ಗುಣಕೆ ಕಾರಣವೊಂದೆ?

ತೃಣಕೆ ಹಸಿರೆಲ್ಲಿಯದು ? ಬೇರಿನದೆ ? ಮಣ್ಣಿನದೆ ? |
ದಿನಪನದೆ ? ಚಂದ್ರನದೆ ? ನೀರಿನದೆ ? ನಿನದೆ ? ||
ತಣಿತಣಿವ ನಿನ್ನ ಕಣ್ಣಿನ ಪುಣ್ಯವೋ ? ನೋಡು |
ಗುಣಕೆ ಕಾರಣವೊಂದೆ ? - ಮಂಕುತಿಮ್ಮ ||

-ಡಿ.ವಿ.ಜಿ

ತಾತ್ಪರ್ಯ: ಹಸಿರಾಗಿರುವ ಹುಲ್ಲು ನೋಡಲು ಚೆನ್ನ. ಆ ಹಸಿರು ಎಲ್ಲಿಂದ ಬಂತು ? ಅದರ ಸೌಂದರ್ಯ ಎಲ್ಲಿಂದ ಬಂತು ? ಬೇರಿನಿಂದಲೆ ? ಅಥವಾ ಅದಕ್ಕೆ ಸತ್ವವನ್ನು ಒದಗಿಸುವ ಮಣ್ಣಿನಿಂದಲೆ ? ನೀರಿನಿಂದಲೇ ? ಅಥವಾ ಮಣ್ಣಿನಿಂದ ಬಂದ ಸತ್ವ ಮತ್ತು ನೀರನ್ನು ರಸಾಯನಿಕವಾಗಿ ಸಂಯೋಗಗೊಳಿಸುವ ಸೂರ್ಯನಿಂದ ಆಯಿತೋ ? ಅಥವ ಓಷಧಿಗಳಿಗೆ ಒಡೆಯನಾದ ಚಂದ್ರನಿಂದ ಆದದ್ದೆ ? ಅಥವಾ ನಿನ್ನ ಕಣ್ಣೆ ಇದಕ್ಕೆ ಕಾರಣವೊ ? ಹಾಗೂ ಅಲ್ಲ, ನಿನ್ನ ಪುಣ್ಯವಿಶೇಷದಿಂದ ಆ ಹಸಿರು ನಿನಗೆ ಸಂತೋಷವನ್ನು ಕೊಡುತ್ತಿದೆಯೋ ? ಹೀಗೆ ಹಸಿರು ಬಣ್ಣ ಸಂತೋಷಜನಕವಾದ ಗುಣವನ್ನು ಹೊಂದಿದೆಯೆಂದರೆ ಅದಕ್ಕೆ ಒಂದೇ ಕಾರಣವೇ ? ಹೀಗೆ ನಮಗೆ ಸಂತೋಷ ಒದಗಿಸುವ ಗುಣ ವಿಶ್ಲೇಷಣಗೆ ಸಿಕ್ಕದೆ ಹೋಗುತ್ತದೆ.