿವೆ. ಆದರೆ ಅವೆಲ್ಲವುಗಳಕಿಂತ ಹೆಚ್ಚು ಪ್ರಸಿದ್ಧವಾದದ್ದು, ಸರ್ವರ ಮನ್ನಣೆಗೆ ಪಾತ್ರವಾದದ್ದು ಮಹಾಭಾರತದಲ್ಲಿ ಬಂದ ವಿಷ್ಣುವಿನಸಹಸ್ರನಾಮಸ್ತೋತ್ರ

ಇದಕ್ಕೆ ಆಚಾರ್ಯಶಂಕರರದ್ದೆನ್ನಲಾದ ಭಾಷ್ಯವೊಂದು ಉಪಲಬ್ಧವಿದೆ. ಅದು ಶಂಕರರದ್ದೆ ಹೌದೇ ಅಲ್ಲವೆ ಎನ್ನುವಲ್ಲಿ ವಿಮರ್ಶಕರಲ್ಲಿ ಅಭಿಪ್ರಾಯ ಭೇದವಿದೆ.

ವಿಷ್ಣುವಿನಸಹಸ್ರನಾಮಸ್ತೋತ್ರ ಆಧ್ಯಾತ್ಮಿಕ ಮಹತ್ವವನ್ನು ಮೊದಲು ಬೆಳಕಿಗೆ ತಂದವರೇ ಆಚಾರ್ಯಮಧ್ವರು. ಮಾಧ್ವಪರಂಪರೆಯಲ್ಲಿ ವಿಷ್ಣುವಿನಸಹಸ್ರನಾಮಸ್ತೋತ್ರಕ್ಕೆ ಮೊದಲು ವ್ಯಾಖ್ಯಾನ ಬರೆದವರು ಶ್ರೀವಾದಿರಾಜರು.

ಕಳಬೇಡ ಕೊಲಬೇಡ

2008-09-18T16:53:00.003+05:30

ಕಳಬೇಡ ಕೊಲಬೇಡ, ಹುಸಿಯ ನುಡಿಯಲುಬೇಡ
ಮುನಿಯಬೇಡ, ಅನ್ಯರಿಗೆ ಅಸಹ್ಯ ಪಡಬೇಡ
ತನ್ನ ಬಣ್ಣಿಸಬೇಡ, ಇದಿರ ಹಳಿಯಲುಬೇಡ
ಇದೇ ಅಂತರಂಗ ಶುದ್ಧಿ, ಇದೇ ಬಹಿರಂಗ ಶುದ್ಧಿ
ಇದೇ ನಮ್ಮ ಕೂಡಲಸಂಗಮನೊಲಿಸುವ ಪರಿ
-ಬಸವಣ್ಣ

ಕನ್ನಡಕ್ಕೆ ಶಾಸ್ತ್ರೀಯ ಸ್ಥಾನಮಾನ ?

2008-09-08T18:21:00.004+05:30

ನಮ್ಮ ಸಂಸ್ಕೃತಿ, ಪರಂಪರೆ ನಿಜವಾಗಲು ಅಗಾಧ. ಕನ್ನಡ ಸಾಹಿತ್ಯ ಲೋಕಕ್ಕೆ ಸಂಧಿರುವ ಗೌರವಗಳು ಅಪಾರ. ಒಂದು ಮಾಹಿತಿಯ ಪ್ರಕಾರ ನಮ್ಮ ನಾಡಿಗೆ ಬಂದಿರುವ ಙ್ನಾನಪೀಠ ಪ್ರಶಸ್ತಿಗಳು ಬಹುಶಃ ಭಾರತದ ಬೇರೆ ಯಾವುದೇ ಭಾಷೆಗೆ ಬಂದಿಲ್ಲ. ಇವೆಲ್ಲ ನಿಜಕ್ಕು ನಮಗೆ ಹೆಮ್ಮೆ ತರುವ ವಿಷಯಗಳು.

ಪ್ರತಿಯೊಬ್ಬ ಕನ್ನಡಿಗನಿಗೂ ಗೊತ್ತಿದೆ ನಮ್ಮ ಭಾಷೆ ಎಷ್ಟು ಸುಂದರ ಮತ್ತು ಅತ್ಯದ್ಭುತ ಇತಿಹಾಸ ಹೊಂದಿದೆ ಅಂತ. ನಾನು ಒಪ್ಪಿಕೊಳ್ಳುತ್ತೇನೆ, ನಮ್ಮ ಭಾಷೆಯು ರಾಷ್ಟ್ರಮಟ್ಟದಲ್ಲಿ ಹೆಸರುವಾಸಿಯಾಗಬೇಕು, ಪ್ರತಿಯೊಬ್ಬ ಭಾರತೀಯನಿಗು ಈದರ ಸೊಬಗು ತಿಳಿಯಬೇಕು. ಆದರೆ ಇದಕ್ಕೆ ಶಾಸ್ತ್ರೀಯ ಸ್ಥಾನಮಾನ ಒಂದೇ ಮಾರ್ಗವೆ ?

ಇದಕ್ಕೋಸ್ಕರ ನಾವು ಈ ಶಾಸ್ತ್ರೀಯ ಸ್ಥಾನಮಾನ ಹುಡುಕಿಕೊಂಡು ದೆಹಲಿಗೆ ಹೊಗಬೇಕೇ ? ಅದಕೋಸ್ಕರ ನಾವು ಭಿಕ್ಷೆ ಬೇಡುವುದು ಸರಿಯೆ? ಕೇಂದ್ರ ಸರ್ಕಾರಕ್ಕೆ ತೀರ್ಮಾನ ತೆಗೆದುಕೊಳ್ಳಲು ಗಡುವು ನೀಡುವುದು ಸರಿಯೆ?

ಬಹುಶಃ ಇತರಹದ ವರ್ತನೆಯಿಂದ ಭಾಷೆಗೆ, ನಾಡಿಗೆ, ನಾಡಿನ ಜನತೆಗೆ ಅವಮಾನ ಮಾಡಿದಂತೆ ಆಗುತ್ತದೆ ಹೊರತು ಮತ್ತೇನು ಅಗುವುದಿಲ್ಲ. ಇತರ ಅಂಗಲಾಚಿ ತಂದ ಪ್ರಶಸ್ತಿಗೆ ಗೌರವ, ಮರ್ಯಾದೆ ಇರುವಿದಿಲ್ಲ. ಈ ನಡುವಳಿಕೆಯಿಂದ ನಮ್ಮ ಭಾಷೆಯ ವರ್ಚಸ್ಸು ಕಮ್ಮಿಯಗುತ್ತದೆ ಹೊರತು ಜಾಸ್ತಿ ಅಗುವುದಿಲ್ಲ.

"ಭೂಮಿಯನ್ನು ಸೂರ್ಯ ತನ್ನ ಸುಂದರವಾದ ಬೆಳಿಕನಿಂದ ಪ್ರಜ್ವಲಿಸುತ್ತಾನೆ". ಆದರೆ ಅವನೆಂದು ನಮ್ಮಿಂದ ಪ್ರಶಸ್ತಿಗಳನ್ನು ಅಥವಾ ಹೊಗಳಿಕೆಗಳನ್ನು ಬಯಸುವುದಿಲ್ಲ. ಬದಲಾಗಿ ನಮ್ಮಲ್ಲಿರುವ ಅಂಧಕಾರವನ್ನು ಹೊಗಲಾಡಿಸುವ ಪ್ರಯತ್ನ ಪ್ರತಿದಿನ ಮಾಡುತ್ತಾನೆ. ಹೀಗೆ ಪ್ರಕೃತಿದತ್ತವಾಗಿ ಬಂದ ಯಾವ ವಸ್ತುಗಳು, ಜೀವಿಗಳು ಪ್ರಶಸ್ತಿಗಳನ್ನಾಗಲಿ, ಅರ್ಹತಪತ್ರಗಳನ್ನಾಗಲಿ, ಹೊಗಳಿಕೆಗಳನ್ನಾಗಲಿ ಯಾರಿಂದಲೂ ಬಯಸುವುದಿಲ್ಲ ಹಾಗಿದ್ದಮೇಲೆ ನಾವು ಯಾಕೆ ?

ಇಂತ ಭಾಷೆಗೆ ನಮ್ಮ ಕೇಂದ್ರ ಸರ್ಕಾರ ಮನ್ನಣೆ ಕೊಡದೆ, ಶಾಸ್ತ್ರೀಯ ಸ್ಥಾನಮಾನ ನಿರಾಕರಿಸಿದರೆ ಅದು ಕನ್ನಡಿಗರಿಗೆ ಮಾಡಿದ ಅವಮಾನ ಅಲ್ಲ, ಬದಲಾಗಿ ಅವರು ಒಂದು ಭಾಷೆಯ ಪರಂಪರೆಯನ್ನು ತಿಳಿಯದೆ, ಸಮಗ್ರವಾಗಿ ವಿಷಯವನ್ನು ಚರ್ಚಿಸದೆ ಕೊಟ್ಟ ಅತುರತೆಯ ಒಂದು ನಿದರ್ಶನ. ಇದು ಅವರ ವೈಫಲ್ಯತೆಯನ್ನು, ನಿಶ್ಯಕ್ತ ಮೌಲ್ಯಗಳನ್ನು ನಮಗೆಲ್ಲಾ ತೋರಿಸಿ ಕೊಟ್ಟಂತಾಗುತ್ತದೆ. ಅದು ಅವರಿಗೇ ಆದ ಅಪಮಾನ. ಅವರಲ್ಲಿರುವ ಅಙ್ನಾನದ ಪರಮಾವಧಿಯನ್ನು ತೊರೀಸುತ್ತದೆ.

ಎಲ್ಲರಿಗೂ ಗೊತ್ತಿರುವಂತೆ,

"ಸತ್ಯ ಸ್ವಲ್ಪ ತಡವಾಗಿ ಹೊರಬಂದರು ಅದರ ಬರುವಿಕೆಯನು ಯಾರು ಹಿಡಿದಿಡಲಾಗುವುದಿಲ್ಲ!!"

"ಪ್ರಶಸ್ತಿಗಳು ನಮ್ಮನ್ನ ಅರಸಿಕೊಂಡು ಬರಬೇಕು ಹೊರತು, ನಾವು ಅದನ್ನಲ್ಲ ಎಂದು ನನ್ನ ತಾಯಿ ಹೇಳುತ್ತಲೇ ಇರುತ್ತಾರೆ." ಆದ್ದರಿಂದ, ನಮ್ಮ ಪ್ರಯತ್ನ ಪ್ರಶಸ್ತಿಗಳನ್ನು ಗಳಿಸುವದರಲ್ಲಿ ಇರದೆ, ನಮ್ಮ ಭಾಷೆ, ಸಂಸ್ಕೃತಿ, ಇತಿಹಾಸ, ಪರಂಪರೆ ಗಳನ್ನು ಬೇರೆ ಭಾಷೆಗಳಿಗಿಂತ ಹೇಗೆ ಅತ್ಯುನ್ನತ ಮಟ್ಟಕ್ಕೆ ಏರಿಸಬೇಕು, ವಿಭಿನ್ನವಾಗಿಸಬೇಕು ಅನ್ನುವ ಕಡೆ ಇರಬೇಕು. ಅದಕ್ಕೆ ನಮ್ಮ ಕನ್ನಡದ ಮಹಾನ್ ಕವಿಗಳು, ಲೇಖಕರು, ಸಾಹಿತಿಗಳು, ಜನಪ್ರತಿನಿಧಿಗಳು, ಎಲ್ಲರಿಗಿಂತ ಹೆಚ್ಚಾಗಿ ನಾವುಗಳು (ಕನ್ನಡಿಗರು) ಅತ್ತಕಡೆ ಒಂದು ಪ್ರಾಮಾಣಿಕ ಪ್ರಯತ್ನ ಮಾಡಬೇಕಾಗಿದೆ.

ಈ ಪಥದಲ್ಲಿ ಸಾಗುವದಕ್ಕೆ ನಮ್ಮ ನಮ್ಮಲ್ಲೆ ಒಂದು ರೂಪುರೇಷೆ ಹಾಕಿಕೊಂಡು, ಅದನ್ನು ಸರ್ಕಾರ ಅಥವಾ ಸಂವಿಧಾನದ ಸಹಕಾರದಿಂದ ಕಾರ್ಯರೂಪಕ್ಕೆ ತಂದರೆ, ಶಾಸ್ತ್ರೀಯಮಾನಕ್ಕಿಂತ ಮಿಗಿಲಾದ ಪ್ರಶಸ್ತಿಗಳು, ಹೆಸರು ನಮ್ಮ ನಾಡು, ನುಡಿ, ಜನತೆ ಯನ್ನು ಅಲಂಕರಿಸುವುದರಲ್ಲಿ ಸಂದೇಹವಿಲ್ಲ.

ನಮ್ಮ ಭಾಷೆ, ನಡು, ನುಡಿ, ಜನ ಅದರ ಸೊಗಡು, ವೈಶಿಷ್ಟ್ಯ, ಮೌಲ್ಯಗಳು, ಸೌಂದರ್ಯ, ಇತಿಹಾಸ, ಪರಂಪರೆ ಪ್ರತಿಯೊಬ್ಬ ಜನರ ನಾಲಗೆಯ ತುದಿಯಲ್ಲಿ ಮತ್ತು ಹೃದಯದಲ್ಲಿ ಇರಬೇಕೆ ಹೊರತು ಯವುದೋ ಸರ್ಕಾರಿ ಕಡೆತಗಳಲ್ಲಿ ಅಲ್ಲ!!

ಕನ್ನಡಿಗರಾದ ನಾವು ಶಾಂತಿ ಪ್ರೀಯರು, ಸಹೃದಯಿಗಳು, ವಿಶಾಲ ಮನೋಭಾವದವರು ಅಂತೆಲ್ಲಾ ಇಡೀ ಅಖಂಡ ಭಾರತದಲ್ಲಿ ಹೆಸರುವಾಸಿ, ನಮ್ಮ ಈ ವಿಭಿನ್ನವಾದ ಪ್ರಯತ್ನದಿಂದ ಈ ನಮ್ಮ ಗುರುತು ಭಾರತದ ಮುಂದಿನ ಪೀಳಿಗೆಯಲ್ಲಿ ಇಮ್ಮಡಿ ಆಗುತ್ತದೆ ಹೊರತು ಕಮ್ಮಿ ಅಗುವುದಿಲ್ಲ.

ಇದು ನಮ್ಮಿಂದ ಸಾಧ್ಯವೆ? ಹೌದು ಸಂಘಟನೆಯಿಂದ ಮಾತ್ರ...!! "ಒಗ್ಗಟ್ಟಿನಲ್ಲಿ ಬಲವಿದೆ" !!

ಜೈ ಕರ್ನಾಟಕ ಮಾತೆ, ಜೈ ಭಾರತಾಂಬೆ!!

ಉಡುಪಿ - ಸಣ್ಣ ಪರಿಚಯ

2008-09-07T16:30:00.006+05:30

ಉಡುಪಿಯ ಹಿಂದಿನ ಹೆಸರು - ರಜತ ಪೀಠ ಅಥವ ರೂಪ್ಯ ಪೀಠ. ಅಂದರೆ ಬೆಳ್ಳಿಯ ಮಣೆ ಎಂದು ಇದರ ಅರ್ಥ.

ಉಡುಪಿ ಬೆಳ್ಳಿಯ ಮಣೆ ಏಕಾಯಿತು? ಇದಕ್ಕೆ ಒಂದು ರ್‍ಓಚಕವಾದ ಐತಿಹ್ಯವನ್ನು ಕೃಷ್ಣಾವಧೂತ ಕವಿ ತನ್ನ ’ಮಂದಾರಮರಂದ’ ಚಂಪೂ ಕಾವ್ಯದಲ್ಲಿ ಹೀಗೆ ಹೇಳಿದ್ದಾರೆ.

ನೃಪಃ ಕಾರಯಾಮಾಸ ತಸ್ಯಾSಸನಾರ್ಥಂ
ಸುಪೀಠಂ ಸ ರೂಪ್ಯೋತ್ತರಂ ತ್ವಷ್ಟವರ್ಗಂ | - (ಬಿಂದು: ೧.೩೯)

ಭಜತಸುಜನಬಂಧೋ ಙಾನಸಿಂಧೋ ಮುದಂಧೋ
ಭವತು ಪುರವಿಧಾನಂ ರೂಪ್ಯಪೀಠಾಭಿಧಾನಮ್| - (ಬಿಂದು: ೧.೪೦)

ಈ ಪದ್ಯಗಳ ತಾತ್ಪರ್ಯ: ಈ ಪ್ರದೇಶವನ್ನು ಅಳುತ್ತಿದ್ದ ರಾಮಭೋಜರಾಜನೆಂಬವ ಒಮ್ಮೆ ವಾಜಪೇಯ ಯಾಗ ಮಾಡ ಬಯಸಿದ. ಯಾಗದಲ್ಲಿ ಸ್ವತಃ ಬಂದು ಸನ್ನಿಹಿತನಾಗುವಂತೆ ಕ್ಷೇತ್ರದೇವತೆಯಾದ ಪರಶುರಾಮನನ್ನು ಪ್ರಾರ್ಥಿಸಿದ. ಪರಶುರಾಮನು ಕರೆಗೆ ಒಪ್ಪಿ ಯಾಗಮಂಟಪಕ್ಕೆ ಬಂದಾಗ ಅವನನ್ನು ಬೆಳ್ಳಿಯ ಮಣೆ(ರಜತ ಪೀಠ) ಯಲ್ಲಿ ಕೂಡಿಸಿ ಸತ್ಕರಿಸಿದ. ಈ ಅಪೂರ್ವ ಘಟನೆಯ ನೆನಪಿಗಾಗಿ ಈ ಪ್ರದೇಶಕ್ಕೆ ’ರಜತ ಪೀಠ’ ಎಂದೇ ಹೆಸರಾಯಿತು.

ಈ ಪ್ರದೇಶದ ಇನ್ನೊಂದು ಹೆಅರು "ಒಡಿಪು:" ೧೪ನೇ ಶತಕದ ಗ್ರಂಥಕಾರ ನಾರಯಣ ಪಂಡಿತರು "ರಜತಪೀಠಪುರವನ್ನು ಆಡುಮಾತಿನಲ್ಲಿ ’ಒಡಿಪು’ ಎಂದು ಕರೆಯುತ್ತಾರೆ" ಎಂದು ಹೇಳುತ್ತಾರೆ.

ತುಳುವಿನ ಒಡಿಪು ಕನ್ನಡದವರ ಬಾಯಲ್ಲಿ ಉಡಪು, ಉಡುಪು, ಉಡಿಪಿ, ಉಡುಪಿ ಎಂದೆಲ್ಲಾ ಅಯಿತು. ಹಳೆ ಕೀರ್ತನೆಗಳಲ್ಲಿ ’ಉಡಪಿನ ಕೃಷ್ಣ’ ಉಡುಪಿನ ಕೃಷ್ಣ’ ಎಂದೆಲ್ಲಾ ಪ್ರಯೋಗಗಳಿವೆ. ಇದು ಇಂಗ್ಲಿಷ್ ಹವೆ ಬೀಸಿದ ನಾಲಗೆಯಲ್ಲಿ ಉಡಿಪಿ ಅಯಿತು. ಮತ್ತೆ ಪುನಃ ಉಡುಪಿ ಅಯಿತು. ಇವೆಲ್ಲವೂ ’ಒಡಿಪು’ ಮೂಲ ಶಬ್ದದ ವಿಕೃತ ರೂಪಗಳೆ.

ಕೃಷ್ಣ ಹೇಗೆ ಬಂದ:

ಉಡುಪಿಯ ಕೃಷ್ಣನ ಇತಿಹಾಸವು ಜನರ ಬಾಯಲ್ಲಿ ರೂಪಾಂತರಗೊಂಡಿದೆ. ಗೋಪಿಚಂದನದ ಗಡ್ಡೆಯಲ್ಲಿ ಮರೆಯಾದ ಕೃಷ್ಣನ ವಿಗ್ರಹವನ್ನು ಹೊತ್ತು ತರುತ್ತಿದ್ದ ದೋಣಿ ಮಲಪೆಯ ಬಳಿ ಬರುತ್ತಿರುವಾಗ ಬಿರುಗಾಳಿಗೆ ತತ್ತರಿಸಿತು; ಆಚಾರ್ಯ ಮಧ್ವರು ತನ್ನ ಕಾವಿ ಬಟ್ಟೆ ಬೀಸಿ ಬಿರುಗಾಳಿಯನ್ನು ಶಾಂತಗೊಳಿಸಿ ದೋಣಿಯನ್ನು ದಡಮುಟ್ಟಿಸಿದರು ಎಂಬೊಂದು ಕಥೆ ಈಗ ಪ್ರಚಲಿತವಿದೆ.

ಆದರೆ ಸುಮಾರು ೧೭ನೆಯ ಶತಮಾನದಲ್ಲಿ ಫಲಿಮಾರು ಮಠದ ಅಧಿಪತಿಗಳಾಗಿ ಶ್ರೀಕೃಷ್ಣ ಪೂಜಕರಾಗಿದ್ದ ರಘವರ್ಯತೀರ್ಥರೆ ಬರದಿಟ್ಟ ದಾಖಲೆಯಲ್ಲಿ ಈ ಘಟನೆಯನ್ನು ಹೀಗೆ ನಿರೂಪಿಸಿದ್ದಾರೆ:

ಕೃಷ್ಣ ವಿಗ್ರಹವಿದ್ದ ಗೋಪಿಯ ಗಡ್ಡೆಯನ್ನು ಹೊತ್ತ ಹಡಗು ದ್ವಾರಕೆಯಿಂದ ಹೊರಟು ಮಲಪೆಯ ಬಳಿ ಬರುತಿತ್ತು. ಆಗ ನಡೆದ ದುರಂತದಲ್ಲಿ ದೋಣಿ ಒಡೆದು ಮುಳುಗಿ ಹೋಯಿತು. ಜತೆಗೆ ಕೃಷ್ಣ ವಿಗ್ರಹವೂ ಕಡಲತಳ ಸೇರಿತು. ಆನಂತರ ಅದನ್ನು ತಿಳಿದ ಆಚಾರ್ಯ ಮಧ್ವರು ಕಡಲ ತಳದಿಂದ ಅ ಪ್ರತಿಮೆಯನ್ನು ತಂದು ಉಡುಪಿಯ ಮಠದಲ್ಲಿ ಸ್ಥಾಪಿಸಿದರು.

ಪ್ಲವೆ ಭಿನ್ನೆ ಜಲಧೌ ಮಗ್ನಾಂ ಶ್ರೀಕೃಷ್ಣಪ್ರತಿಮಾಮಾನೀಯ.....|

ಇತಿಹಾಸಿಕವಾಗಿ ಹೆಚ್ಚು ಪ್ರಾಚೀನವು ಅಧಿಕೃತವು ಆಗಿದೆ. ಬಿರುಗಾಳಿಯ ಕಥೆ ಆನಂತರ ಬೆಳೆದುಬಂದದ್ದು. ಸ್ಥಳಪುರಾಣ ಕಟ್ಟಿ ಬೆಳೆಸುವುದರಲ್ಲಿ ನಮ್ಮ ದೇಶದ ಜನ ಅಗ್ರಗಣ್ಯರಲ್ಲವೆ?

ಕೃಷ್ಣನ ರಥಗಳು:

ಕೃಷ್ಣನಿಗೆ ನಿತ್ಯವು ಒಂದಲ್ಲ ಒಂದು ಉತ್ಸವ. ಅದಕ್ಕಾಗಿ ಮೂರು ಮರದ ತೇರುಗಳು. ಒಂದು ಬೆಳ್ಳಿಯ ತೇರು. ಇನ್ನೊಂದು ಚಿನ್ನದ ತೇರು. ಒಂದು ಬೆಳ್ಳಿಯ ಪಾಲಕಿ, ಮತ್ತೊಂದು ಚಿನ್ನದ ಪಾಲಕಿ.

ಮೂರು ರಥಗಳದು ಮೂರು ಗಾತ್ರ. ದೊಡ್ಡದು ಬ್ರಹ್ಮರಥ; ನಡುವಿನದು ಗರುಡರಥ; ಇನ್ನೊಂದು ಚಿಕ್ಕರಥ.

ಸುಮಾರು ೫೦ ಅಡಿ ಎತ್ತರದ ಬ್ರಹ್ಮರಥ ತೊನೆಯತ್ತ ಸಾಗುವದನ್ನು ನೋಡುವುದೆ ಒಂದು ಆನಂದ.

ಉಡುಪಿಯ ಎಲ್ಲ ಉತ್ಸವಗಳಿಗೆ ಶಿಖರಪ್ರಾಯವಾದದ್ದು "ಪರ್ಯಾಯ ಮಹೋತ್ಸವ". ಎರಡು ವರ್ಷಗಳಿಗೊಮ್ಮೆ ನಡೆಯುವ ಈ ಉತ್ಸವ ತನ್ನದೇ ಆದ ಕೆಲವು ವ್ಯೆಶಿಷ್ಠ್ಯಗಳನ್ನು ಒಳಗೊಂಡಿದೆ. ಸುಮಾರು ಐದುವರೆ ಶತಕಗಳಿಂದ ಈ ಪರ್ಯಾಯ ಜಾತ್ರೆ ಉಡುಪಿಯ ಹೆಗ್ಗಳಿಕೆಯ ಜಾತ್ರೆಯಾಗಿ ನಡೆದುಕೊಂಡು ಬರುತಿದೆ.

ಕನಕದಾಸರು ಬಂದಾಗ ಏನಾಯಿತು?

ಕನಕದಾಸರು ಉಡುಪಿಯಲ್ಲಿ ಇತಿಹಸ ನಿರ್ಮಿಸಿದರು. ಕನಕದಾಸರ ಕಥೆಯನ್ನು ಬಿಟ್ಟು ಬಿಟ್ಟರೆ ಉಡುಪಿಯ ಕಥೆ ಅಪೂರ್ಣವಾಗಿ ಬಿಡುತ್ತದೆ.

ಕನಕದಾಸರ ಪ್ರಸಂಗದಲ್ಲು ಅನೇಕ ದಂತ ಕಥೆಗಳು ಸೇರಿಕೊಂಡು ನಾನಾ ರೂಪ ತಾಳಿ ವಸ್ತು ಸ್ಥಿತಿ ತಲೆಮರೆಸಿಕೊಂಡಿದೆ. ಕನಕದಾಸರ ಉಡುಪಿಯ ಸಂದರ್ಶನಕ್ಕೆ ಸಂಬಧಪಟ್ಟ ದಾಖಲೆಗಳನ್ನು ಪರಿಶೀಲಿಸಿದಾಗ ನಮಗೆ ದೊರುಕುವ ವಿವರ ಇಷ್ಟು.

ಕನಕದಾಸರು ಕ್ಶೇತ್ರಯಾತ್ರೆಯ ಪ್ರಸಂಗದಲ್ಲಿ ಉಡುಪಿಗೂ ಬಂದಿದ್ದರು. ವಾದಿರಾಜರು ಉಡುಪಿಯಲ್ಲಿದ್ದ ಕಾಲ. ಪ್ರಾಯಃ ಅವರ ಪರ್ಯಾಯ ಕಾಲ ಕೃಷ್ಣಗುಡಿಯ ಎದರುಗಡೆ - ಈಗ ಕನಕದಾಸ ಮಂಟಪ ಇರುವಲ್ಲಿ - ಜೋಪಡಿ ಕಟ್ಟಿಕೊಂಡು ವಾಸವಾಗಿದ್ದರು. ಚಂದ್ರಶಾಲೆಯ ಅಡ್ಡಗೋಡೆಯಿಂದಾಗಿ - ಕೃಷ್ಣನ ಎದುರೆ ನಿಂತರು ಹೊರಗಣ್ಣಿಗೆ ಕೃಷ್ಣನ ದರ್ಶನವಿಲ್ಲ. ಕನಕದಾಸರ ಒಳಗಣ್ಣು ತೆರೆದಿತ್ತು. ಅಲ್ಲಿ ಮಾತ್ರ ನಿರಂತರ ಕೃಷ್ಣನ ದರ್ಶನ.

ಒಂದು ದಿನ ರಾತ್ರಿ ಉಡುಪಿಯಲ್ಲಿ ಚಿಕ್ಕ ಭೂಕಂಪವಾಯಿತಂತೆ, ಚಂದ್ರಶಾಲೆಯ ಗೋಡೆ ಕೃಷ್ಣನ ನೇರಕ್ಕೆ ಬಿರುಕುಬಿಟ್ಟಿತಂತೆ. ಈ ಬಿರುಕಿನಲ್ಲಿ ಇಣುಕಿದರೆ ಕನಕದಾಸರಿಗೆ ರಸ್ತೆಯಲ್ಲೆ ಕೃಷ್ಣನ ದರ್ಶನ. ಇದರ ನೆನಪಿಗಾಗಿ ವಾದಿರಾಜರು ಇ ಬಿರುಕುಬಿಟ್ಟ ಜಾಗವನ್ನು ಮುಚ್ಚುವ ಬದಲು ಅಲ್ಲೊಂದು ಕಿಂಡಿಯನ್ನಿಡಿಸಿದರು. ಅದೇ ಈಗಣ ಕನಕನ ಕಿಟಿಕಿ.

ಕನದಾಸರಿಗೆ ದರ್ಶನ ನೀಡಲು ಕೃಷ್ಣ ತಿರುಗಿದ ಎನ್ನುವ ಕಥೆ ಅನಂತರ ಸ್ತಳಪುರಾಣದ ಚಪಲಚಿತ್ತರಿಂದ ನಿರ್ಮಾಣಗೊಂಡ ಕಥೆ. ಕೃಷ್ಣನವಿಗ್ರಹವನ್ನು ಮಧ್ವಾಚಾರ್ಯರು ಪಶ್ಚಿಮಾಭಿಮುಖವಾಗಿಯೇ ಪ್ರತಿಷ್ಠೆ ಮಾಡಿದ್ದರು ಎನ್ನುವುದಕ್ಕೆ ದಾಖಲೆಗಳಿವೆ. ಮಠದ ವಾಸ್ತುವನ್ನು ಪರಿಶೀಲಿಸಿ ನೋಡಿದರೆ ಅಲ್ಲಿ ಪೂರ್ವಾಭಿಮುಖವಾಗಿ ಪ್ರತಿಷ್ಠೆ ಮಾಡುವ ಸಾಧ್ಯತೆಯೆ ಇಲ್ಲ.

ಎಲ್ಲರೊಳು ಒಂದಾಗು...!

2008-09-03T16:57:00.001+05:30

ಹುಲ್ಲಾಗು ಬೆಟ್ಟದಡಿ, ಮನೆಗೆ ಮಲ್ಲಿಗೆ ಯಾಗು !
ಕಲ್ಲಾಗು ಕಷ್ಟಗಳ ವಿಧಿ ಮಳೆ ಸುರಿಯೆ !!
ಬೆಲ್ಲ ಸಕ್ಕರೆ ಯಾಗು ದೀನ ದುರ್ಬಲರಿಂಗೆ !
ಎಲ್ಲರೊಳು ಒಂದಾಗು - ಮಂಕುತಿಮ್ಮ !!

ಜಟಕಾ ಬಂಡಿ

2008-05-12T16:40:00.001+05:30

ಬದುಕು ಜಟಕಾ ಬಂಡಿ, ವಿಧಿಯದರ ಸಾಹೇಬ
ಕುದುರೆ ನೀನ್ ಅವನು ಪೇಳ್ದಂತೆ ಪಯಣಿಗರು
ಮದುವೆಗೋ ಮಸಣಕೋ ಬೇಕೆಂದ ಕಡೆಗೋಡು
ಪದಕುಸಿಯೇ ನೆಲವಿಹುದು ಮಂಕುತಿಮ್ಮ...!

ನಮ್ಮ ಭಾಷೆ

2008-04-16T19:17:00.003+05:30

ಲೇಖನ ಪ್ರಗತಿಯಲ್ಲಿದೆ !!!